Pohnpeian - Job - 28

28:1  Mie pwoahr en silper pahn pwehl; Mie wasahn kamwakelehda kohl.

28:2  Aramas kin weirada mete sang pahn pwehl Oh inim takai oh kapeieisang kahper loale.

28:3  Aramas kin lel wasa me keieu rotorot pahn pwehl. Re kin wie roporop lellahng pahn kepin sampah Oh weirada takai sang wasa rotorot.

28:4  Dohsang wasa me aramas kin kousoan ie De wasa me nehn aramas saikinte sok ie Aramas kin weirada pwoahr loal kan pwe re en rapahki takai kesempwal kan. Re kin wie doadoahk nan ar sangat, Doudouki sahl nan pwoahr akan.

28:5  Kisin mwenge kin wosada sang nin sampah, Ahpw pil pahn kepin sampahohte Soahng koaros kin ohla oh mwutpene.

28:6  Sapair kin aude takai kan en sampah, Oh kohl nan pwelpar.

28:7  Sohte likoht kin kilang elen kolahng wasahn dipwisou kesempwal pwukat, Oh sohte puldur kin pihr wasa pwuko.

28:8  Sohte laion de mahn kommwad Kin alu nan ahl tehn pwukat.

28:9  Aramas kin weirada takai me keieu teng, Weirada nahna kan leldilahng pahn kapi.

28:10  Ni ar kin weweir pwoahr kohla nan takai kan, Re kin diarada kisin takai kesempwal akan.

28:11  Re kin weiredi lel pahn kepin pihl akan Oh kin walahng nan marain dahme rir.

28:12  Ahpw ia wasa me aramas kak diar ie kupwurokong? Ia wasa me kitail kak padahngki ie duwen dehdehki?

28:13  Kupwurokong sohte kak dierek nanpwungen aramas akan; Sohte me ese ia uwen kesempwalpe.

28:14  Pahn kepin madau oh sehd kan Koasoia me sohte kupwurokong kak dierek wasa pwuko.

28:15  Sohte me kak pwainkihda silper de kohl.

28:16  Kohl oh kisin takai me keieu kaselel Sohte pahrekiong kesempwalpe.

28:17  E inenen kesempwal sang kohl, Sang kep en kohl oh kilahs kaselel.

28:18  Kupwurokong kesempwal sang Audepen madau lingan kan de krisdal de rupi kan.

28:19  Topas me keieu kaselel oh kohl keieu mwakelekel Sohte kak pahrekiong kesempwal en kupwurokong.

28:20  Eri, ia poahsoan en kupwurokong? Ia wasa me kitail kak padahngki ie duwen dehdehki?

28:21  Sohte mehkot mour kak kilang, Pil menpihr me pipihrseli kan sohte kak kilang.

28:22  Pil mehla oh mwomwla Koasoia me ira rongorongete koasoiepe.

28:23  Koht kelehpw me mwahngih ahlo, Mwahngih wasa me kupwurokong mihmi ie,

28:24  Pwehki eh ketin mwahngih imwin sampah, Mwahngih mehkoaros pahnlahng.

28:25  Ni ahnsou me Koht ketikihong manaman kisinieng Oh kupwurehda ia pahn laud en madau;

28:26  Ni ahnsou me Koht kupwurehda wasa me keteu pahn mweresang ie, Oh ahl me depwek en nansapwe pahn keid ie;

28:27  Iei ih ahnsowo me e ketin masanihada kupwurokong oh song ia uwen kesempwalpe-% E ahpw ketin kamanahla.

28:28  Koht eri mahsanihong aramas, “Pwe kumwail en loalokongla, kumwail uhdahn pahn lemmwiki Kaun-o. Pwe kumwail en dehdehki, kumwail uhdahn pahn sohpeisang me suwed.”