Ndebele - Philemon - 1

1:1  UPawuli isibotshwa sikaKristu Jesu loTimothi umzalwane, kuFilimoni othandekayo lesisebenzi kanye lathi,

1:2  lakuApifiya othandekayo, lakuArkipho owebutho kanye lathi, lakubandla elisendlini yakho:

1:3  Umusa kawube kini lokuthula okuvela kuNkulunkulu uBaba wethu leNkosini uJesu Kristu.

1:4  Ngiyambonga uNkulunkulu wami, ngikuphatha ngezikhathi zonke emikhulekweni yami,

1:5  ngisizwa ngothando lwakho langokholo olalo eNkosini uJesu lakubo bonke abangcwele,

1:6  ukuze ukuhlanganyela kokholo lwakho kube lamandla elwazini lwento yonke enhle ekini kuKristu Jesu.

1:7  Ngoba silentokozo enkulu lenduduzo ethandweni lwakho, ngoba imibilini yabangcwele yavuselelwa ngawe, mzalwane.

1:8  Ngalokho, lanxa ngilesibindi esikhulu kuKristu sokuthi ngikulaye into efaneleyo,

1:9  kanti ngenxa yothando kungcono ukuthi ngincenge, nginjengonje, uPawuli omdala, esengiyisibotshwa futhi sikaJesu Kristu.

1:10  Ngiyakuncenga ngomntanami, engimzeleyo kuzibopho zami, uOnesimo,

1:11  okade engelasizo kuwe, kodwa khathesi-ke ulosizo kuwe lakimi,

1:12  engimbuyisela kuwe; kodwa wena, memukele, okuyikuthi imibilini yami;

1:13  ebengifisa mina ukumbamba abe lami, ukuze angisebenzele esikhundleni sakho kuzibopho zevangeli;

1:14  kodwa kangithandanga ukwenza ulutho ngaphandle kwemvumo yakho, ukuze okuhle kwakho kungabi ngokokubanjwa ngamandla, kodwa njengokwesihle.

1:15  Ngoba mhlawumbe wehlukaniswa lawe okwesikhatshana ngenxa yalokhu, ukuze ubuye umemukele phakade;

1:16  angabe esaba njengesigqili, kodwa ngaphezu kwesigqili, umzalwane othandekayo, ikakhulu kimi, kodwa kakhulu kangakanani kuwe konke enyameni leNkosini.

1:17  Ngakho uba usithi ngingumhlanganyeli lawe, memukele njengami.

1:18  Kodwa uba ekone ngolutho kumbe elomlandu, lokho kubalele kimi;

1:19  mina Pawuli ngibhale ngesandla sami, mina ngizahlawula; ukuthi ngingatsho kuwe ukuthi lawe uqobo ulomlandu oseleyo kimi.

1:20  Yebo, mzalwane, sengathi ngingaba lentokozo ngawe eNkosini; uvuselele imibilini yami eNkosini.

1:21  Ngikubhalele ngithemba ukulalela kwakho, ngisazi ukuthi lawe uzakwenza okungaphezu kwalokho engikutshoyo.

1:22  Futhi ngesikhathi esifananayo ungilungisele lami indawo yokuhlala; ngoba ngiyathemba ukuthi ngemikhuleko yenu ngizanikwa kini.

1:23  Uyakubingelela uEpafra oyisibotshwa kanye lami kuKristu Jesu,

1:24  uMarko, uAristako, uDema, uLuka, izisebenzi kanye lami.

1:25  Umusa weNkosi yethu uJesu Kristu kawube lomoya wenu. Ameni.