Kapingamarangi - John - 6

6:1  Nomuli, Jesus ga-duu-adu laa-lodo Tai o Galilee (dela e-haga-ingoo bolo Tiberias).

6:2  Dogologowaahee e-daudali a-Mee, i-di nadau gidee ana mee haga-goboina haga-hili digau magi.

6:3  Jesus gaa-hana gi-di gowaa nnoonua, gaa-noho i-baahi ana dama-agoago.

6:4  Tagamiami Pasoobaa la-gu-hoohoo-mai.

6:5  Jesus gaa-mmada gi digau dogologowaahee e-lloomoi gi-de-Ia, gei Mee ga-heeu gi Philip, “Dehee di gowaa e-mee di-hui-mai tadau meegai e-dohu di-haangai nia daangada aanei?”

6:6  Mee ne-helekai beenei belee hagamada Philip. Gei Mee e-iloo-hua dana mee belee hai.

6:7  Philip ga-helekai, “Nia meegai ginigini dee-bau gi digau aanei le-hui gi-nia bahihadu-silber e-logo i-di lua-lau.”

6:8  Tama agoago i-golo dono ingoo go Andrew, tuaahina o Simon Peter, ga-helekai gi Mee,

6:9  “Tama-daane i-ginei ana palaawaa e-lima ge lua iga. Malaa, e-dee-dohu gi-nia daangada huogodoo aanei!”

6:10  Jesus ga-helekai gi digaula, “Haganoho-ina digaula gii-noho gi-lala.” (Di gowaa deelaa e-logo geinga-tolo) Malaa, digau huogodoo guu-noho gi-lala. Nia daane holongo e-lima-mana-(5,000).

6:11  Jesus ga-dahi-aga nia palaawaa, ga-danggee gi God, ga-duwwe gi digaula. Mee gaa-hai nia iga labelaa beelaa, gei digaula huogodoo gu-miami baagawa.

6:12  Di madagoaa digaula ne-maaluu, Mee ga-helekai gi ana dama-agoago, “Hagabudu-ina nia mee ala ne-dubu, hudee hagauwwou-ina.”

6:13  Gei digaula gu-hagabudu nia maa huogodoo, guu-haa nia gada e-madangaholu maa-lua ne-dubu i-nia palaawaa e-lima, ala ne-gai go nia daangada.

6:14  Nia daangada huogodoo ne-gidee nia mee haga-goboina a Jesus ne-hai, ga-helekai, “E-donu huoloo, deenei soukohp dela belee hanimoi gi henuailala!”

6:15  Jesus gu-iloo-Ia bolo digaula ga-lloomoi, ga-huuhuuli Ia gii king, gei Mee gaa-hana labelaa gi-daha modogoia gi-nia gonduu.

6:16  Hiahi-ia di-mee, gei ana dama-agoago ga-lloo-ia gi-di tai,

6:17  gaa-kaga gi-hongo di boodi, gaa-hula laa-lodo di tai gi-muli gi Capernaum. Gu-booia di-mee, gei Jesus digi hanimoi.

6:18  Di madangi guu-gono maaloo, guu-hai di tai gi-bagibagia.

6:19  Nia dama-agoago gu-aalo di-nadau boodi, holongo nia maele e-dolu be e-haa, gaa-mmada gi Jesus e-haele-mai i-hongo tai, gei digaula gu-uli nadau gai, gu-mmaadagu huoloo.

6:20  Jesus ga-helekai, “Goodou hudee mmaadagu, ma ko-Au.”

6:21  Digaula gu-tenetene huoloo gu-haga-uda a-Mee gi-lodo di boodi, gei di boodi guu-dau i-di gowaa dela belee hula ginai digaula.

6:22  Dono daiaa, gei digau dogologowaahee ala nogo noho i tongotai, gu-gidee bolo ma di boodi hua-e-dahi dela nogo i-golo. Digaula gu-iloo, bolo Jesus digi hana dalia ana dama-agoago, digaula ne-hula-hua mada-ginaadou.

6:23  Nia boodi mai Tiberias ga-lloomoi gi tongotai, hoohoo gi-di gowaa digau dogologowaahee nogo gai nadau palaawaa, i-muli-hua Tagi ne-hai dana danggee ang-gi God.

6:24  Di madagoaa digau dogologowaahee ne-gidee bolo Jesus gu-hagalee i-golo mo ana dama-agoago, digaula gaa-kaga gi-nia boodi, gaa-hula gi Capernaum, e-halahala a-Mee.

6:25  Di madagoaa nia daangada ne-gidee a Jesus i-baahi i-golo di tai, digaula ga-helekai gi Mee, “Tangada Agoago, Goe ne-dau i kinei ana-hee?”

