Kapingamarangi - John - 17

17:1  I-muli ana helekai aanei, Jesus gaa-mmada gi-di langi, ga-helekai, “Tamana, di madagoaa gu-dau-mai. Haga-uda-ina di madamada gi Tama, gei Tama ga-haga-madamada Goe.

17:2  I do haga-uda ang-gi de-Ia di mogobuna e-dagi nia daangada huogodoo, bolo gii-mee-ai dana wanga di mouli dee-odi gi digau huogodoo ala ne-wanga Kooe gi-de-Ia.

17:3  Gei di mouli e-dee-odi, dono hadinga e-hai bolo gi-iloo-ginaadou Goe, go di God e-donu hua e-dahi, gi-iloo labelaa Jesus Christ dela ne-hagau-mai Kooe.

17:4  Au gu-haga-modongoohia do madamada gi henuailala. Au gu-haga-lawa dagu hegau dela ne-gaamai Kooe bolo gi heia.

17:5  Tamana! Haga-madamada-ina Au i-mua o hadumada dolomeenei, gi-di madamada dela nogo i dogu baahi i-mua henuailala ne-hai.

17:6  “Au gu-haga-modongoohia Goe gi au daangada ala ne-gaamai Koe gi-di-Au i henuailala. Nia daangada ni-aau, gei Goe ne-dugu-mai digaula gi-di-Au. Digaula gu-daudali au helekai,

17:7  gei dolomeenei digaula gu-iloo bolo nia mee huogodoo ala ne-gaamai Kooe, la-ne-lloomoi i do baahi.

17:8  Au guu-wanga gi digaula nia agoago ala ne-gaamai Kooe gi-di-Au, gei digaula guu-kae nia maa. Digaula gu-iloo bolo ma e-donu bolo Au ne-hanimoi i do baahi, gei gu-hagadonu bolo Goe ne-hagau-mai Au.

17:9  “Au e-dalodalo i digaula. Au hagalee dalodalo i digau henuailala hagatau, gei Au e-dalodalo-hua i digau ala ne-gaamai Kooe gi-di-Au, i digaula nia dama ni-aau.

17:10  Agu mee huogodoo nia mee ni-aau, gei au mee huogodoo la nia mee ni-aagu. Gei dogu madamada gu-modongoohia-aga mai i nadau baahi.

17:11  Dolomeenei, gei Au ga-hanadu gi-di-Goe. Au ga-hagalee noho i henuailala, gei digaula e-noho i henuailala. Meenei dogu Damana Dabu! Benabena-ina digaula i-nia mahi o do ingoo, di ingoo dela ne-gaamai Kooe gi-di-Au, gii-hai digaula gii-dahi, gadoo be Goe mo Au ala e-dahi.

17:12  Dogu madagoaa nogo i-baahi digaula, Au nogo benebene digaula i-nia mahi o do ingoo, go di ingoo dela ne-gaamai Kooe gi-di-Au. Au nogo madamada humalia i digaula, tangada digaula ne-ngala ai, dela hua go tangada dela gu-haga-ingoo bolo e-ngala, gii-donu-ai nia helekai o-di Beebaa-Dabu.

17:13  Dolomeenei gei Au ga-hanadu, gei Au e-helekai nia mee aanei i henuailala, bolo gii-honu dogu tene i-lodo nadau manawa.

17:14  Au guu-wanga gi digaula au agoago, gei digau henuailala e-de-hiihai gi digaula, idimaa, ma digaula la-hagalee digau ni henuailala, gadoo be Au dela hagalee tangada ni henuailala.

17:15  Au hagalee dangi-adu bolo Goe gi-daawa digaula gi-daha mo henuailala, gei Au e-dangi-adu bolo Goe gi-benabena-ina digaula gi-daha mo tangada haga-magiaa.

17:16  Digaula hagalee digau ni henuailala, gadoo be Au dela hagalee tangada ni henuailala.

17:17  Hagadabu-ina digaula adu gi-di-Goe gi-di tonu. Au helekai la-go di tonu.

17:18  Au ne-hagau digaula gi-lodo henuailala, gadoo be dau hagau-mai Au gi-lodo henuailala.

17:19  Au e-hagadabu Au adu gi-di-Goe i digaula, bolo gii-donu di hagadabu digaula adu gi-di-Goe.

17:20  “Au hagalee dalodalo-hua i agu dama agoago, gei Au e-dalodalo labelaa i digau ala e-hagadonu Au mai nadau agoago.

17:21  Au e-dalodalo i-digaula huogodoo gii-hai be di-mee e-dahi. Meenei Tamana, digaula belee hai gii-noho i-tau lodo, be Goe dela i ogu lodo, gei Au i oo lodo. Digaula belee hai gii-hai be di mee e-dahi, gei digau henuailala ga-hagadonu bolo ma Kooe dela ne-hagau-mai Au.

17:22  Au ne-wanga gi digaula di madamada dela ne-gaamai Kooe gi-di-Au, bolo gii-hai digaula gii-dahi, be Gidaua ala e-dahi.

17:23  Au i nadau lodo, gei Goe i ogu lodo, gei digaula gi-hai-hua be di mee e-dahi, gii-hai digau henuailala gi-iloo bolo ma Kooe dela ne-hagau-mai Au, ge e-aloho i digaula, be do aloho i-di-Au.

17:24  “Meenei Tamana, Goe ne-dugu-mai digaula gi-di-Au. Au e-hiihai bolo digaula gi-madalia Au i-di gowaa dela e-noho-iei Au, gi-gidee-ginaadou ogu madamada, go nia madamada ala ne-dugu-mai Kooe gi-di-Au, i do aloho i-di-Au i-mua di hai o henuailala.

17:25  “Meenei Tamana dela e-donu, digau henuailala e-de-iloo-e-ginaadou Goe, gei Au e-iloo-e-Au Goe. Gei digau aanei gu-iloo bolo ma Kooe dela ne-hagau-mai Au.

17:26  Au ne-haga-modongoohia-aga Goe gi digaula, gei Au ga-duudagi-hua beelaa, bolo di aloho dela ne-gaamai Kooe gi-di-Au, la-gii-noho i nadau lodo, gei Au gii-noho labelaa i nadau lodo.”