CSlElizabeth - Matthew - 19

19:1  И бысть егда сконча Иисус словеса сия, прейде от Галилеи и прииде в пределы Иудейския об он пол Иордана.

19:2  И по Нем идоша народи мнози, и изцели их ту.

19:3  И приступиша к Нему фарисее искушающе Его и глаголаша Ему: аще достоит человеку пустити жену свою по всяцей вине?

19:4  Он же отвещав рече им: несте ли чли, яко Сотворивый искони, мужеский пол и женский сотворил я есть?

19:5  И рече: сего ради оставит человек отца (своего) и матерь и прилепится к жене своей, и будета оба в плоть едину,

19:6  якоже ктому неста два, но плоть едина: еже убо Бог сочета, человек да не разлучает.

19:7  Глаголаша Ему: что убо Моисей заповеда дати книгу распустную и отпустити ю?

19:8  Глагола им: яко Моисей по жестосердию вашему повеле вам пустити жены вашя: изначала же не бысть тако:

19:9  глаголю же вам, яко иже аще пустит жену свою, разве словесе прелюбодейна, и оженится иною, прелюбы творит: и женяйся пущеницею прелюбы деет.

19:10  Глаголаша Ему ученицы Его: аще тако есть вина человеку с женою, лучше есть не женитися.

19:11  Он же рече им: не вси вмещают словесе сего, но имже дано есть:

19:12  суть бо скопцы, иже из чрева матерня родишася тако: и суть скопцы, иже скопишася от человек: и суть скопцы, иже исказиша сами себе Царствия ради Небеснаго: могий вместити да вместит.

19:13  Тогда приведоша к Нему дети, да руце возложит на них и помолится: ученицы же запретиша им.

19:14  Иисус же рече (им): оставите детей и не возбраняйте им приити ко Мне: таковых бо есть Царство Небесное.

19:15  И возложь на них руце, отиде оттуду.

19:16  И се, един (некий) приступль рече Ему: Учителю благий, что благо сотворю, да имам живот вечный?

19:17  Он же рече ему: что Мя глаголеши блага? Никтоже благ, токмо един Бог: аще ли хощеши внити в живот, соблюди заповеди.

19:18  Глагола Ему: кия? Иисус же рече: еже, не убиеши: не прелюбы сотвориши: не украдеши: не лжесвидетелствуеши:

19:19  чти отца и матерь: и: возлюбиши искренняго твоего яко сам себе.

19:20  Глагола Ему юноша: вся сия сохраних от юности моея: что есмь еще не докончал?

19:21  Рече ему Иисус: аще хощеши совершен быти, иди, продаждь имение твое и даждь нищым: и имети имаши сокровище на небеси: и гряди вслед Мене.

19:22  Слышав же юноша слово, отиде скорбя: бе бо имея стяжания многа.

19:23  Иисус же рече учеником Своим: аминь глаголю вам, яко неудобь богатый внидет в Царствие Небесное:

19:24  паки же глаголю вам: удобее есть велбуду сквозе иглине ушы проити, неже богату в Царствие Божие внити.

19:25  Слышавше же ученицы Его, дивляхуся зело, глаголюще: кто убо может спасен быти?

19:26  Воззрев же Иисус рече им: у человек сие невозможно есть, у Бога же вся возможна.

19:27  Тогда отвещав Петр рече Ему: се, мы оставихом вся и вслед Тебе идохом: что убо будет нам?

19:28  Иисус же рече им: аминь глаголю вам, яко вы шедшии по Мне, в пакибытие, егда сядет Сын Человеческий на престоле славы Своея, сядете и вы на двоюнадесяте престолу, судяще обеманадесяте коленома Израилевома:

19:29  и всяк, иже оставит дом, или братию, или сестры, или отца, или матерь, или жену, или чада, или села, имене Моего ради, сторицею приимет и живот вечный наследит:

19:30  мнози же будут перви последнии, и последни первии.