TpiKJPB - Matthew - 17

17:1  ¶ Na bihain long sikispela de Jisas i kisim Pita, Jems, na brata bilong em Jon, na bringim ol i go antap long wanpela maunten antap i stap em yet,

17:2  Na bodi bilong em i senis i kamap narakain long ai bilong ol. Na pes bilong em i bin lait tru olsem san, na klos bilong em i wait olsem lait.

17:3  Na, lukim, Moses na Ilaias i kamap ples klia long ol taim ol i toktok wantaim em.

17:4  Nau Pita i bekim, na tokim Jisas, Bikpela, em i gutpela long mipela long stap hia. Sapos yu gat laik, larim mipela wokim hia tripela haus holi, wanpela bilong yu, na wanpela bilong Moses, na wanpela bilong Ilais.

17:5  Taim em yet i toktok, lukim, wanpela klaut i lait tru i karamapim ol. Na lukim, wanpela nek i kam ausait long klaut, husat i tok, Dispela em i Pikinini Man bilong mi i stap klostu tru long bel bilong mi, long husat mi gat amamas tru. Yupela harim em.

17:6  Na taim ol disaipel i harim dispela, ol i pundaun long pes bilong ol, na ol i pret tru.

17:7  Na Jisas i kam na tasim ol, na tok, Kirap, na no ken pret.

17:8  Na taim ol i bin litimapim ol ai bilong ol, ol i no lukim wanpela arapela man, Jisas tasol.

17:9  Na taim ol i kam daun long maunten, Jisas i givim tok long ol, i spik, No ken tokim wanpela man long dispela driman samting, inap long taim Pikinini Man bilong man i kirap bek gen pinis long dai.

17:10  Na ol disaipel bilong em i askim em, i spik, Bilong wanem nau ol man bilong rait i tok long Ilaias mas kam pastaim?

17:11  Na Jisas i bekim na tokim ol, Tru tumas, Ilaias bai kam pastaim, na stretim bek olgeta samting.

17:12  Tasol mi tokim yupela, Long Ilaias i kam pinis, na ol i no save long em, tasol ol i bin mekim long em wanem samting ol i gat laik. Wankain olsem tu bai Pikinini Man bilong man karim pen long ol.

17:13  Nau ol disaipel i kisim save long em i tokim ol long Jon dispela Baptist.

17:14  ¶ Na taim ol i kam long dispela bikpela lain tru, i gat i kam long em wanpela man, taim em i brukim skru long em, na tok,

17:15  Bikpela, sori long pikinini man bilong mi. Long wanem, em i longlong olgeta, na kisim hevi tru. Long wanem, planti taim em i pundaun insait long paia, na planti taim insait long wara.

17:16  Na mi bringim em long ol disaipel bilong yu, na ol i no inap long oraitim em.

17:17  Nau Jisas i bekim na tok, O lain tumbuna i no gat bilip tru na i paul, mi bai stap wantaim yupela inap long wanem taim? Mi bai karim pen long yupela inap long wanem taim? Bringim em hia long mi.

17:18  Na Jisas i hatim dispela spirit nogut, na em i lusim em i go ausait. Na dispela pikinini i kamap orait olgeta i stat long dispela aua stret.

17:19  Nau ol disaipel bilong em i kam long Jisas taim ol i stap ol yet , na tok, Bilong wanem mipela i no inap long rausim em i go ausait?

17:20  Na Jisas i tokim ol, Bilong wanem, long pasin bilong i no gat bilip bilong yupela. Long wanem, tru tumas, mi tokim yupela, Sapos yupela i gat bilip tru olsem wanpela hap bilong pikinini mastet, yupela bai tokim dispela maunten, Lusim hia i go long ples long hap. Na em bai lusim hia. Na bai i no gat wanpela samting we em i no gat rot olgeta long kamap long yupela.

17:21  Tasol dispela kain i no go ausait long narapela rot, long prea na tambuim kaikai tasol.

17:22  ¶ Na taim ol i stap long Galili, Jisas i tokim ol, Ol bai putim Pikinini Man bilong man i go long ol han bilong ol man.

17:23  Na ol bai kilim em, na namba tri de em bai kirap bek gen. Na ol i sori planti moa yet.

17:24  ¶ Na taim ol i kam long Kaperneam, ol husat i kisim takis mani i kam long Pita, na tok, Ating i yes long Tisa bilong yu i baim takis?

17:25  Em i tok, Yes. Na taim em i kam insait long haus, Jisas i go pas long em, i spik, Yu ting wanem, Saimon? Ol king bilong dispela graun i kisim kastam mani na takis mani long husat? Long ol pikinini bilong ol yet, o bilong ol ausait man?

17:26  Pita i tokim em, Long ol ausait man. Jisas i tokim em, Nau ol pikinini i stap fri.

17:27  Tasol, inap long yumi no ken bagarapim bel bilong ol, yu go long biksi, na tromoi wanpela huk, na kisim i kam antap dispela namba wan pis i kam antap. Na taim yu bin opim maus bilong em, yu bai painim wanpela hap mani. Kisim dispela, na givim long ol bilong baim takis bilong mi na yu.