Pohnpeian - Job - 37

37:1  Melimel kin kasaloweiehda.

37:2  Kumwail rong, kumwail koaros, duwen kapitien Koht, ngirisek en nansapwe me peipeido sang nin doauese.

37:3  E kin ketin kadar lioal pahnlahng, sang apali sampah kolahng apali.

37:4  Eri, kapitie ahpw kin sansalada, ngihl kamasapwehk en nansapwe, nindokon lioal eh kin wie piripir.

37:5  Soahng kapwuriamwei kan kin wiawi ni ahnsou me Koht kin ketin mahsen, soahng kaselel kan me kitail sohte kak en dehdehki.

37:6  E ketin mahsanih sinoh en mweredi pohn sampah, oh ketikihdo keteu mwuledek.

37:7  E kin ketin katokihedi en aramas akan doadoahk; e kin ketin kasalehiong irail dahme e kak wia.

37:8  Mahn lawalo kan kin pedolong nan imwarail kan.

37:9  Engin melimel kin ipisang palieir, oh wahdo kisinieng kopou sang paliepeng.

37:10  Engin doauesen Koht kin kalamwurihala pihl akan, oh wiahkihla aihs.

37:11  Lioal kin piripir sang nan depwek

37:12  ni ar kin mwekimwekidki kupwur en Koht. Re kin kapwaiada soahng koaros me Koht kin ketin mahsanih, wasa koaros nan sampah.

37:13  Koht kin ketikihdo keteu nin sampah; mweinele e ketikihdo pwehn kalokehki aramas akan, de en kasalehiong aramas sapwellime kupwuramwahu.

37:14  Nennenla ekis ahnsou, Sohp, oh rong mahs; medemedewe soahng mwahu kan me Koht ketin wiadahr.

37:15  Komw ese ia duwen Koht eh kin ketin koasoanehdi oh kupwurehda lioal en piripirsang nan depwek kan?

37:16  Komw ese ia duwen depwek eh kin tangatang pahnlahng, wiepen nin limen Koht kapwuriamwei?

37:17  Soh, pwe ihte komw kin lokolongki karakar ni ahnsou me kisinieng en palieir kin kahpwalihala sahpw.

37:18  Komw kak sewesehki Koht wiepen pahnlahng oh kamelengilengihala duwehte mete melengileng?

37:19  Komw padahkihong kiht dahme se pahn patohwanohng Koht; sohte audepen at lamalam; sohte mehkot se kak patohwan.

37:20  I sohte pahn peki I en pato pahn kupwur en Koht; dahme I pahn patohwankihong ih ahnsou mwahu pwe en kauweiehla?

37:21  Eri, met marain en pahnlahng inenen lingaling, me kamahl ong kitail en kilenglahng; oh pahnlahng kin mwakelekelkihda kisinieng.

37:22  Lingaling kin pwarada paliepeng, oh lingan en Koht kin kadirehkinkitailla lammwin kowahlap.

37:23  Sapwellimen Koht manaman me lapalahpie kahrehda kitail sohte kak kerenlahng; ih me ketin pwung oh mehlel nan sapwellime wiewia kan ong aramas.

37:24  Ihme kahrehda, aramas koaros kin lemmwiki ih, oh e kin pohnsehse koaros me kin kosekose me irail me loalokong.