Pohnpeian - Job - 41

41:1  Ia duwe, ke kak apihada Lepaiadan, de salihkihdi sellap pwoat lowe?

41:2  Ke kak kihong sahl pwoat nin tumwe, de kehs ehu nan ewe?

41:3  E kak peki rehmw ke en sapwadala, de ke en mahkohng?

41:4  E kak en inoukihong uhk mehkot, de inoukihda me e pahn papahiuk kohkohlahte?

41:5  Ke kak wiahki ih noumw kisin mehn mwadong kis, me ke pahn kin kaperenehki serepein kan me kin papahiuk?

41:6  Soused kan pahn netki ni pweimwahu? Sounnetinet kan pahn pwalangpeseng pwe re en netikihla?

41:7  Ke kak kadirehkihla kili ketieuwen soused kan, de doakoahki moange ketieu pwoat?

41:8  Song sair pakteieu, a ke solahr pahn pwurehng kohkohlahte; ke sohte kak manokehla uhpene wet!

41:9  Mehmen me kin kilang Lepaiadan, kin sohla angi oh kin pwupwudiong nanpwel.

41:10  Ni mahn menet eh kin kesihnenda, me inenen mas kamasepwehk; sohte me kin men uhda mwowe.

41:11  Ihs me kak uhwong ahpw pitlahsang? Sohte nin sampah me kak wia met.

41:12  I pahn padakihong uhk duwen nehn Lepaiadan, oh koasoiahda uwen kehlail en paliwere.

41:13  Sohte me kak tehrasang kidip en paliwere, de kauwehkihla kili tehtehn pei.

41:14  Ihs me kak kasarapeseng ewe, me ngih kamasepwehk kei kapilpenehr?

41:15  Pohntihnsewe, irek en wunen mwomw kei me wia, paspene oh kekeluwak duwehte takai.

41:16  Ehute pasehng meteio oh keirekpene; sohte kisinieng kis kak duwal nanpwung.

41:17  Koaros inenen patpene oh keirekpene; sohte mehkot kak kamweidirailpeseng.

41:18  Ni eh kin asi, marain kin pirieisang nan tumwe, oh pwoaren mese kan kin lingaling, rasehng dakedahn ketipin.

41:19  Mpwulen kisiniei kin lulsang nan ewe, rasehng mwoalus mwehl en nan uhmw.

41:20  Ediniei kin uh sang nan pwoaren tumwe, rasehng edin tuwi me lullul pahn einpwoat.

41:21  Angin eh esingek kin sounda kisiniei, mpwulen kisiniei kin uh sang nan ewe.

41:22  Eh kehl unsek mihmi nin tepinwere, masepwehk kin kipehdi koaros me kin tuhwong.

41:23  Sohte wasa kis muterek ni kili, pwe me kekeluwak oh apwal duwehte mete.

41:24  Nan eh mohngiong sohte masak kin dierek ie, pwe me apwal oh kekeluwak duwehte takai.

41:25  Ni eh kin pwourda oh uhda, koht akan pil kin masepwehkada, pwehki ar masak, e kin sohla angirail.

41:26  Sohte kedlahs pwoat kak kalipwelipwehda; sohte ketieu pwoat, de arep pwoat, de lepin seipali, kak kauwehla.

41:27  E kin wiahki mete diper en tuhke, oh prons mehkot kopwukopw reh, rasehng tuhke mwoasoangot.

41:28  Sohte kesik keteiu me kak kasalowehda pwe en tangdoaui; takai kan me pahn koasuk, rasehng diper en dihpw.

41:29  E kin wiahki mehn wowoki kan kisin diper en dihpw, oh e kin kouruhrki ketieu kan me aramas kin doakoahki.

41:30  Kapehde rasehng pwoatol ohla kei me keng; ni eh kin limwahdek, e kin pwalangpeseng pwehl muterek kan rasehng mehn ruwahdek me mete mi pahn kapi.

41:31  E kin kamwekidada nansed duwehte einpwoat pwoapwoail ehu, oh kin kapwudopwudehda duwehte ketel en leh ehu.

41:32  Ni eh kin tangatang kohla,lipwe kin wiahda ahl lingaling ehu. oh e kin kadirehkihla nansed pwudopwud pwetepwet.

41:33  Sohte mehkot nin sampah me kak karasarasohng, pwe mahn emen ih me sohte kin masepwehk.

41:34  E pil kin mwamwahliki mahn me keieu lapalap akan, pwe ih me nanmwarkien mahn lawalo koaros.