Kapingamarangi - I Corinthians - 14

14:1  Ma go di aloho dela belee hagamahi ginai goodou. Gi-haamanawa i-nia wanga-dehuia o-di Hagataalunga, kaedahi la-go di hagadele nnelekai kokohp a God.

14:2  Digau ala e-helekai i-nia helekai henua-gee, la-hagalee helekai gi-nia daangada, gei e-helekai hua ang-gi God, idimaa, ma tangada e-iloo-ia nia helekai digaula ai. Go di Hagataalunga dela ne-haga-helekai a-mee gi-nia mee ala e-de-iloo nia daangada.

14:3  Gei digau ala e-hagadele nnelekai kokohp a God, le e-hagi ang-gi nia daangada, belee hagahumalia ge e-haga-manawa-maaloo ge e-haga-tenetene digaula.

14:4  Digau ala e-leelee i-nia helekai henua-gee, le e-hagamaamaa-hua ginaadou. Gei digau ala e-hagadele nnelekai a God, le e-hagamaaloo di nohongo-dabu hagatau.

14:5  Au bolo goodou huogodoo gii-mee di-helehelekai i-nia helekai henua-gee, gei di mee dela koia e-humalia la-go goodou gi-hagadele nia helekai kokohp a God. Idimaa, tangada dela e-hagadele nnelekai a God, la-koia e-aamua i tangada dela e-leelee i-nia hagadilinga helekai henua-gee, go di-maa hua be tangada i-golo e-mee di-hagamodongoohia nia helekai tangada dela ne-helekai-ai, e-hagamaaloo di nohongo-dabu hagatau.

14:6  Ogu duaahina-nei, dogu hanadu gi godou baahi la dono hadinga-aha maa au ga-helehelekai hua i nnelekai henua-gee? Hagalee, be-di-maa koau hua ga-gowadu gi goodou nia hagamodongoohia mai baahi o God, be nia iloo helekai Beebaa Dabu, be nia helekai agoago.

14:7  E-hai gadoo be nia mee hai-daahili nadau mouli ai, be-di mee ngiingii mo-di ‘harp’. Maa nia lee o-nia maa ga-hagalee tongaadahi, dehee di hai o tangada ga-iloo-ia be di-maa di lee daahili behee dela e-hai go nia mee aanei?

14:8  Di labaa-dauwa ma-ga-ili de-modongoohia dono lee, malaa koai dela e-mee di-hagatogomaalia ia gi tauwa?

14:9  E-hai gadoo be goodou ma-ga-leelee i-nia helekai henua-gee, gei hagalee haga-donu gii-donu humalia, malaa koai dela ga-iloo-ia? Malaa godou helekai ala e-hai, le e-leelee-hua balumee.

14:10  Nia hagadilinga helekai e-logowaahee i henuailala, gei nia helekai huogodoo la ono hadinga i-golo.

14:11  Maa au ga-de-iloo nnelekai henua ala ne-helekai-ai, digau ala ne-helekai nia maa guu-hai digau henua-gee ni-aagu, gei au hogi guu-hai tangada henua-gee ni digaula.

14:12  Idimaa goodou e-hagamahi e-hai-mee gi-nia wanga-dehuia mai di Hagataalunga, goodou hagamahi laa-hongo nia mee huogodoo ala i-golo e-hai-hegau gi-nia wanga-dehuia ala e-hagamaaloo di nohongo-dabu.

14:13  Maa tangada e-helekai i-nia helekai henua-gee, geia gi-dalodalo i-di hagamaamaa bolo gii-mee di-hagamodongoohia ana helekai.

14:14  Maa au ga-dalodalo i-nia helekai henua-gee, go dogu hagataalunga la-hua ne-dalodalo, gei agu maanadu la hagalee i-golo.

14:15  Dehee-laa dagu mee gaa-hai? Au ga-dalodalo i dogu hagataalunga, gei au ga-dalodalo labelaa i agu maanadu. Au ga-daahili i dogu hagataalunga, gei au ga-daahili labelaa i agu maanadu.

14:16  Ma go do hagataalunga la-hua dela e-danggee ang-gi God, gei digau ala i-golo le e-hai bolo “Amen” behee gi dau dalodalo danggee? Idimaa, digaula e-de-iloo au helekai.

14:17  Ma e-aha maa dau dalodalo hagaamu a God le e-humalia, gei hagalee hagamaamaa digau ala i-golo.

14:18  Au e-danggee ang-gi God i dogu mada iloo-eau i-goodou huogodoo di-leelee i-nia helekai henua-gee.

14:19  I-lodo taumaha gei au gu-hiihai huoloo bolo au e-helekai-hua i-nia bida-helekai e-lima, ala koia e-donu ginai nia daangada i-lodo agu agoago, laa-hongo nia bida-helekai e-mana-(1,000) e-logo, i-nia helekai henua-gee.

14:20  Ogu duaahina-nei, godou hagamaanadu gi-hudee heia be nia maanadu dama. Goodou gi-heia-hua goodou be nia dama-lligi i-nia mee huaidu. Gei godou hagamaanadu gi-heia be nia hagamaanadu daangada gu-mmaadua.

