Kapingamarangi - Numbers - 25

25:1  Di madagoaa digau Israel nogo noho i nadau hale-laa i-di gowaa mehanga gonduu o Acacia, nia daane ga-daamada gaa-hai di huaidu be-di manu gi-nia ahina Moab ala i-di gowaa deelaa.

25:2  Nia ahina aanei gu-gahi-mai nia daane gi nadau hagamiami daumaha i nadau daumaha gi-di god o Moab. Digau Israel guu-gai nia meegai mo-di daumaha gi-di god

25:3  Baal o Peor, gei Dimaadua gu-hagawelewele gi digaula,

25:4  ga-helekai gi Moses, “Laha-mai nia dagi Israel de-hagalongo huogodoo, daaligidia digaula gii-mmade i-di laangi madammaa, gei Au ga-hagalee hagawelewele gi digaula.”

25:5  Moses ga-helekai gi ana dagi hai-hegau, “Tangada-nei mo tangada-nei i goodou le e-daaligi gii-mmade nia daangada huogodoo o dono madawaawa ala nogo daumaha gi-di Baal o Peor.”

25:6  Di madagoaa hua deelaa, gei taane Israel gaa-lahi dana ahina Midian gi-lodo dono hale-laa i-mua nnadumada o Moses mo nia daangada i-di nadau tuu lodo-huaidu i-di bontai i-di Hale-laa Dimaadua.

25:7  Di madagoaa Phinehas, tama-daane a Eleazar, dela go tama-daane Aaron, go tangada hai-mee-dabu, ne-mmada gi-di mee deenei, geia ga-du-gi-nua ga-hagatanga gi-daha mo tagabuulinga-dangada. Mee gaa-kae dana daalo,

25:8  ga-daudali taane deelaa mo-di ahina gi-lodo di hale-laa, ga-daalo meemaa dogolua gi taalo. Di hai deenei dela ne-hai, gei taumagi damana dela nogo haga-huaidu digau Israel gu-hagalee.

25:9  Di magi deenei la-gu-daaligi ana daangada e-madalua maa-haa mana-(24,000).

25:10  Dimaadua ga-helekai gi Moses,

25:11  “Idimaa mai di mee a Phinehas dela ne-hai, Au gu-hagalee hagawelewele gi digau Israel. Mee nogo hagalee dumaalia bolo digaula e-daumaha gi-di-ingoo-hua di god i-daha mo Au, deelaa dagu mee digi haga-huaidu-ina digaula i-lodo dogu hagawelewele.

25:12  Helekai gi mee bolo Au gaa-hai dagu hagababa gi mee, di hagababa dela ga-noho-hua beelaa i-lodo nia madagoaa huogodoo ala ga-loomoi.

25:13  Mee mo dono hagadili la-gu-haga-noho hagadahi bolo e-hai digau hai-mee-dabu, idimaa mee digi dumaalia; gi-nia daangada e-hai-baahi mai gi-di-Au, guu-hai di haga-mehede o-nia hala o-nia daangada.”

25:14  Di ingoo tangada Israel dela ne-daaligi dalia di ahina Midian la-go Zimri, tama-daane ni Salu, go di tagi o-di madahaanau i-lodo di madawaawa Simeon.

25:15  Di ingoo di ahina la-go Cozbi. Dono damana go Zur, di tagi ni dahi madahaanau llauehe digau Midian.

25:16  Dimaadua ga-helekai gi Moses,

25:17  “Heebagi gi digau Midian, hunahuna-ina digaula,

25:18  idimaa digaula ala ne-hai nadau mee huaidu adu gi goodou i-di nadau halahalau goodou i Peor, mo i-di ahina go Cozbi dela ne-daaligi i-di madagoaa taumagi i Peor.”