6:26  Jesus ga-helekai, “Au e-hagi-adu gi goodou di tonu: Goodou e-halahala Au, i godou maaluu di gai nia palaawaa, gei hagalee i godou modongoohia agu mogobuna.

6:27  Hudee ngalua gi-nia meegai ala e-mee di-mooho. Ngaalua gi-nia meegai ala iai di mouli dono hagaodi ai, ala e-gowadu go Tama-Tangada, idimaa, Tamana go God la-guu-wanga di maaga haga-mogobuna gi-hongo o Mee.”

6:28  Digaula ga-heeu gi Mee, “Gimaadou e-hai di-madau aha, gii-mee-ai gimaadou di-hai nia mee a God ala e-hiihai ginai bolo gi-heia?”

6:29  Jesus ga-helekai, “Di mee a God e-hiihai ginai gi-heia bolo goodou gi-hagadonu-ina dana Dama dela ne-hagau-mai.”

6:30  Digaula ga-heeu, “Di mogobuna behee dela e-hai Kooe gaa-mmada ginai gimaadou, ga-hagadonu Goe? Goe gaa-hai dau-aha?

6:31  Madau maadua-namua ne-gai nadau ‘manna’ i-lodo di anggowaa, be nia helekai di Beebaa-Dabu e-helekai boloo: Mee ne-wanga gi digaula nia palaawaa mai di langi gi-geina.”

6:32  Jesus ga-helekai, “Au e-hagi-adu gi goodou di tonu: Hagalee go Moses dela ne-gowadu gi goodou nia palaawaa mai i-di langi. Ma go dogu Damana dela e-gowadu nia palaawaa donu mai i-di langi.

6:33  Di palaawaa a God dela e-gowadu, la-go Mee dela ne-haneia i-di langi gaa-wanga di mouli gi henuailala.”

6:34  Digaula ga-tangi gi Mee, “Meenei, gaamai di palaawaa deenei i-nia madagoaa huogodoo.”

6:35  Jesus ga-helekai, “Au go di palaawaa haga-mouli. Be koai-hua dela ga-hanimoi gi-di-Au, geia hagalee hiigai. Be koai-hua dela e-hagadonu Au, geia hagalee hieinu.

6:36  Au gu-hagi-adu gi goodou bolo goodou gu-gidee Au, gei digi hagadonu.

6:37  Digau huogodoo ala ga-gaamai go dogu Damana, ga-lloomoi gi-di-Au. Gei-Au hagalee kili digaula gi-daha,

6:38  idimaa Au ne-haneia i-di langi belee hai di hiihai o Mee dela ne-hagau-mai Au, hagalee go dogu hiihai.

6:39  Deenei di hiihai o-Maa dela ne-hagau-mai Au, bolo Au gi-hudee diagia tei dangada i ginaadou ala ne-gaamai go Mee, bolo gi-haga-mouli-ina digaula huogodoo i-di laangi hagaodi.

6:40  Idimaa, di hiihai dogu Damana le e-hai bolo digau huogodoo ala ma-gaa-mmada gi Tama, ga-hagadonu a-Mee, ga-hai-mee gi-di mouli dee-odi. Gei-Au ga-haga-mouli-aga digaula i-di laangi hagaodi.”

6:41  Digau o Jew ga-daamada ga-leelee hagamuhimuhi i Mee, idimaa, Mee ne-helekai boloo, ‘Au go di palaawaa dela ne-haneia i-di langi.’

6:42  Digaula ga-helekai, “Taane deenei go Jesus, la-hagalee go tama-daane a Joseph? Gidaadou e-iloo tamana mo tinana o-Maa. Mee e-helekai behee dela bolo Ia ne-haneia i-di langi?”

6:43  Jesus ga-helekai, “Hudee leelee hagamuhimuhi i godou mehanga.

6:44  Tangada e-mee di-hanimoi gi-di-Au ai, maa Tamana dela ne-hagau-mai Au, digi-dugu-mai a-mee, gei Au ga-haga-mouli-aga a-mee i-di laangi hagaodi.

6:45  Ma-guu-lawa di-hihi-ai nia soukohp boloo, ‘Nia daangada huogodoo le e-kabe nadau mee mai God.’ “Digau huogodoo ala gu-longono, guu-kabe mai Mee, le e-loomoi gi-di-Au.

6:46  “Deenei la-hagalee hai bolo tangada la-guu-mmada gi Tamana. Go Mee mai baahi o God, deelaa-hua go Mee ne-mmada gi Tamana.

6:47  Au e-hagi-adu di tonu: Koai e-hagadonu Au, geia e-hai-mee gi-di mouli dee-odi.

