Kapingamarangi - Numbers - 19

19:1  Dimaadua ga-helekai gi Moses mo Aaron

19:2  bolo gi-wanga-ina nnaganoho aanei gi digau Israel: Digaula gi-gaamai di kau mmee dela dono mee huaidu ai, gei digi hai-hegau ai.

19:3  Digaula gi-wanga di-maa gi tangada hai-mee-dabu go Eleazar. Di kau le e-kae gi tua di waahale-laa e-daaligi gii-made i-mua nnadumada tangada hai-mee-dabu deelaa.

19:4  Nomuli, gei Eleazar gaa-kae hunu dodo, ga-haga-tulutulu nia dodo aalaa gi dono madaalima hagahidu i-mua di Hale-laa.

19:5  Di manu hagatau mo dono gili, goneiga, dodo, mo dono geiga le e-dudu i-mua nnadumada tangada hai-mee-dabu.

19:6  Gei mee gaa-kae hunu laagau-‘cedar’, laagau-‘hyssop’ mo-di loahi mmee gaa-kili nia maa gi-lodo di ahi.

19:7  Nomuli, gei mee gaa-tugi ono goloo ga-gaugau dono huaidina, gei nomuli gei mee gaa-mee di-ulu gi-lodo di waahale-laa, gei mee e-noho milimilia hua igolo gaa-dae-loo gi-di hiahi.

19:8  Tangada dela ne-dudu di kau le e-hai gii-tugi ono goloo ga-gaugau dono huaidina, gei mee e-noho milimilia labelaa gaa-dae-loo gi-di hiahi.

19:9  Gei tangada dela e-madammaa le e-hagabudu nia lehu o-di kau gaa-dugu i-di gowaa madammaa i-tua di waahale-laa, e-benebene gi digau Israel e-hagatogomaalia-ai nia wai ala e-daa gi-daha nia milimilia. Di hai deenei le e-hai belee daa gi-daha nia hala.

19:10  Tangada dela ne-hagabudu nia lehu e-hai gii-tugi ono goloo, gei mee e-noho-hua milimilia gaa-dae-loo gi-di hiahi. Taganoho deenei le e-mogobuna hua igolo i-lodo nia madagoaa ala e-loomoi, ang-gi digau Israel mo digau mai i-daha ala e-noho i nadau baahi.

19:11  Tangada dela guu-bili gi tangada made le e-milimilia i-lodo nia laangi e-hidu.

19:12  Gei mee e-hai gi-haga-madammaa i tolu laangi mo-di hidu laangi, gei mee ga-madammaa. Maa mee digi haga-madammaa-ina ia i tolu laangi mo-di hidu laangi, mee e-milimilia-hua.

19:13  Tangada dela guu-bili gi tangada made ge hagalee haga-madammaa ia, le e-noho-hua milimilia, idimaa nia wai haga-madammaa la-digi duia gi-hongo o mee. Mee gu-haga-milimilia di Hale-laa Dimaadua, gei mee hagalee dau bolo ia tangada ni God.

19:14  Tangada ma-gaa-made i-lodo di hale-laa, gei di-maa tangada i-golo, be ne-ulu-adu gi-lodo i-di madagoaa tangada made dela i-golo, le e-milimilia i-nia laangi e-hidu.

19:15  Nia loaabi mono baalanga dunu meegai ala i-lodo di hale-laa deelaa ala ono uhi ai la-gu-milimilia.

19:16  Maa tangada ma-gaa-bili gi tangada ne-daaligi be ne-made i malaelae, be tangada ma-gaa-bili gi-di iwi dangada be taalunga, mee gu-milimilia i-lodo nia laangi e-hidu.

19:17  Di hai o-di haga-madammaa tangada dela gu-milimilia, le e-hai beenei: hunu lehu mai di kau mmee dela ne-dudu belee daa gi-daha nia hala, le e-gaamai gaa-dugu gi-lodo di baalanga ga-haga-puni-anga hunu wai madammaa.

19:18  Gei di hai o-di hale-laa dela ne-made tangada i-no-lodo, tangada dela e-madammaa le e-kae dana manga laagau-‘hyssop’, ga-daalo gi-lodo nia wai ga-hagatulutulu di hale-laa deelaa, mono mee huogodoo i ono lodo, mo nia daangada ala nogo i-golo. Nomuli, gei tangada dela e-madammaa le e-haga-tulutulu nia wai gi-hongo digau ala ne-bili gi-di iwi dangada, be tuaidina dangada made, be taalunga.

19:19  I tolu laangi mo-di hidu laangi, tangada madammaa le e-haga-tulutulu nia wai gi-hongo digau milimilia. I-di hidu laangi, mee e-haga-madammaa digaula. Gei digaula e-tugi nadau goloo, ga-gaugau nadau huaidina, gei digaula ga-madammaa i-di ulu di laa.

19:20  Tangada dela e-milimilia ge hagalee haga-madammaa ia le e-noho-hua milimilia, idimaa nia wai haga-madammaa la-digi wanga-ina gi-hongo tangada deelaa. Mee gu-hagamilimilia di Hale-laa Dimaadua ge hagalee dau bolo ia tangada ni God.

19:21  Goodou e-haga-gila taganoho deenei i-nia madagoaa huogodoo ala ga-loomoi. Tangada dela e-haga-tulutulu ana wai haga-madammaa le e-tugi labelaa ono goloo. Di-ingoo-hua tangada dela ma-gaa-bili gi-nia wai la-gu-milimilia gaa-dae-loo gi-di hiahi.

19:22  Di-ingoo-hua di mee dela ma-gaa-bili ginai tangada milimilia, ge tangada i-golo ma-gaa-bili gi-di mee deelaa la-ga-milimilia gaa-dae-loo gi-di hiahi.