Kapingamarangi - Joel - 2

2:1  Goodou ilihia nia buu la i-hongo Zion, dela go di gonduu haga-madagu o Dimaadua. Goodou go digau Judah, polepole, idimaa, di Laangi o Dimaadua la-gu-hoohoo-mai.

2:2  Di laangi deelaa la-ga-bouli dongoeho ge haga-manawa-gee, e-luuli ge gabugabua. Nia manu-‘locust’ logowaahee ala e-hai gadoo be digau-dauwa le e-lloomoi. Di lloomoi digaula e-hai gadoo be-di bouli dela e-gahu nia gonduu. Deai di mee ne-hai beenei ai, ge hagalee hai labelaa nomuli.

2:3  Digaula e-gai nia laagau e-hai gadoo be-di ahi e-dudu nia maa. Di gowaa dela i-mua digaula e-hai gadoo be-di hadagee Eden, gei di gowaa dela i-muli digaula guu-hai gadoo be-di anggowaa, deai di mee e-mouli i-golo ai. Deai di mee e-dugu go digaula mouli ai.

2:4  Digaula e-hai gadoo be nia hoodo, e-llele gadoo be nia hoodo hai-dauwa.

2:5  Nia lee digaula ma-ga-hobohobo i-hongo nia gonduu, le e-hai-gadoo be nia waga dauwa hongo-henua, e-hai gadoo be nia lee o-nia geinga ma-gaa-wwele. Digaula e-goolongo gadoo be-di buini-dauwa e-hagatogomaalia gi tauwa.

2:6  Nia daangada huogodoo gu-mmaadagu huoloo gi-di mmaanege-mai o-nia manu aalaa. Nia golomada digaula gu-hadu-kene.

2:7  Digaula e-heebagi be nia gau dauwa, e-gakaga di gili nia abaaba gadoo be nia gau-dauwa. Digaula huogodoo e-hula haga-huudonu, hagalee hula-gee.

2:8  Deai di lamu e-haga-deaadee di lamu i-golo ai. Digaula e-lloo-adu-hua e-oho nia mee ala e-abaaba digaula, deai di mee e-mee di duuli digaula ai.

2:9  Digaula e-llele gi-di waahale, e-lellele i-hongo nia abaaba di waahale, e-kaga gi-hongo nia hale, ge e-ulu gi-lodo nia bontai lligi gadoo be nia gau gaiaa.

2:10  Henuailala e-ngalungalua i-mua i nadau lloomoi, mo digau i-lala di langi e-polepole hogi. Di laa mo-di malama gu-bouli, gei nia heduu gu-nadau madamada-ai.

2:11  Di lee o Dimaadua e-ngoloolo i-dana helekai gi ana gau hai-heebagi. Gei-ogo digau-dauwa ala e-hagalongo gi Mee la digau dogologo gei e-maaloo. Di laangi hagamadagudagu dangada go di Laangi o Dimaadua! Koai dela e-mee di-tanga gi-daha?

2:12  Dimaadua ga-helekai, “Dolomeenei, goodou gii-huli hoou donu. Lloomoi gi-di-Au, i-lodo godou haga-onge, tangitangi mo-di manawa-gee.

2:13  Godou lodo-huaidu la-gi-haga-modongoohia-aga godou manawa-gee. Di-godou hahaahi godou gahu la hagalee dohu.” Goodou huli gi-muli gi Dimaadua di-godou God. Ma go Mee dela e-honu i-di aloho mo tumaalia. Mee e-hila gi-lala hagakono di manawa, ge e-daahi ana hagababa. Nia madagoaa huogodoo, gei Mee e-haga-togomaalia e-dumaalia, hagalee hagaduadua.

2:14  Holongo Dimaadua go di-godou God, gaa-huli dono manawa, ga-hagahumalia goodou gi-nia huwa-laagau e-logo. Gei goodou gaa-mee-laa di hai godou tigidaumaha gi-nia huwa-laagau mono waini.

2:15  Ilihia godou buu i tomo di Gonduu Zion. Haga-dagabuli-ina mai digau huogodoo e-daumaha ge haga-onge.

2:16  Haga-dagabuli-ina mai nia daangada huogodoo gi-di gowaa e-dahi, hagatogomaalia-ina digaula ang-gi tagabuli dabu. Laha-mai digau mmaadua, haga-dagabuli-ina mai nia damagiigi mo nia dama ala lligi-loo. Digau ala dogo haga-hai-lodo hoou la-gi-lloomoi gi-daha mo nadau hale labelaa, ge e-lloomoi gi-di gowaa deenei.