6:48  “Au go di palaawaa o-di mouli.

6:49  Godou maadua-mmaadua nogo gai nadau ‘manna’ i-lodo di anggowaa, gei digaula guu-mmade.

6:50  Deenei di hai o-di palaawaa dela ne-haneia i-di langi: Be koai-hua dela gaa-gai di-maa, geia hagalee made.

6:51  Au go di palaawaa mouli dela ne-haneia i-di langi. Be koai-hua ma-gaa-gai di palaawaa deenei, ia e-mouli gaa-hana-hua beelaa. Di palaawaa dela e-wanga ko-Au gi mee, la-go ogu goneiga bolo gi-mouli-ai henuailala.”

6:52  Deenei di mee ne-hidi-ai digau o Jew ne-daamada ga-lagalagamaaloo i nadau mehanga, ga-heheeu, “Dehee di hai Taane deenei e-mee di-gaamai ono goneiga e-gai go gidaadou?”

6:53  Jesus ga-helekai, “Au e-hagi-adu di tonu: Maa goodou hagalee gai nia goneiga ge hagalee e-inu nia dodo o Tama-Tangada, goodou di-godou mouli ai.

6:54  Be koai-hua dela e-gai ogu goneiga mo e-inu ogu dodo, ia e-hai-mee gi-di mouli dee-odi, gei Au ga-haga-mouli-aga a-mee i-di laangi hagaodi.

6:55  Idimaa, ogu goneiga la-go nia meegai donu, gei ogu dodo la-go nia wai-inu donu.

6:56  Be koai-hua gaa-gai ogu goneiga, ga-inu ogu dodo, ia e-noho i ogu lodo, Au e-noho i ono lodo.

6:57  Tamana dela e-mouli ne-hagau-mai Au, gei Au e-mouli mai i Mee. E-hai gadoo be tangada dela ma-gaa-gai ogu goneiga, ia e-mouli mai i-di-Au.

6:58  Deenei la-go di palaawaa dela ne-haneia i-di langi. Di palaawaa deenei la-hagalee hai be nia palaawaa o godou maadua-mmaadua ne-gai i-mua, nomuli digaula gaa-mmade. Tangada dela gaa-gai di palaawaa deenei, e-mouli gaa-hana-hua beelaa.”

6:59  Jesus ne-hai ana helekai aanei i dono madagoaa nogo agoago i-lodo synagogee i Capernaum.

6:60  Dogologo i ana dama-agoago ne-longono nnelekai aanei, ga-helekai, “Di agoago deenei le e-haingadaa. Ma koai e-mee di-hagalongo gi di-maa?”

6:61  Jesus gu-modongoohia nadau leelee logo, ga-helekai gi digaula, “Nia helekai aanei gu-haga-paagege goodou?

6:62  E-hai behee maa goodou gaa-mmada gi Tama-Tangada ma-gaa-hana gi-nua gi-di gowaa nogo noho-iei Mee i-mua?

6:63  Di Hagataalunga o God dela e-dugu-mai di mouli, gei nia mogobuna dangada le e-balumee. Agu helekai le e-gaamai di Hagataalunga haga-mouli a God.

6:64  Gei hunu goodou hagalee hagadonu.” (Jesus gu-modongoohia-hua mai i-di matagidagi digau ala hagalee hagadonu, mo tangada dela ga-hagi-anga Ia.)

6:65  Gei Mee ga-duudagi-adu boloo, “Deenei tadinga dagu mee ne-hagi-adu gi goodou boloo: Tangada e-mee di-hanimoi gi-di-Au ai, maa Tamana digi dumaalia-anga.”

6:66  Mai i-nia helekai aanei, digau dogologo i digau nogo daudali a Mee guu-huli gi-muli, gu-diiagi a-Mee.

6:67  Gei Jesus ga-helekai gi ana dama-agoago dilongoholu maa-lua, “Gei goodou, goodou e-hiihai e-hula labelaa?”

6:68  Simon Peter ga-helekai gi Mee, “Meenei Tagi, ma koai dela belee hula ginai gimaadou? Nia helekai ala e-iai di mouli dee-odi, la-aalaa-hua i do baahi.

6:69  Gimaadou gu-hagadonu ge gu-iloo bolo Goe go di Tama Dabuaahia dela ne-hanimoi i-baahi o God.”

6:70  Jesus ga-helekai, “Au ne-hili goodou dilongoholu maa-lua, gei tangada e-dahi i goodou la tangada huaidu!”

6:71  Mee nogo leelee i Judas, tama-daane Simon Iscariot. Ma e-aha maa mee tangada e-dahi i ana dama-agoago, gei go mee dela ga-hagi-anga a Jesus.