BurCBCM - Philemon - 1

1:1  ခရစ်တော်ယေဇူးအတွက်ကြောင့် အကျဉ်းကျခံနေရသူ ပေါလုနှင့်ငါတို့၏ညီအစ်ကို တီမောသီဦးတို့ထံမှ ငါတို့ချစ်သော လုပ်ဖော်ကိုင်ဖက် ဖီလေမွန် ထံသို့လည်းကောင်း၊-

1:2  ငါတို့၏နှမ အာဖီယ၊ ငါတို့၏ရဲ ဘက်စစ်သည်တော် အာခီပုနှင့် သင်၏အိမ်တွင် စုဝေးသည့်အသင်းတော်ထံသို့လည်းကောင်း စာရေးလိုက်ပါ၏။

1:3  ငါတို့၏အဖဘုရားသခင်နှင့် ယေဇူးခရစ်တော် သခင်ထံမှ ကျေးဇူးတော်နှင့် ငြိမ်းချမ်းသာယာခြင်းသည် သင်တို့အားလုံး အပေါ်သို့ သက်ရောက်ပါစေသော်။

1:4  ငါသည် ဆုတောင်းပတ္ထနာပြုသောအခါတိုင်း သင့်ကိုသတိရ၍ ဘုရားသခင်၏ကျေးဇူးတော်ကို ချီးမွမ်းပါ၏။-

1:5  အဘယ်ကြောင့်ဆိုသော် ယေဇူးသခင်နှင့် သူတော် သူမြတ်အပေါင်းတို့အပေါ်၌ ထားရှိသော သင်၏ချစ်ခြင်း မေတ္တာနှင့် ယုံကြည်ခြင်းအကြောင်းတို့ကို ငါကြားသိရ သောကြောင့်ဖြစ်၏။-

1:6  သင်သည် သင်၏ယုံကြည်ခြင်းကို မျှဝေခံစားသည်နှင့်အမျှ ခရစ်တော်၌ ငါတို့ခံစားရရှိသည့် ကောင်းသောအရာတို့ကို လူတို့ပိုမိုသိရှိလာစေရန် ငါဆု တောင်းပါ၏။-

1:7  ငါ၏ညီတော်၊ သင်၏ချစ်ခြင်းမေတ္တာသည် ငါ့အား ကြီးမားသောပျော်ရွှင်မှုကိုပေး၍ များစွာအားရှိ စေ၏။ အကြောင်းမူကား သင်သည် သူတော်သူမြတ် အပေါင်းတို့၏စိတ်နှလုံးကို ရွှင်လန်းစေခဲ့လေပြီ။

1:8  ထို့ကြောင့် ပြုသင့်ပြုထိုက်သည့်အမှုကို ပြုလုပ်ရန် ငါသည် သင့်အား ခရစ်တော်၌ အမိန့်ပေးစေခိုင်းဝံ့သော်လည်း၊-

1:9  ချစ်ခြင်းမေတ္တာကိုထောက်၍ ခရစ်တော်ယေဇူး ၏သံတမန်နှင့် ကိုယ်တော့်အတွက် ယခုအခါအကျဉ်း ကျခံနေရသူ ငါပေါလုသည် သင့်ကိုမေတ္တာရပ်ခံလိုပါ၏။-

1:10  ငါအကျဉ်းကျခံလျက်နေရစဉ် ခရစ်တော်၌ ငါ၏သားဖြစ် လာသော အိုနေးစိမုအတွက် ငါသည် သင့်အား အသနား ခံပါ၏။-

1:11  သူသည် ယခင်က သင့်အတွက် အသုံးမဝင်ခဲ့ သော်လည်း ယခုအခါ သင်နှင့် ငါ့အတွက်ပါ အသုံးဝင်လာ လေပြီ။-

1:12  ငါသည် သူ့ကို သင့်ထံသို့ ပြန်လည်စေလွှတ် လိုက်လေပြီ။ ဤသည်ကား ငါ၏စိတ်နှလုံးကိုစေလွှတ် လိုက်ခြင်းပင်ဖြစ်၏။-

1:13  ငါသည် ဧဝံဂေလိတရားတော် အတွက်ကြောင့် အကျဉ်းကျခံလျက်နေရစဉ် သင်၏ ကိုယ်စား ငါ့ကိုပြုစုရန် သူ့ကို ငါနှင့်အတူခေါ်ထားလိုပါ၏။-

