LinVB - II Kings - 24

24:1  O mikolo mina Nabukodonozor, mokonzi wa Babilon, akei kobunda etumba. Yoyakim akomi moombo wa ye mibu misato, kasi na nsima atomboki na ye.

24:2  Yawe atindi basoda ba Kaldea, ba Aram, ba Moab mpe ba Amon bakende kobunda na Yoyakim ; atindi bango basilisa mokili mwa Yuda se lokola Yawe alobaki na monoko mwa baprofeta.

24:3  Yawe moto atindi ’te makambo maye makwela Yuda mpo ’te alongola bato ba Yuda o miso ma ye, mpo ya masumu ma Manase, mpo ya mabe manso asalaki,

24:4  zambi abomaki bato bazalaki na likambo te mpe atondisaki Yeruzalem na makila ma bango ; Yawe alimbisaki yango te.

24:5  Makambo masusu ma Yoyakim, misala minso asalaki, manso makomami o buku ya Bikela bya bakonzi ba Yuda.

24:6  Yoyakim akei kokutana na bankoko ba ye. Mwana wa ye Yoyakin akitani ye.

24:7  Mokonzi wa Ezipeti alongwi lisusu o mokili mwa ye te, zambi mokonzi wa Babilon abotoloki mokili mobimba mozalaki mwa mokonzi wa Ezipeti, banda moluka mwa Ezipeti tee ebale Efrate.

24:8  Yoyakin akokisi mibu zomi na mwambe ntango akomi mokonzi ; ayangeli ekolo sanza isato o Yeruzalem. Nkombo ya mama wa ye Nekusta, mwana wa Elnatan, moto wa Yeruzalem.

24:9  Asali mabe o miso ma Yawe se lokola tata wa ye asalaki.

24:10  O ntango ena bato ba Nabukodonozor, mokonzi wa Babilon, bakei kobundisa Yeruzalem mpe basoda ba ye bazingi mboka.

24:11  Nabukodonosor mokonzi wa Babilon, ye moko mpe akomi kuna ntango basoda ba ye bazingi mboka.

24:12  Yoyakin, mokonzi wa Yuda akei kokutana na mokonzi wa Babilon, ye na mama wa ye, na bakomanda, elongo na bankumu na bake­ngeli ba lopango la ye ; kasi mokonzi wa Babilon akangi bango o boloko. Ezalaki o mobu mwa mwambe mwa bokonzi bwa ye.

24:13  Nabukodonosor abotoli biloko bi­nso bya motuya bizalaki o Tempelo ya Yawe, na mpe biloko binso bizalaki o ndako ya mokonzi ; abuki biloko binso bya wolo Salomo mokonzi wa Israel asalaki mpo ya Tempelo ya Yawe, se lokola Yawe alobaki.

24:14  Na nsima akei na bato banso ba Yeruzalem, na bankumu na basoda, bato nkoto zomi, na batuli na bato bakosalaka mafungola ; atiki bobele babola.

24:15  Aka­mbi Yoyakin o Babilon, akei mpe na mama wa ye, bakengeli ba lopango na bankumu ba ekolo o Babilon, bazala baombo.

24:16  Bato banene banso nkoto nsambo, batuli na bato bakosalaka mafungola nkoto yoko, banso bayebi kobunda bitumba, akei na ba­ngo o mboka ya ye, bazala baombo o Babilon.

24:17  Mokonzi wa Babilon atii Matania, noko wa Yoyakin, mokonzi wa sika o esika ya ye mpe abongoli nkombo ya ye, apesi ye nkombo esusu : Sedekia.

24:18  Sedekia akokisi mibu ntuku ibale na moko ntango akomi mokonzi ; ayangeli ekolo mibu zomi na moko o Yeruzalem. Nkombo ya mama wa ye Kamital, mwana wa Yirmeya, moto wa Libna.

24:19  Asali mabe o miso ma Yawe, se lokola Yoyakim.

24:20  Makambo mana makweli Yeruzalem na Yuda, zambi Yawe ayoki nkanda ; yango wana abwaki bango mosika na miso ma ye. Sedekia ato­mboki na mokonzi wa Babilon.