LinVB - Galatians - 3

3:1  E bato ba Galáta, bozángí ndé mayéle ? Náni alokí bínó ? Bayébísákí bínó polélé té bóníbóní Yézu Krístu ayókákí mpási o kurúse.

3:2  Nalingí bóyébisa ngáí sé elóko yǒ kó : Bokúlákí Elímo mpô botósí Mobéko, tǒ mpô boyambí matéya boyókákí ?

3:3  Bóní bozángí mayéle boye ? Awa bobandákí na Elímo, bolingí ndé kosúka sikáwa na makambo ma nzóto ?

3:4  Bôngó bo­yókákí mpási míngi sé mpámba ? Eli­ngákí ézala mpámba sôló.

3:5  Nzámbe óyo apésí bínó Elímo mpé azalí kosála makamwísi o ntéi ya bínó, akosálaka bôngó mpô botósí Mobéko, tǒ mpô boyókí matéya mpé boyambí ?

3:6  Ekomámí bôngó o Minkandá Misántu : Abaráma ayambí Nzámbe, yangó wâná Nzámbe atálí yě lokóla moto wa bosémbo.

3:7  Bôngó, bóyéba ’te baye bakoyambaka Nzámbe bazalí bána ba sôló ba Abaráma.

3:8  Utá kala Nzámbe asílí koyébisa o Minkandá Misántu ’te akokómisa bapagáno bato ba bosémbo mpô ya boyambi bwa bangó ; yangó wâná asangélí Abaráma nsango elámu eye : Bato ba bikólo bínso bakozwa bolámu mpô ya yǒ.

3:9  Bôngó, bato bakoyambaka bakozwa bolámu elongó na Abaráma, moto wa boyambi.

3:10  Kasi bato bánso bakolukaka sé kotósa Mobéko, bangó bánso bakozwa bobé ; sôló, ekomámí bôngó : Mabé mákwêla moto óyo akotósa mpé akokokisa mibéko mínso té, miye mikómámí o búku ya Mobéko.

3:11  Ntembe té, moto mǒkó té akokóma na bosémbo o míso ma Nzámbe mpô atósí Mobéko, zambí moto akómí na bosémbo mpô ya boyambi akozwa bomoi.

3:12  Moto atósí Mobéko asengélí kozala na boyambi té, kasi moto akotósa mibéko miye akozwa bomoi.

3:13  Awa Krístu yě mǒkó andimí kokóma moto óyo batómbélí bobé, asikólí bísó o bobé boye bokwêlákí bísó mpô ya Mobéko, mpô ekomámí ’te : Moto batingísí o nzeté, bató­mbélí yě bobé.

3:14  Esálémí bôngó mpô ’te, mpô ya Yézu Krístu, bapagáno bázwa bobenisi boye Abaráma azwáká, mpé bísó, mpô ya boyambi, tókúla Elímo óyo Nzámbe alakélákí.

3:15  Bandeko, tíká nápésa ndakisa ya makambo ma bísó bato : Sókó moto asílí akomá monkandá mpô ya kotíkela bána ba yě bilóko bǒ esengélí, moto mǒkó té akokí koboma tǒ kobóngola mwangó, atâ mozalí sé monkandá mokomámí na bato.

3:16  Nzámbe alakélákí Abaráma mpé libótá lya yě bilakó. Ekomámí té ’te.’na bána ba libótá lya yě ’, lokóla bazalákí míngi, kasi áwa Nzámbe alobákí ‘libótá lya yǒ ’ alakísákí sé moto mǒkó ; moto ôná ndé Krístu.

3:17  Nalingí koloba boye : Mobéko mobimí mibú nkámá ínei na ntúkú ísáto nsima ya monkandá mwa botíkeli bána bilóko, moye Nzámbe asílí akomákí bǒ esengélí ; bôngó Mobéko moye mokokákí koboma monkandá môná té ; mokokákí koboma elakó té eye Nzámbe alakélákí.

3:18  Sókó bato bazwákí bolámu mpô ya Mobéko, mbele bakokákí kozwa bwangó lisúsu mpô ya elakó té. Nzókandé Nzámbe apésákí Abaráma bolámu mpô ya elakó alakélákí yě.

3:19  Bôngó Mobéko mopésámákí ntína níni ? Mobéko moyákí mpô ya kolakisa polélé ’te bato bako­tósaka Nzámbe té. Mobéko mo­se­ngélákí kotíkala kín’o mokolo mwána wa Abaráma akoyâ, óyo Nzámbe alakélákí. Bǎnzelú bapésákí Mobéko o mabóko ma mobé­mbisi, moto azalí káti ya Nzámbe na bato.

3:20  Kasi mobémbisi asengélí kozala té sókó moto mosúsu azalí té ; áwa mpé Nzámbe azalí sé yě mǒ­kó.

3:21  Bôngó tóloba ’te Mobéko moyókání na bilakó té ? Sókí moké té ! Sókó ya sôló Mobéko mokokákí kopésa bomoi, mbele baye bakotósaka Mobéko bakómákí bato ba bosémbo o míso ma Nzámbe.

3:22  Kasi o Minkandá Misántu balakísí ’te bato bánso bazalí baómbo ba lisúmu, mpô ’te bato bánso bakoyambaka Yézu Krístu bázwa bolámu boye Nzámbe alakélákí mpô ya boyambi.

3:23  Ntángo toyébákí naíno boyambi bôná té, Mobéko mozalákí kokanga mpé kokéngele bísó ; tozalákí kozila ’te Nzámbe ábimisela bísó boyambi.

3:24  Mobéko mozalákí kokéngele bísó kín’o mokolo Krístu ayéí mpô tókóma bato ba bosémbo o míso ma Nzámbe mpô ya boyambi bwa bísó.

3:25  Kasi áwa tokómí o ntángo ya boyambi, tosengélí lisúsu kotósa mokéngeli té,

3:26  zambí bínó bánso bozalí bána ba Nzámbe, mpô ya boyambi Yézu Krístu.

3:27  Sôló, bínó bánso bokúlí batísimo elongó na Krístu, bokómí na ezalela ya Krístu.

3:28  Awa bínó bánso bokómí sé moto mǒkó o Krístu Yézu, bato bánso bakómí ndéngé yǒ­kó : ná mo-Yúda ná moto wa ekólo esúsu, ná moómbo ná moto wa bo-nsómí, ná mobáli ná mwásí.

3:29  Awa bozalí bato ba Krístu, bozalí mpé bána ba Abaráma mpé bokozwa malámu mánso maye Nzámbe alakélákí.