1:14  သို့ရာတွင် သင်၏သဘောတူညီချက်မရရှိဘဲ အဘယ်အမှုကိုမျှ ငါမပြုလို။ ဤသို့ဖြင့် သင်ပြုလုပ်သော ကောင်းမှုသည် အနိုင်အထက်ပြုခြင်းကြောင့်ဖြစ်ပေါ် လာခြင်းမဟုတ်ဘဲ သင်၏အလိုဆန္ဒအလျောက်ဖြစ်ပေါ် လာခြင်းဖြစ်ပေလိမ့်မည်။

1:15  သင်သည် အိုနေးစိမုအား အစဉ်ပိုင်ဆိုင်နိုင်ခြင်းငှာ သူသည် သင့်ထံမှခေတ္တမျှ ခွဲခွာခဲ့ခြင်းဖြစ်တန်ရာ၏။-

1:16  သူ့အား သင်ပြန်လည်ပိုင်ဆိုင်သောအခါတွင် သူသည် ကျွန်တစ်ဦးမျှသာမဟုတ်တော့ဘဲ ယင်းထက်ပိုလာလေပြီ။ အထူးသဖြင့် သူသည် ငါ့အတွက် ခရစ်တော်၌ ချစ်သော ညီတော်ဖြစ်လာလေပြီ။ သင့်အတွက်မှာမူ ကျွန်အဖြစ်နှင့် လည်းကောင်း၊ သခင်ဘုရား၌ရရှိသော ညီတော်အဖြစ် နှင့်လည်းကောင်း ပိုင်ဆိုင်ခြင်းဖြစ်သောကြောင့် ပို၍ပင် တန်ဖိုးရှိပေလိမ့်မည်။-

1:17  သို့ဖြစ်၍ ငါ့အား သင်၏လုပ်ဖော် ကိုင်ဖက်အဖြစ်မှတ်ယူလျှင် ငါ့ကိုကြိုဆိုလက်ခံသကဲ့သို့ သူ့ကို ကြိုဆိုလက်ခံပါလော့။-

1:18  အကယ်၍ သူသည် သင့်အား တစ်စုံတစ်ရာပြစ်မှားမိခဲ့လျှင်ဖြစ်စေ၊ တစ်စုံတစ်ရာ ပေးဆပ်စရာရှိခဲ့လျှင်ဖြစ်စေ၊ ငါ၏စာရင်း၌ ရေးမှတ်ထား ပါလော့။-

1:19  ငါပေါလုသည် ထိုအကြွေးကို ပေးဆပ်ပါမည်ဟူ၍ ငါ၏လက်ဖြင့်ကိုယ်တိုင်ရေးလိုက်ပါ၏။ သင်ကိုယ်တိုင်ပင်လျှင် သင့်ဘ၀တစ်ခုလုံး ငါ့အား အကြွေးတင်နေ ကြောင်း ငါမဖော်ပြလိုပေ။-

1:20  သို့ဖြစ်၍ ငါ့ညီ၊ သင်သည် သခင်ဘုရား၌ ငါ့အား ကျေးဇူးပြုရန် ငါအလိုရှိပါ၏။ ငါ၏ စိတ်နှလုံးကို ခရစ်တော်၌ လန်းဆန်းစေပါလော့။

1:21  သင်သည် ငါ့ကိုနာခံမည်ဟု ယုံကြည်စိတ်ချလျက် ဤစာကို ငါရေးလိုက်ပါ၏။ အမှန်စင်စစ် သင်သည် ငါပြော သည်ထက် ပို၍ပြုလုပ်လိမ့်မည်ကိုလည်းငါသိပါ၏။-

1:22  တစ်ချိန်တည်းတွင်ပင် ငါတည်းခိုရန်အခန်းတစ်ခန်းကို လည်း အသင့်ပြင်ဆင်ထားပါလော့။ အဘယ်ကြောင့်ဆို သော် သင်တို့၏ဆုတောင်းပတ္ထနာများအားဖြင့် ငါသည် သင်တို့ထံသို့ ပြန်လည်ရောက်ရှိလိမ့်မည်ဟု ငါမျှော်လင့် သောကြောင့်ဖြစ်၏။

1:23  ခရစ်တော်ယေဇူး၌ ငါနှင့်အတူ အကျဉ်းကျခံရသူ ဖြစ်သော ဧပါဖရက သင့်ကိုနှုတ်ဆက်လိုက်ပါ၏။-

1:24  ငါ၏ လုပ်ဖော်ကိုင်ဖက် များဖြစ်ကြသော မာကု၊ အာရစ္စတာ ကု၊ ဒေမတ်နှင့် လုကာတို့ကလည်း သင့်ကို နှုတ်ဆက် လိုက်ကြပါ၏။

1:25  ယေဇူးခရစ်တော်သခင်၏ကျေးဇူးတော်သည် သင် တို့၏စိတ်ဝိညာဉ်နှင့်အတူရှိပါစေသော်။ အာမင်။