TpiKJPB - Matthew - 27

27:1  ¶ Taim moningtaim i kam pinis, olgeta bikpris na ol lapun hetman bilong ol manmeri i kisim tok helpim i birua long Jisas long mekim em long dai.

27:2  Na taim ol i bin pasim em, ol i bringim em i go, na givim em long nambawan gavman Pontias Pailat.

27:3  Nau Judas, husat i bin putim em long han bilong birua, taim em i luksave long em i lus long kot, i tanim bel em yet, na bringim gen dispela 30 hap silva long ol bikpris na ol lapun hetman,

27:4  I spik, Mi bin mekim sin long dispela, mi bin putim blut i no bin mekim rong long han bilong birua. Na ol i tok, Dispela em i wanem samting long mipela? Yu lukluk long dispela.

27:5  Na em i tromoi ol hap silva i go daun insait long tempel, na lusim dispela hap, na em i go na hangamapim em yet.

27:6  Na ol bikpris i kisim ol hap silva, na tok, Em i no orait long lo long putim ol insait long bakstua bilong samting i dia tru, bilong wanem, em i pe bilong blut.

27:7  Na ol i kisim tok helpim, na ol i baim dispela hap graun bilong man bilong wokim sospen graun wantaim ol, long planim ol ausait man long en.

27:8  Olsem na dispela hap graun ol i kolim, Hap graun bilong blut, i go inap long tude.

27:9  Nau em i kamap pinis, dispela samting profet Jeremi i toktok, i spik, Na ol i kisim 30 hap silva, pe bilong em husat ol i makim pe, husat ol pikinini bilong Isrel i bin makim pe,

27:10  Na givim ol bilong baim hap graun bilong man bilong wokim sospen graun, olsem Bikpela i bin makim long mi.

27:11  ¶ Na Jisas i sanap long ai bilong nambawan gavman. Na nambawan gavman i askim em, i spik, Yu stap King bilong ol Ju? Na Jisas i tokim em, Yu tok olsem.

27:12  Na taim ol bikpris na ol lapun hetman i sutim tok long em, em i no bekim wanpela samting.

27:13  Nau Pailat i tokim em, Ating i yes long yu harim hamas samting ol i witnes i birua long yu?

27:14  Na em i no bekim em long wanpela tok, inap olsem long nambawan gavman i tingting planti tru.

27:15  Nau long dispela bikpela kaikai nambawan gavman i lusim wanpela kalabusman i go long ol manmeri, husat ol i laik.

27:16  Na ol i gat nau wanpela kalabusman i narakain nogut, husat ol i kolim Barabas.

27:17  Olsem na taim ol i bung wantaim, Pailat i tokim ol, Yupela i gat laik long mi lusim husat long yupela? Barabas, o Jisas, husat ol i kolim Kraist?

27:18  Long wanem, em i save bikos ol i gat mangal tingting ol i bin givim em long em.

27:19  Taim em i sindaun pinis long sia kot, meri bilong em i salim tok long em, i spik, Yu no ken gat wanpela wok long dispela stretpela man. Long wanem, mi bin karim hevi long planti samting tude long wanpela driman bilong tingim em.

27:20  Tasol ol bikpris na ol lapun hetman i pulim tingting bilong dispela bikpela lain tru long ol i ken askim long Barabas, na bagarapim Jisas olgeta.

27:21  Nambawan gavman i bekim na tokim ol, Yupela i gat laik long mi lusim husat bilong dispela tupela long yupela? Ol i tok, Barabas.

27:22  Pailat i tokim ol, Mi bai mekim wanem nau long Jisas husat ol i kolim Kraist? Ol olgeta i tokim em, Larim ol nilim em long diwai kros.

27:23  Na nambawan gavman i tok, Bilong wanem, em i bin mekim wanem pasin nogut? Tasol ol i singaut moa, i spik, Larim ol nilim em long diwai kros.

27:24  Taim Pailat i luksave long em i no inap winim ol long wanpela samting, tasol long moa ol i wokim wanpela bikpela paul nabaut, em i kisim wara, na wasim tupela han bilong em long ai bilong dispela bikpela lain tru, i spik, Mi no bin mekim rong long blut bilong dispela stretpela man. Yupela lukluk long en.

27:25  Nau olgeta manmeri i bekim na tok, Blut bilong em i stap antap long mipela, na antap long ol pikinini bilong mipela.

27:26  ¶ Nau em i lusim Barabas i go long ol. Na taim em i bin wipim Jisas, em i givim em long ol long nilim long diwai kros.

27:27  Nau ol soldia bilong nambawan gavman i kisim Jisas i go long bikpela rum bilong olgeta yet, na bungim i go long em dispela lain soldia olgeta.

27:28  Na ol i rausim olgeta klos bilong em, na putim wanpela longpela saket skalet antap long em.

27:29  Na taim ol i bin wokim wanpela hat king long rop i gat nil, ol i putim dispela antap long het bilong em, na wanpela tiktik long han sut bilong em. Na ol i lindaunim wanpela skru long ai bilong em, na wokim pani long daunim em, i spik, Gude, King bilong ol Ju!

27:30  Na ol i spet antap long em, na kisim dispela tiktik, na paitim em long het.

27:31  Na bihain long ol i bin wokim pani long daunim em, ol i rausim dispela longpela saket long em, na putim klos bilong em gen long em, na bringim em i go long nilim em long diwai kros.

27:32  Na taim ol i kam ausait, ol i lukim wanpela man bilong Sairini, Saimon em i nem bilong em. Ol i pulim em strong long karim diwai kros bilong em.

