VulgSistine - Wisdom - 4

4:1  O quam pulchra est casta generatio cum claritate: immortalis est enim memoria illius: quoniam et apud Deum nota est, et apud homines.

4:2  Cum praesens est, imitantur illam: et desiderant eam cum se eduxerit, et in perpetuum coronata triumphat incoinquinatorum certaminum praemium vincens.

4:3  Multigena autem impiorum multitudo non erit utilis, et spuria vitulamina non dabunt radices altas, nec stabile firmamentum collocabunt.

4:4  Et si in ramis in tempore germinaverint, infirmiter posita, a vento commovebuntur, et a nimietate ventorum eradicabuntur.

4:5  Confringentur enim rami inconsummati, et fructus illorum inutiles, et acerbi ad manducandum, et ad nihilum apti.

4:6  Ex iniquis enim omnes filii qui nascuntur, testes sunt nequitiae adversus parentes in interrogatione sua.

4:7  Iustus autem si morte praeoccupatus fuerit, in refrigerio erit.

4:8  Senectus enim venerabilis est non diuturna, neque annorum numero computata: cani autem sunt sensus hominis,

4:9  et aetas senectutis vita immaculata.

4:10  Placens Deo factus est dilectus, et vivens inter peccatores translatus est.

4:11  raptus est ne malitia mutaret intellectum eius, aut ne fictio deciperet animam illius.

4:12  Fascinatio enim nugacitatis obscurat bona, et inconstantia concupiscentiae transvertit sensum sine malitia.

4:13  Consummatus in brevi explevit tempora multa:

4:14  placita enim erat Deo anima illius: propter hoc properavit educere illum de medio iniquitatum: populi autem videntes, et non intelligentes, nec ponentes in praecordiis talia:

4:15  quoniam gratia Dei, et misericordia est in sanctos eius, et respectus in electos illius.

4:16  Condemnat autem iustus mortuus vivos impios, et iuventus celerius consummata longam vitam iniusti.

4:17  Videbunt enim finem sapientis, et non intelligent quid cogitaverit de illo Deus, et quare munierit illum Dominus.

4:18  Videbunt autem et contemnent eum: illos autem Dominus irridebit.

4:19  et erunt post haec decidentes sine honore, et in contumelia inter mortuos in perpetuum: quoniam disrumpet illos inflatos sine voce, et commovebit illos a fundamentis et usque ad supremum desolabuntur: et erunt gementes, et memoria illorum peribit.

4:20  Venient in cogitatione peccatorum suorum timidi, et traducent illos ex adverso iniquitates ipsorum.