2:17  Digau hai-mee-dabu ala e-daumaha gi Dimaadua i-mehanga di gowaa dudu-tigidaumaha mo-di bontai di Hale Daumaha, digaula gi-tangi mo-di dalodalo boloo, “Meenei Dimaadua, Goe manawa-dumaalia gi au daangada aanei. Goe hudee dumaalia gi-nia guongo ala i-golo gi-hagahuaidu-ina gimaadou gi nadau kai dela boloo, ‘Di-godou God la-i-hee?’ ”

2:18  Dimaadua ga-haga-modongoohia dono dumaalia gi dono henua, ga-aloho i ana daangada.

2:19  Gei Mee ga-helekai gi digaula, “Dolomeenei, gei Au ga-gowadu gi goodou nia huwa-laagau, mono waini, mono lolo-olib, gei goodou ga-maaluu i-nia maa. Digau o-nia guongo ala i-golo ga-hagalee haga-balumee goodou.

2:20  Au ga-daa gi-daha di buini-‘locust’ dela ne-lloomoi i-bahi-i-ngeia, ga-hagau hunu gau i digaula gi-lodo di anggowaa. Di buini mugi-mua e-hagau gi-di Tai-Mmade, gei di buini dono dua e-hagau gi-lodo di Tai go Mediterranean. Nnuaidina mmade digaula ga-bilau huoloo. Malaa, Au gaa-oho digaula gi-daha, i nadau hai huogodoo ala ne-hai-adu gi goodou.

2:21  “Goodou go nia hadagee, goodou hudee mmaadagu, goodou tenetene mo-di manawa lamalia, i-nia mee huogodoo o Dimaadua ala ne-hai-adu gi goodou.

2:22  “Goodou go nia manu, goodou hudee mmaadagu, idimaa, nia geinga la-gu-halatee, nia laagau la-guu-huwa, gu-logowaahee nia huwa-‘fig’ mono ‘grape’.

2:23  “Goodou go digau Zion, goodou manawa lamalia, goodou tenetene gi-nia mee ala ne-hai go Dimaadua di-godou God adu gi goodou. Mee guu-hai dana uwa gii-doo gii-dohu i-di madagoaa dela e-hadi, gu-haga-doo labelaa dana uwa i-di madagoaa magalillili, mo-di madagoaa welengina, be nnolongo i-mua.

2:24  Nia gowaa haga-madammaa huwa-laagau la-ga-hontula i-nia huwa-laagau! Nia bongoo ala i daalinga nia gowaa dagadagahi huwa-laagau gaa-honu waini mono lolo-olib.

2:25  Au ga-gowadu gi goodou labelaa nia mee ala ne-hagalee i godou baahi i-nia ngadau ala ne-gai godou huwa-laagau go nia ‘locust’, idimaa, ma ko-Au dela ne-hagau-adu di buini deenei e-hai-baahi adu gi goodou.

2:26  Dolomeenei, gei di-godou haga-ngudu la-guu-dohu, gei goodou ga-maaluu. Goodou ga-hagaamu Dimaadua di-godou God dela ne-hai ana mogobuna haga-goboina adu gi goodou. Agu daangada hagalee hai gi-langaadia labelaa.

2:27  “Goodou, go digau Israel, goodou ga-iloo-laa bolo Au dela e-noho i godou mehanga, gei Au, go Dimaadua, dela go di-godou God, ge deai di god i-golo ai. Agu daangada hagalee hai gi-langaadia labelaa.

2:28  “I-muli nia mee aanei, gei Au ga-llingi-iha dogu Hagataalunga gi-hongo nia daangada huogodoo. Godou dama-daane mono dama-ahina ga-hagadele agu helekai. Godou gau mmaadua gaa-hai nadau midi, ge godou dama-daane mo dama-ahina gaa-hai nadau moe.

2:29  Di madagoaa hua deelaa, gei Au ga-llingi-iha dogu Hagataalunga labelaa gi-hongo digau hai-hegau, nia daane mo nia ahina.

2:30  “Au gaa-hai agu hagailongo haga-goboina i-di langi i-nua mo i-hongo henuailala. Nia dodo mo-di ahi, mo-di huiahi damanaiee gadoo be nia gololangi ga-kila-aga.

2:31  Di laa ga-bouli dongoeho, ge di malama gaa-huli gaa-mmee be nia dodo i-mua di-dau-mai o-di laangi aamua ge hagamadagudagu-dangada o Dimaadua.

2:32  Gei digau huogodoo ala ma-ga-tangi-anga i-di ingoo o Dimaadua le e-haga-mouli. Gii-hai be nia helekai a Dimaadua ala ne-hai boloo, ‘Hunu gau i-hongo di Gonduu Zion mo i-lodo o Jerusalem ga-dagaloaha, go digau ala e-hili ko-Au le e-haga-mouli.’ ”