Kapingamarangi - Leviticus - 3

3:1  Maa tangada i goodou ga-gaamai dana kau belee hai dana tigidaumaha hagadaubuni, e-hai gii-hai di kau-daane be-di kau-ahina dela ono milimilia ai.

3:2  Tangada deelaa gaa-dugu dono lima gi-hongo di libogo di kau deelaa ga-daaligi di-maa i-di ngudu di bontai di Hale-laa Dimaadua dela e-noho-ai. Digau hai-mee-dabu o-di madawaawa Aaron gaa-hunu nia dodo gi-nia baahi e-haa o-di gowaa dudu tigidaumaha,

3:3  gaa-wanga di manu deelaa e-hai tigidaumaha meegai ang-gi Dimaadua: nia kiliidi huogodoo ala i-di gili di geiga,

3:4  mo nia ‘kidney’ mo nia kiliidi ala i-di gili nia maa, mo nia gowaa humalia o-di ade.

3:5  Digau hai-mee-dabu gaa-dudu nia mee aanei huogodoo i-hongo di gowaa dudu tigidaumaha ngaadahi mo nia tigidaumaha dudu ala i-golo. Di hauiha o tigidaumaha meegai deenei le e-haga-tenetene di manawa o Dimaadua.

3:6  Maa tangada ga-gaamai dana siibi be-di kuudi belee hai dana tigidaumaha hagadaubuni, e-hai gii-hai di kuudi-daane be-di kuudi-ahina dela ono milimilia ai.

3:7  Tangada dela ma-ga-tigidaumaha dana siibi,

3:8  mee e-hai gii-dugu dono lima gi-hongo di libogo di manu deelaa, ga-daaligi di-maa i-mua di Hale-laa. Digau hai-mee-dabu gaa-hunu nia dodo gi-nia baahi e-haa o-di gowaa dudu tigidaumaha,

3:9  gaa-wanga nia gowaa aanei o-di manu deelaa e-hai-ai tigidaumaha meegai ang-gi Dimaadua: nia kiliidi, di hugu dogomaalia e-tuu gi-hoohoo gi-di iwi madua, nia kiliidi huogodoo ala e-pigi gi-di gili di geiga,

3:10  mo nia ‘kidney’ mo nia kiliidi ala i-di gili nia maa, mo nia gowaa ala e-humalia i-di gili di ade.

3:11  Tangada hai-mee-dabu gaa-dudu nia mee aanei huogodoo i-hongo di gowaa dudu tigidaumaha e-hai-ai tigidaumaha meegai ang-gi Dimaadua.

3:12  Tangada dela ma-ga-tigidaumaha dana kuudi,

3:13  mee e-hai gii-dugu dono lima gi-hongo di libogo di kuudi deelaa, ga-daaligi di-maa i-mua di Hale-laa. Digau hai-mee-dabu gaa-hunu nia dodo gi-nia baahi e-haa o di gowaa dudu tigidaumaha.

3:14  Digaula gaa-wanga nia gowaa aanei o-di manu e-hai-ai tigidaumaha meegai ang-gi Dimaadua: nia kiliidi huogodoo ala i-di gili di geiga,

3:15  mo nia ‘kidney’ mo nia kiliidi ala i-di gili nia maa, mo nia gowaa humalia huogodoo ala i-di gili di ade.

3:16  Tangada hai-mee-dabu gaa-dudu nia mee aanei huogodoo i-hongo di gowaa dudu tigidaumaha e-hai-ai tigidaumaha meegai dela e-haga-tenetene di manawa o Dimaadua. Nia kiliidi huogodoo la nia mee ni Dimaadua.

3:17  Tangada Israel e-gai nia kiliidi be nia dodo ai; deenei la taganoho e-hana-hua beelaa ang-gi digau Israel mo nadau hagadili i-nia gowaa huogodoo ala e-noho-ai digaula.