Pohnpeian - Job - 36

36:1  Kanengamahiong ekis mahs oh rong ie, rong dahme I pahn patohwan ni mwaren Koht.

36:2  Kanengamahiong ekis mahs oh rong ie, rong dahme I pahn patohwan ni mwaren Koht.

36:3  I ese soahng tohto oh I pahn doadoahngki dahme I ese pwe I en kasalehda me Koht, me ketin kapikiehdao, me pwung.

36:4  Sohte mehkot me I pahn patohwanohng komwi pahn likamw; ohl loalokong mehlel men me patopato mwohmwi.

36:5  Ia uwen roson en Koht! E sohte kin ketin kalahdeki emen; sohte mehkot me e sohte ketin mwahngih.

36:6  E sohte kin ketin mweidohng me dipan akan en mour werei, oh e kin ketin kupwurehki me semwehmwe kan pwuhng.

36:7  E kin ketin sinsile me pwung kan; e kin ketin mweidohng irail en kaunda wasa duwehte nanmwarki kan oh kupwurehda pwe re en waunla kohkohlahte.

36:8  Ahpw ma aramas kin selikihdi sel mete, wie lokolongki mehkan me re wiadahr,

36:9  Koht kin ketin kasalehiong irail diparail kan oh ar aklapalap.

36:10  E kin ketin kupwurehda pwe re en rong sapwellime kapehm kan pwe re en sohpeisang me suwed.

36:11  Ma re pahn peikiong Koht oh uhpah, re pahn paiamwahu oh popohl.

36:12  Ahpw ma soh, re pahn mehla nan ar pweipwei oh kotehla piletik me kolahng nan sapwen me melahr akan.

36:13  Irail kan me sohte ar Koht kin lingeringer poatopoat, oh mehnda ma re ale lokolok, ahpw re sohte kin kapakap oh peki sawas.

36:14  Re kin mehla ni ar wie pwulopwulte, oh ohkihla kowahlap mour kanamenek.

36:15  Ahpw Koht kin ketikihong aramas lokolok pwehn wia padahk ehu ong irail, oh ketin doadoahngki apwal pwehn kamwakidada kapehdirail kan.

36:16  Koht ketikihsang komwi nan apwal, oh ketin mweidohng komwi en pereperenki omwi paiamwahu; omwi tehpel direkihla kisin tungoal akan.

36:17  Ahpw met, komw aleier lokolok me konehng komwi.

36:18  Komwi kanahieng pwe komwi dehr lohdi pahn pweipwei sapwung, de kepwehpwe en kahrehiong komwi en pwupwula.

36:19  E sohte pahn wia kamwahu ehu ong komwi en peki sawas; omwi kehl koaros met solahr kak sewesei komwi.

36:20  Komw dehr kasik pwohng en leledo, ni ahnsou me wehi kan pahn ohla.

36:21  Kanahieng dehr sohpeiong me suwed; komwi aleier lokolok pwehn sinsilei komwi sang me suwed.

36:22  Tamataman ia uwen lapalap en sapwellimen Koht manaman; iei ih sounpadahk me keieu lapalap sang koaros.

36:23  Sohte me kak patohwanohng Koht dahme e pahn ketin wia de kapwukohneki me ih me wiewia me suwed.

36:24  Kapingpen sapwellime wiewia kan kin wiawi ahnsou koaros; komwi uhdahn pahn pil kapinga ih.

36:25  Aramas koaros kilangehr wiepen nin lime kan; ahpw kitail kin kilangete sang wasa doh.

36:26  Kitail sohte kak wehwehkihla sapwellime lapalap ni unsek de tohtohn sapwellime sounpar akan.

36:27  Iei ih Koht me kin ketikihsang pilen sampah oh kawekiong ni dingiding en keteu.

36:28  E kin ketin kamwerehdihsang keteu nan depwek pwehn kalamwurih aramas koaros.

36:29  Sohte me wehwehki mwomwen mwekid en depwek kan de mwomwen ngirisek en nansapwe nan depwek, wasa me Koht kin ketiket ie.

36:30  E kin ketikihdo piripir en lioal wasa koaros nan depwek, ahpw kepin nan madau kin wie rotorotete.

36:31  Met iei duwen eh kin ketin katungoale aramas oh ketikihdo reken kisin tungoal.

36:32  E kin ketin kolekihdi nin lime piripir en lioal, oh ketin mahsanihong en kolahng wasa me e kupwurki.

36:33  Nansapwe kin pakairkihdo melimel me kohkohdo, oh kou kan kin ese me e pahn melimel.