Pohnpeian - Job - 31

31:1  I wiadahr inou lapalap ehu: I en dehr kin kangkakil serepein men ni ineng suwed.

31:2  Dahme Koht, Wasa Lapalap, kin ketin wiahiong kitail? Ia duwen eh kin ketin katingih wiewiahn aramas akan?

31:3  E kin ketikihong irail akan me kin wiahda dihp paisuwed oh kalokolok.

31:4  Koht ketin mwahngih ei wiewia kan koaros, e kin ketin tehk kahk koaros me I kin wia.

31:5  I kak kahukihla me soh mwahn sapwung laud ehu I wiahda, I soh mwahn song en pitihedi meteikan.

31:6  Koht en ketin tenekih ie ni sapwellime mehn tenek en pwuhng, e ahpw pahn ketin mwahngih uwen ei mwakelekel.

31:7  Ma I sapwungala katiasang nan ahl pwung; de mweidala pein ngehi ong ni me suwed; ma pehi kat saminkilahr dihp,

31:8  eri, wahnsapwei koaros en ohla, de aramas teikan en pwaisanki kisin tungoal kan me I kin koadoahkihada.

31:9  Ma poakepen en mehn mpei eh pwoud kaloweiedier, oh ma I rukula, awih pahn wenihmwen imwe,

31:10  eri, ei pwoud en kin kaunopada mwenge ong emen ohl tohrohr, oh pil wendi mpe.

31:11  Pwe soangen suwed wet pahn alehki kalokepen kamakamala.

31:12  E pahn rasehng kisiniei en nan ehl, me kin karoangehla oh kamwomwala mehkoaros me I ahneki.

31:13  Ahnsou me emen ei ladu kan kin kaulime ie, I pahn kin rong oh wie me mwahu ong.

31:14  Pwe ma soh, ia duwen ei pahn uh mwohn silangin Koht? Dahme I pahn kak sapengki Koht ni eh pahn ketidohn kadeikiehda?

31:15  Pwe pein Kohtohte me ketin wiaiehda, iei ih me pil ketin wiahda ei ladu kan.

31:16  I sohte mwahn soikala pekipek en me semwehmwe men, I sohte mwahn kauwehla koapworopwor en liohdi men,

31:17  oh sohte sepwoupwou men me duhpekla nindokon ei reken mwenge.

31:18  Erein ei mour unsek I kin apwahpwalih soangen aramas pwukat.

31:19  Ni ei kin diar emen nan eh anahn laud pwehki eh nohn semwehmwe oh sohte kak pwainda eh likou,

31:20  I kin kihong likou me kin wiawihsang ni wunen nei pelin sihpw kan. E ahpw kin kapingakin ie sang nan kapehde unsek.

31:21  Ma I pitihedi me sepwoupwou men, pwehki ei ese me ngehi me adamwahu ni mwoalen kopwung,

31:22  eri, pehi kat en rihsekpeseng, pwopweiet en dapengeksang nan dewe.

31:23  Pwehki ei masak kalokolok en Koht, I sohte kak wiahda soahnget.

31:24  I sohte mwahn kin koapworopworki dipwisou kan,

31:25  de kin aklapalapkihla ei kepwehpwe.

31:26  I sohte mwahn kin pwongih ketipin ni eh kin daker wasa, de maram me kin dak lingaling.

31:27  I sohte kin sapwungala oh pwongih ira ni ei pahn metik pehiet ni tiahk en waunekin ira.

31:28  Kalokepen soangen dihp pwukat, iei kamakamala, pwe e kin kasohwe Koht, Wasa Lapalap.

31:29  I sohte mwahn kin perenkihda paisuwedlahn ei imwintihti kan, de nsenamwahukihla ar kin mihla nan apwal laud;

31:30  I sohte mwahn dipkihda ei kin kapakapkin irail pwe re en mehla.

31:31  Aramas koaros me kin doadoahkohng ie ese mwahu duwen ei kin kasamwo mwahu mehn keiru kan ahnsou koaros.

31:32  I kin kasamwolong nan imwei me seiloak kan, I sohte kin mweidohng re en kin keiruhdi nanial akan.

31:33  Aramas teikan kin song karirihala diparail kan, a ngehi, I soh mwahn kin ekihla dipei kan.

31:34  I soh mwahn kin masak lokaiahn aramas akan; I sohte kin nennenla de ruksang irail pwehki ei masak re dehr kasaroweiehdi.

31:35  Ia duwe, sohte me pahn rong dahme I ndindaht? I kahukihla me ei lokaia kan koaros me uhdahn mehlel. Koht, Wasa Lapalap, en ketin sapeng ie. Ma ei imwintihti pahn ntingihdi dipei kan nan pwuhk pwe I en kilang,

31:36  mehlel, I pahn perenkihda kidahng pohn moangeiet, oh kolada pwe aramas koaros en kilang.

31:37  I pahn patohwanohng Koht mehkoaros me I wiadahr, oh patohwan uh mwohn silangi ni eimah.

31:38  Ma I pirapahda sahpw me I kin wie sapwasapw loale, oh adihasang me uhdahn sapwe sahpwo-%

31:39  ma I tungoalehla wahnsahpwo, a sounsapwasapw akan me koadoahkihadahr ahpw duhpekla-%

31:40  eri, sahpwo en kakairada dihpw tekatek oh dihpw suwed, en dehr kihda wahn pilawa oh parli. Imwilahn en Sohp eh koasoi.