Kapingamarangi - Numbers - 30

30:1  Moses ga-helekai nnelekai aanei gi-nia dagi nia madawaawa digau Israel:

30:2  Tangada dela ma-gaa-hai dana hagababa hagamodu belee wanga dana mee gi Dimaadua, be e-hai dana hagamodu bolo ia hagalee hai dahi mee, mee hagalee hai-loo gi-oho dana hagababa ne-hai, mee e-hai-loo gii-hai ana mee huogodoo ala bolo e-hai koia.

30:3  Tama-ahina e-noho i-di hale dono damana ma-gaa-hai dana hagamodu bolo ia e-wanga dana mee gi Dimaadua, be e-hagababa bolo ia hagalee hai dahi mee,

30:4  mee e-hai-loo gii-hai ana mee huogodoo ala ne-hagababa bolo e-hai koia, go dono damana la-hua ma-ga-longono-ia di-maa ga-hagalee donu ginai.

30:5  Maa dono damana gaa-bule a-mee gi-dee hai dana mee dela ne-hagababa bolo e-hai i dana longono-ia, gei mee gu-mehede gi-daha mo dana hagababa dela ne-hai. Dimaadua ga-dumaalia gi-mee, idimaa dono damana gu-de-hiihai bolo mee e-hai di-maa.

30:6  Maa di ahina dono lodo ai ma-gaa-hai dana hagamodu, ne-hai-hua hagalellele be ne-hai bolo e-waidaha mo-di mee, ga-nomuli gaa-hai dono lodo,

30:7  mee e-hai-loo gii-hai ana mee huogodoo ala ne-hagababa koia bolo e-hai, go dono lodo la-hua ma-ga-longono-ia di-maa ga-hagalee donu ginai.

30:8  Maa dono lodo gaa-bule a-mee gi-dee hai dana mee dela ne-hagababa bolo e-hai i dana longono-ia, gei mee gu-mehede gi-daha mo dana hagababa dela ne-hai. Dimaadua ga-dumaalia gi mee.

30:9  Di ahina guu-made dono lodo be di ahina gu-diiagi dono lodo e-hai gi-daahi ana hagababa huogodoo ala ne-hai bolo ia hagalee hai dahi mee.

30:10  Maa di ahina dono lodo i-golo gaa-hai dana hagamodu be-di hagababa bolo ia e-waidaha hagalee hai dahi mee,

30:11  mee e-hai-loo gii-hai nia mee huogodoo ala ne-hagamodu be ne-hagababa koia bolo e-hai, go dono lodo la-hua ma-ga-longono-ia di-maa ga-hagalee donu ginai.

30:12  Maa di lodo o-maa gaa-bule a-mee bolo hudee heia di hagamodu i dana longono-ia, gei di ahina deelaa gu-mehede gi-daha mo dana hagababa ne-hai.

30:13  Di lodo di ahina deelaa la ono donu i-golo e-daahi be e-dugu di hagamodu be-di hagababa dela ne-hai go di ahina.

30:14  Gei hila-hua be taane i-di laangi e-dahi i-muli dono longono di hagamodu, gei mee digi hai dono dee-donu ginai, di ahina deelaa e-hai-loo gii-hai ana mee huogodoo ala ne-hagamodu koia bolo e-hai. Taane la-gu-hiihai gi-di hagamodu, i de-ia dela digi dee-donu gi-di-maa i-di laangi dela ne-longono-ia di-maa.

30:15  Maa taane ga-haga-balumee di hagamodu no-muli, gei mee e-hai gii-kae di hagaduadua o dana de-haga-gila-aga di hagamodu.

30:16  Aanei go nnaganoho a Dimaadua ne-wanga gi Moses i-di gili nia hagamodu e-hai go di ahina dono lodo e-noho i-lodo di hale dono damana mo-di ahina guu-hai dono lodo.