Kapingamarangi - John - 3

3:1  Tagi i-golo, tangada o Jew, dono ingoo go Nicodemus, tangada i-nia Pharisee.

3:2  Di boo e-dahi, gei mee ga-hanimoi gi Jesus, ga-helekai, “Rabbai, gimaadou e-iloo bolo Goe tangada agoago ne-hagau-mai go God, idimaa, tangada e-mee di-hai ana mogobuna be Goe ai, maa God la-hagalee i dono baahi.”

3:3  Jesus ga-helekai, “Au e-hagi-adu gi-di-goe di tonu: Tangada e-mee di-gidee Teenua King o God ai, maa ia digi haanau labelaa.”

3:4  Nicodemus ga-heeu, “Tangada dela gu-madua, le e-haanau labelaa behee? Mee e-deemee di-ulu gi-lodo tinae dono dinana ga-haanau hagalua!”

3:5  Gei Jesus ga-helekai gi mee, “Au e-hagi-adu gi-di-goe di tonu: Ma tangada e-ulu i Teenua King o God ai, maa ia digi haanau i-nia wai mo-di Hagataalunga.

3:6  Tuaidina dangada goneiga ne-haanau-mai baahi nia maadua, gei di hagataalunga la-ne-haanau-mai i-di Hagataalunga.

3:7  Goe hudee homouli gi agu helekai, ala bolo goodou gi-haanau labelaa.

3:8  Di madangi e-gono gi-di gowaa dela e-hiihai ginai, gei goe e-longono dono lee, goe e-de-iloo be di-maa e-gono mai i-hee, be e-gono gi-hee. E-hai gadoo be digau huogodoo ala ne-haanau i-di Hagataalunga.”

3:9  Nicodemus ga-heeu, “Dehee dono hai?”

3:10  Jesus ga-helekai gi mee, “Goe tangada agoago aamua o Israel, gei goe e-de-iloo di-mee deenei?

3:11  Au e-hagi-adu gi-di-goe di tonu, bolo gimaadou e-helekai nia mee ala gu-iloo-gimaadou, gei gimaadou e-haga-modongoohia nia mee ala gu-gidee-gimaadou, gei tangada i goodou ne-hagadonu madau agoago ai.

3:12  Au gu-hagi-adu gi goodou nia mee o henuailala, gei goodou hagalee hagadonu. Gei nia mee o-di langi ma-ga-hagi-adu ko-Au gi goodou, le e-hagadonu go koodou behee?

3:13  Deai tangada ne-hana gi-di langi ai, dela-hua go Tama-Tangada, go Mee ne-haneia i-di langi.”

3:14  Moses ne-daudau dana gihaa baalanga-mmee i-hongo di laagau i-lodo di anggowaa, e-hai gadoo be-di hai a Tama-Tangada dela e-hai-loo gi-daudau gi-nua,

3:15  bolo digau huogodoo ala e-hagadonu a-Mee, la-ga-hai-mee gi-di mouli e-dee-odi.

3:16  Idimaa God ne-aloho huoloo i henuailala dela ne-hagau-mai dana Dama-daane hua e-dahi, bolo digau huogodoo ala e-hagadonu a-Mee, la-hagalee mmade, ga-hai-mee gi-di mouli e-dee-odi.

3:17  Idimaa, God hagalee ne-hagau-mai dana Dama belee hagi-aga henuailala. Mee ne-hagau-mai dana Dama belee hai di haga-mouli ni henuailala.

3:18  Be koai e-hagadonu dana Dama, geia e-hagalee hagi-aga. Be koai e-hagalee hagadonu dana Dama, eia guu-lawa di-hagi-aga, idimaa ia digi hagadonu di Tama hua-e-dahi a God.

3:19  Deenei di hai o-di hagi-aga: Di maalama gu-hanimoi gi henuailala, gei nia daangada le-aloho-hua i-di bouli laa-hongo di maalama, idimaa, nadau hangahaihai le e-huaidu.

3:20  Nia daangada ala e-hai nia huaidu, hagalee hiihai gi-di maalama, ginaadou hagalee lloomoi gi-di maalama, idimaa digaula hagalee hiihai nadau haihai huaidu gi-modongoohia-aga.

3:21  Nia daangada ala e-hai nia mee donu, le e-lloomoi gi-di maalama, bolo di maalama ga-haga-modongoohia-aga nadau hegau ala nogo hai, mai nadau hagalongo ang-gi God.

3:22  Nomuli, gei Jesus mo ana dama-agoago gaa-hula gi Judea, gaa-noho haga-dulii i-baahi digau i-golo, e-hai ana babdais.

3:23  John nogo babdais labelaa ana daangada i Aenon, hoohoo gi Salim, idimaa, di gowaa deelaa e-logo ono wai. Nia daangada e-hula e-babdais go mee.

3:24  (Di mee deenei la-ne-hai i-mua di galabudi o John.)

3:25  Hunu daangada i-nia dama-agoago a John ga-daamada ga-lagalagamaaloo ang-gi tangada o Jew i-di hai o-di hagahemeheme daumaha.

3:26  Digaula gaa-hula gi John, ga-helekai gi mee, “Tangada agoago, goe e-langahia Taane nogo goolua i-baahi i-dua di monowai Jordan dela nogo helekai-iei goe? Mee e-hai ana babdais dolomeenei, gei digau huogodoo e-hula gi Mee.”

3:27  John ga-helekai, “Tangada e-mee di-hai ana mee ai, maa God la-digi dugu-anga gi mee.

3:28  Goodou la-go ogu gau hagadootonu bolo au ne-helekai: Ma hagalee ko-au go di Mesaia. Au ne-hagau-mai i-mua o Mee.

3:29  Di ahina hai-lodo la-di ahina donu ni taane hai-lodo, gei di hoo taane hai-lodo dela e-duu i-baahi o mee e-hagalongo, gu-tenetene i dono hagalongo gi-di lee o taane hai-lodo. Deenei di hai o-di hagahonu o dogu tene.

3:30  Mee e-hai-loo gi-mada-hagalabagau, gei au gi-mada-dulii dogu hagalabagau.”

3:31  “Mee dela ne-haneia i-di langi e-aamua i-nia mee huogodoo. Gei tangada henuailala e-dau gi henuailala, e-helehelekai i-nia mee o henuailala. Gei Mee dela ne-haneia i-di langi, la-i-hongo nia mee huogodoo.

3:32  Mee e-haga-modongoohia-aga ana mee ne-gidee ge ne-hagalongo gineia, gei tangada e-dahi ne-hagadonu ana haga-modongoohia ai.

3:33  Tangada dela e-hagadonu ana haga-modongoohia, la-gu-haga-modongoohia bolo God le e-donu.

3:34  Tangada dela ne-hagau mai baahi o God, le e-helehelekai nia helekai a God, idimaa, God gu-haga-honu a-Mee gi dono Hagataalunga-Dabu.

3:35  Tamana e-aloho i dana Dama, gei gu-dugu-anga nia mee huogodoo gi Mee.

3:36  Be koai hua dela e-hagadonu Tama deelaa, geia e-hai-mee gi-di mouli dee-odi. Be koai hua dela e-de-hagalongo gi Tama deelaa, geia e-de-gidee di mouli, idimaa mee e-noho hua i-lala di hagawelewele o God.”