Pohnpeian - Job - 7

7:1  Mour en aramas rasehng doadoahk idihd en sounpei, rasehng doadoahk apwal en paliwar,

7:2  rasehng lidu men me kin inengieng wasa mwete lemwlemwur; rasehng tohndoadoahk men me kin awiawih pweine.

7:3  Ehuehu sounpwong kin kohdo oh nekla sohte me I en mourki; pwohng koaros kin wadohng ie pahtou.

7:4  Ni ei kin wendi pwe I en meirla, awa kan kin pwand mehlel; I kin wekiwekidekseli pwohngo pwon oh kin kasikasik marain en nin sohrahn.

7:5  Mwahs kadirehla paliwerei; e direkihla kens; nahn kin kohkohsang nan ei ohla kan.

7:6  Ei rahn akan kin imwisekla ni sohte koapworopwor, imwisekla mwadang sang mwekid en dikek en deidei.

7:7  Maing Koht, komwi ketin tamataman me ei mour duwehte esingek ehu; ei peren imwiseklahr.

7:8  Kumwail kilikilang ie met, ahpw mwuhr kumwail pahn sohla kilang ie. Ma kumwail pahn rapahkin ie, I solahr pahn mie.

7:9  Rasehng pelien depwek pali me kin sohla mie oh sohrala, aramas emen kin mehla oh sohte mwahn kin pwurodo; koaros me kin ese kin manokehla.

7:10  Rasehng pelien depwek pali me kin sohla mie oh sohrala, aramas emen kin mehla oh sohte mwahn kin pwurodo; koaros me kin ese kin manokehla.

7:11  Soh! I sohte pahn nennenla! I lingeringerdahr kowahlap. I uhdahn pahn koasoi.

7:12  Dahme kumwail sinsilehkin ie? Kumwail wiahkin ie mahn kamasepwehk en nansed?

7:13  I kin wendi oh song en kommoaldi; I kin rapahki dahme pahn kamwahwihala ei medek.

7:14  Ahpw kumwail kin kamasangkin ie amwail ouraman kan; kumwail kahrehiong ie kaudiahl oh ouraman suwed kan,

7:15  ihme kahrehda ei men lusiamala sang momour nan paliwar suwed wet.

7:16  Solahr ei koapworopwor; I pwangadahr momour. Kumwail piseksang ie. Solahr katepen ei mour.

7:17  Dahme komwi nohk kesempwalkihki aramas? Dahme komwi kin ketin tetengki eh mwekid kan?

7:18  Komwi kin ketin kasawih nimenseng koaros oh kin ketin songosong ahnsou koaros.

7:19  Ia duwe, komwi soh kak sohpeisang ie ahnsou kis, pwe I en kadallehla pilen eweiet?

7:20  Ia duwe, komwi kupwursuwedkihla dipei kan, iei komwi me kin ketin salihedi aramas? Dahme komwi ketin wiahkin ie omwi mehn sosohng? Ia duwe, I wia wisik toutou ehu ong komwi?

7:21  Komwi sohte kak kupwur mahkikihong ie dipei kan? Komwi sohte kak meliehla ei sapwung kan? I nektehn kohdilahng nan ei sousou, oh I solahr pahn mie ni ahnsou me komwi pahn ketin rapahkin ie.