Kapingamarangi - I Corinthians - 1

1:1  Mai baahi o Paul dela ne-gahi go God i dono hiihai, belee hai tangada agoago-hagau ni Jesus Christ, mo mai baahi tadau duaahina go Sosthenes.

1:2  Ang-gi di nohongo-dabu a God i Corinth, mo ang-gi digau huogodoo ala guu-gahi belee hai nia dama dabuaahia a God, ala guu-hai nia dama ni Mee i-di nadau buni-anga gi Jesus Christ, mo nia daangada huogodoo ala e-noho i-nia gowaa huogodoo, ala e-daumaha ang-gi Jesus Christ, go di-nadau Dagi mo tadau Dagi.

1:3  God tadau Damana mo Jesus Christ tadau Dagi gi-dugu-adu gi goodou tumaalia mo-di noho i-di aumaalia.

1:4  Au e-danggee ang-gi God i-nia madagoaa huogodoo i goodou, i Mee dela ne-dugu-adu gi goodou tumaalia mai i Jesus Christ.

1:5  I di-godou buni-anga gi Christ, goodou gu-maluagina i-nia mee huogodoo, dalia di hai-agoago mo-di kabemee.

1:6  Di haga-modongoohia i-di hai o Christ gu-mau-dangihi i godou baahi,

1:7  ga-hidi-mai goodou, gaa-kae nia hagahumalia huogodoo mai God, i di-godou noho talitali di gila-mai tadau Dagi go Jesus Christ.

1:8  Go Mee dela e-daahi-maaloo goodou gaa-dae-loo gi-di hagaodi, bolo gi-de-gila-aga-hua dahi huaidu i godou baahi i-di Laangi o tadau Dagi Jesus Christ.

1:9  Gi-hagadagadagagee gi God, go di God manawa-dahi dela ne-gahi goodou gi-buni-anga gi dana Dama go Jesus Christ, tadau Dagi.

1:10  I-di ingoo o tadau Dagi go Jesus Christ, au e-dangi-adu hagamahi gi goodou huogodoo, ogu duaahina-nei, bolo goodou huogodoo gi-buni-anga gi telekai e-dahi, gi-hudee dumaalia gi tee-buni gi-gila-aga i godou baahi, gei gi-hagadaubuni i godou mehanga i-di hagamaanadu hua e-dahi mo-di hagabaubau e-dahi.

1:11  Au gu-iloo-eau mai baahi hunu gau i-di hale o Chloe, bolo goodou e-lagalagamaaloo i godou mehanga.

1:12  Au ga-helekai-adu beenei: Goodou e-helekai geegee, tangada e-helekai, “Au e-daudali a Paul”, tangada e-helekai, “Au e-daudali a Apollos”, tangada e-helekai, “Au e-daudali a Peter”, gei tangada e-helekai bolo ia e-daudalia a Christ.

1:13  Christ la-gu-waewae i-nia hagabuulinga! Ma go Paul dela ne-daudau i-di loobuu belee haga-mouli goodou? Goodou ne-babdais gi-di ingoo o Paul?

1:14  Au e-danggee ang-gi God, au digi babdais dagu dangada i goodou, i-daha mo Crispus mo Gaius.

1:15  Tangada e-mee di-helekai ai bolo goodou ne-babdais gi dogu ingoo.

1:16  (E-donu, au gu-babdais labelaa Stephanas mo digau o dono hale, gei au digi langahia bolo au gu-babdais labelaa dagu dangada i-golo.)

1:17  Christ hagalee ne-hagau-mai au belee babdais agu daangada. Mee ne-hagau-mai au belee agoago di Longo-Humalia, hagalee belee agoago mai i-di kabemee o-nia daangada, gi-de-haga-balumee-hua di mogobuna di loobuu o Christ.

1:18  Idimaa, nnelekai o-di made o Christ i-hongo di loobuu la di mee balumee i-baahi digau ala bolo e-nngala. Gei i-baahi gidaadou ala bolo e-hagamouli, nnelekai aanei la nia mogobuna-hua ni God.

1:19  Di Beebaa-Dabu e-helekai boloo, “Au e-hagahuaidu di iloo-mee o digau kabemee, gei Au e-dugu gi-daha di kabemee o digau ala e-iloo nia mee.”

1:20  Malaa, aahee digau kabemee? Be go digau ala gu-maalama? Be go digau ala e-dohu di haga-modongoohia-aga di iloo di mogobuna o henuailala? God gu-haga-modongoohia-aga bolo di kabemee o henuailala la-di balumee-hua!

1:21  Idimaa, mai i-dono iloo, God guu-hai nia daangada gi-deemee di-modongoohia Ia mai i-nadau iloo donu. God guu-hai bolo Ia e-haga-mouli-hua digau ala e-hagadonu di Longo-Humalia dela e-haga-balumee go digau huaidu.

1:22  Digau o Jew e-hiihai e-mmada gi-nia mogobuna ga-hagadonu-laa, gei digau o Greece e-halahala di kabemee.

1:23  Gei gimaadou e-agoago-hua i-di hai o Christ dela ne-daudau i-di loobuu. Di longo deenei la dela di mee e-hagawelewele huoloo ginai digau o Jew, gei digau tuadimee hogi e-haga-balumee di-maa.

1:24  Gei i-baahi digau ala guu-gahi go God, digau o Jew mo digau tuadimee, nia helekai aanei i-di hai o Christ la-go di mogobuna o God mo-di iloo-mee a God.

1:25  Idimaa, te-kabemee a God le koia e-kabemee i-di iloo tangada, gei di bagege o God le koia e-maaloo i-nia mahi o tangada.

1:26  Ogu duaahina-nei, goodou gi-langahia godou mouli i-di madagoaa a God ne-gahi-mai goodou: digau hua dulii i godou lodo nogo kabemee, be nogo mogobuna, be nogo aamua i-di hai o henuailala.

1:27  God gu-hili-aga digau dee-kabemee i henuailala, belee hagatee digau kabemee, gei gu-hili-aga digau paagege i henuailala, belee hagatee digau ala e-maaloo.

1:28  Gei Mee gu-hili-aga labelaa digau ala e-balumee i-di hai o henuailala, mo digau huaidu, mo digau hagaloale, belee hagahuaidu-ai digau hagalabagau.

1:29  Malaa, di mee deenei gu-modongoohia bolo ma deai tangada e-hagapuu i-mua o God ai.

1:30  Deelaa di mee a God ne-hila-adu ai gi goodou, bolo goodou e-hai nia dama ni-aana mai i-di godou buni-anga gi Jesus Christ. Gei God guu-hai a Christ di iloo-mee ni gidaadou, gei gidaadou guu-donu i-mua o God mai i Christ, gei guu-hai digau dabu ni God, gei gu-dagaloaha.

1:31  Di Beebaa-Dabu e-helekai, “Maa iai tangada bolo ia e-hagapuu i dahi mee, gi-hagapuu i-nia mee a Dimaadua ne-hai.”