14:21  I-lodo di Beebaa-Dabu la-guu-hihi boloo, “Dimaadua ga-helekai boloo, ‘Au ga-helekai gi agu daangada aanei i-nia helekai henua-gee. Gei-Au ga-helekai gi digaula mai i-lodo nia malau-ngudu o digau nnenua mai i-daha, gei agu daangada ga-hagalee hagalongo-mai gi-di-Au.’ ”

14:22  Di wanga-dehuia o di helehelekai henua-gee, lago di haga-modongoohia ang-gi digau de-hagadonu, hagalee digau hagadonu. Gei di hagadele nnelekai kokohp a God, la di haga-modongoohia ang-gi digau hagadonu, hagalee digau de-hagadonu.

14:23  Maa di nohongo-dabu ga-dagabuli gi-di gowaa e-dahi, ga-daamada ga-helehelekai i-nia helekai henua-gee, gei nia daangada ala digi longono di agoago be digau e-de-hagadonu ga-ulu-mai, digaula ga-hagalee helekai bolo goodou huogodoo e-boiboi?

14:24  Gei di-maa huogodoo ga-helekai i-nia helekai kokohp a God, gei tangada dela dono hagadonu ai, be tangada dela digi longono di agoago, ma-ga-ulu-mai ga-modongoohia ang-gi deia i ono huaidu, mai i ana mee huogodoo ala ne-longono. Geia ga-hagi-aga gi ana mee huogodoo ala ne-longono-ia,

14:25  gei ana hagamaanadu nngala ala i ono lodo, la-ga-modongoohia-aga, geia ga-dogoduli gi-lala, gaa-bala ga-daumaha gi God, ga-helekai boloo, “E-donu bolo God le e-noho i godou lodo.”

14:26  Ogu duaahina-nei, deenei di mee e-helekai-iei au, goodou ma-ga-dagabuli-mai belee hai-daumaha, tangada e-daahili, tangada e-agoago, tangada e-hagadele nnelekai kokohp mai baahi o God, gei tangada e-helekai i nnelekai henua-gee, gei tangada e-haga-modongoohia nia helekai ne-helekai-ai. Malaa, nia mee huogodoo aanei e-hai belee hagamaaloo di nohongo-dabu.

14:27  Maa tangada ga-helekai i-nia helekai henua-gee, dogolua be hagalee gi dogologo baahi nua dogodolu e-hagadau dagidahi e-helekai, gei tangada i-golo labelaa e-hai loo gi-hagamodongoohia nia helekai ala ne-helekai-ai.

14:28  Maa tangada e-haga-modongoohia nnelekai ai, malaa tangada dela e-helehelekai nia helekai henua-gee, la-gii-noho hua dee-muu, gii bida helekai-hua ang-gi deia mo ang-gi God.

14:29  Nia daangada dogolua be dogodolu i-digau ala ne-kae nadau helekai kokohp mai baahi o God, la-gii-hai nadau agoago, gei digau ala i-golo gi-hagadina-ina be digaula ne-helekai bolo-aha.

14:30  Maa tangada e-noho i-lodo di hale-daumaha, guu-kae nia helekai mai baahi o God, gei tangada dela e-agoago la-gii-lawa, gii-noho dee-muu.

14:31  Goodou huogodoo e-mee di-hagadele nia helekai a God, hagadau dagidahi, bolo huogodoo gii-donu ginai gii-kae nadau hagamaamaa.

14:32  Di wanga-dehuia o di hagadele nia helekai a God le e-huwahuwa go tangada dela e-agoago nia maa.

14:33  Idimaa, God la-hagalee hiihai gidaadou gii-noho i-lodo di hinihini, gei gii-noho hagadau-buni mo i-di aumaalia. I-lodo nia nohongo-dabu huogodoo o-nia dama a God,

14:34  nia ahina gii-noho deemuu i-lodo nia miiting dagabuli o-nia nohongo-dabu. Digaula hagalee dumaalia ginai gi-helekai, gii-hai be nnaganoho o digau o Jew bolo digaula hagalee dagi.

14:35  Maa digaula e-hiihai gi-iloo, gi-heeu-ina gi nadau lodo i-di hale, idimaa, e-haga-langaadia go di ahina ma-ga-helekai i-lodo tagabuli di nohongo-dabu.

14:36  Nia helekai a God la-ne-daamada-mai i godou baahi, be ne-gowadu-hua gi goodou?

14:37  Maa iai tangada gu-hagamaanadu bolo ia tangada kae-hegau ni God, be tangada guu-kae di wanga-dehuia o-di Hagataalunga-Dabu, mee gii-donu ginai bolo nia mee ala guu-lawa dagu hihi-adu gi goodou, la nia haganoho ni Tagi.

14:38  Maa mee ga-haga-de-iloo-ia nia helekai aanei, goodou haga-de-iloo-ina a-mee.

14:39  Ogu duaahina-nei, goodou gi-haga-dahidamee-ina, hagadele-ina nia helekai kokohp a God, gei goodou hudee bule-ina nia helehelekai henua-gee.

14:40  Nia mee huogodoo e-hai gii-lawa i-di ala e-tau-anga, gei e-haga-noho gi-humalia.