27:33  ¶ Na taim ol i kam long ples ol i kolim Golgata, dispela tok em i olsem, ples bilong bun bilong het,

27:34  Ol i givim em vinega ol i abusim wantaim marasin i pait long dringim. Na taim em i bin testim long en, em i no laik dring.

27:35  Na ol i nilim em long diwai kros, na tilim ol klos bilong em, taim ol i tromoi satu, inap long em i ken kamap pinis, dispela samting profet i toktok, Ol i brukim ol klos bilong mi namel long ol yet, na antap long naispela klos bilong mi ol i bin tromoi satu.

27:36  Na ol i sindaun na lukluk long em long dispela hap.

27:37  Na ol i putim wanpela rait i sutim tok antap long het bilong em, DISPELA EM I JISAS KING BILONG OL JU.

27:38  Nau i gat tupela stilman ol i nilim long diwai kros wantaim em, wanpela long han sut sait, na narapela long han kais sait.

27:39  Na ol husat i wokabaut klostu i sutim tok nogut long em, taim ol i seksekim ol het bilong ol,

27:40  Na tok, Yu husat i bagarapim tempel olgeta, na wokim dispela gen long tripela de, kisim bek yu yet. Sapos yu stap Pikinini Man bilong God, kam daun long diwai kros.

27:41  Wankain olsem tu ol bikpris i wokim pani long daunim em, wantaim ol man bilong rait na ol lapun hetman, i tok,

27:42  Em i kisim bek ol arapela. em yet em i no inap long kisim bek. Sapos em i stap King bilong Isrel, larim em kam daun nau long diwai kros, na mipela bai bilipim em.

27:43  Em i putim bilip long God. Larim em kisim bek em nau, sapos em i laik kisim em. Long wanem, em i tok, Mi Pikinini Man bilong God.

27:44  Tupela stilman tu, husat ol i nilim long diwai kros wantaim em, i tromoi wankain samting long ol tit bilong em.

27:45  Nau i stat long namba sikis aua i gat tudak i karamapim dispela hap graun olgeta i go inap long namba nain aua.

27:46  Na klostu long namba nain aua Jisas i singaut wantaim wanpela bikpela nek, i spik, Ilai, Ilai, lama sabaktani? Dispela tok em i olsem, God bilong mi, God bilong mi, bilong wanem yu bin givim baksait long mi?

27:47  Sampela bilong ol husat i sanap long dispela hap, taim ol i harim dispela, i tok, Dispela man i singautim Ilaias.

27:48  Na kwiktaim wanpela bilong ol i ran, na kisim wanpela spans, na pulimapim wantaim vinega, na putim dispela long wanpela tiktik, na givim em long dring.

27:49  Olgeta arapela i tok, Larim em i stap, larim yumi luksave long Ilaias bai kam long kisim bek em o nogat.

27:50  ¶ Jisas, taim em i bin singaut gen wantaim wanpela bikpela nek, i lusim spirit bilong em.

27:51  Na, lukim, laplap bilong tempel i bruk long tupela hap i stat long antap i go long daunbilo olgeta. Na dispela graun i bin guria, na ol ston i bruk.

27:52  Na ol matmat i op. Na planti bodi bilong ol seint husat i slip pinis i kirap bek,

27:53  Na kam ausait long ol matmat bihain long kirap bek bilong em, na go insait long biktaun holi, na kamap ples klia long planti.

27:54  Nau taim kepten bilong 100 soldia, na ol husat i stap wantaim em, taim ol i lukluk long Jisas, lukim guria, na ol dispela samting, dispela i kamap, ol i pret tru, i spik, Tru tumas, dispela em i Pikinini Man bilong God.

27:55  Na planti meri i stap long dispela hap na lukluk i stap longwe tru, husat i bihainim Jisas i kam long Galili, na wokim wok long em.

27:56  Namel long husat em Maria Makdalin, na Maria, mama bilong Jems na Joses, na mama bilong ol pikinini bilong Sebedi.

27:57  ¶ Taim apinun tru i kam pinis, i gat i kam wanpela maniman bilong Arimatia, husat nem bilong en em Josep, husat tu em yet em i disaipel bilong Jisas.

27:58  Em i go long Pailat, na askim long pulim bodi bilong Jisas. Nau Pailat i tok strong long ol long givim bodi long em.

27:59  Na taim Josep i bin kisim bodi, em i tantanim dispela insait long klinpela naispela laplap,

27:60  Na slipim dispela insait long nupela matmat bilong em yet, dispela em i bin katim ausait long ston. Na em i tantanim wanpela bikpela ston long dua bilong matmat, na lusim dispela hap.

27:61  Na Maria Makdalin i stap long dispela hap, na arapela Maria, na tupela i sindaun pas klostu long matmat.

27:62  Nau long de bihain, dispela i bihain long de bilong redim, ol bikpris na ol Farisi i kam bung wantaim i go long Pailat,

27:63  I spik, Bikman, mipela holim tingting long dispela man bilong giaman i tok, taim em i stap laip yet, Bihain long tripela de mi bai kirap bek gen.

27:64  Olsem na tok strong long ol i mas lukautim strong tru dispela matmat inap long namba tri de, nogut ol disaipel bilong em i kam long nait, na stilim em i go, na tokim ol manmeri, Em i kirap bek long dai. Olsem tasol dispela las rong bai nogut moa long namba wan rong.

27:65  Pailat i tokim ol, Yupela i gat wanpela was. Go long rot bilong yupela, na mekim dispela strong tru olsem yupela i inap long mekim.

27:66  Olsem tasol ol i go, na mekim matmat i strong tru, taim ol i pasim ston, na putim wanpela was.