CopSahBible2 - Proverbs - 13

13:1  ϣⲁⲣⲉⲟⲩϣⲏⲣⲉ ⲛⲥⲁⲃⲉ ⲥⲱⲧⲙ ⲛⲥⲁⲡⲉϥⲉⲓⲱⲧ ⲉⲣⲉⲟⲩϣⲏⲣⲉ ⲇⲉ ⲛⲁⲧⲥⲱⲧⲙ ϩⲙⲡⲧⲁⲕⲟ

13:2  ⲡⲉⲧⲛⲁⲛⲟⲩϥ ⲛⲁⲟⲩⲱⲙ ⲉⲃⲟⲗ ϩⲙⲡⲕⲁⲣⲡⲟⲥ ⲛⲧⲇⲓⲕⲁⲓⲟⲥⲩⲛⲏ ⲛⲉⲯⲩⲭⲏ ⲇⲉ ⲛⲙⲡⲁⲣⲁⲛⲟⲙⲟⲥ ⲛⲁⲙⲟⲩ ⲉⲩⲟ ⲛϣⲁⲣⲁϩⲉ

13:3  ⲡⲉⲧϩⲁⲣⲉϩ ⲣⲱϥ ⲉϥϩⲁⲣⲉϩ ⲉⲧⲉϥⲯⲩⲭⲏ ⲡⲉⲧϣⲧⲣⲧⲱⲣ ⲇⲉ ϩⲛⲛⲉϥⲥⲡⲟⲧⲟⲩ ⲛⲁϣⲧⲣⲧⲱⲣϥ ⲟⲩⲁⲁϥ

13:4  ⲁⲣⲅⲟⲥ ⲛⲓⲙ ϩⲛϩⲉⲛⲉⲡⲓⲑⲩⲙⲓⲁ ⲛϭⲓϫ ⲇⲉ ⲛⲛϫⲱⲱⲣⲉ ϩⲛⲟⲩⲱⲣϫ

13:5  ⲡⲇⲓⲕⲁⲓⲟⲥ ⲙⲟⲥⲧⲉ ⲛⲟⲩϣⲁϫⲉ ⲛϫⲓⲛϭⲟⲛⲥ ⲡⲁⲥⲉⲃⲏⲥ ⲇⲉ ⲛⲁϫⲓ ϣⲓⲡⲉ ⲛϥⲧⲙϫⲓ ⲛⲟⲩⲡⲁⲣⲣⲏⲥⲓⲁ

13:6  ϣⲁⲣⲉⲧⲇⲓⲕⲁⲓⲟⲥⲩⲛⲏ ϩⲁⲣⲉϩ ⲉⲛⲃⲁⲗϩⲏⲧ ϣⲁⲣⲉⲡⲛⲟⲃⲉ ⲇⲉ ⲣⲁⲥⲉⲃⲏⲥ ⲛⲕⲣⲟϥ

13:7  ⲟⲩⲛⲛⲉⲧⲉⲓⲣⲉ ⲙⲙⲟⲟⲩ ⲛⲣⲙⲙⲁⲟ ⲉⲙⲛⲧⲟⲩⲗⲁⲁⲩ ⲁⲩⲱ ⲟⲩⲛⲛⲉⲧⲑⲃⲃⲓⲟ ⲙⲙⲟⲟⲩ ⲉⲩϩⲛⲟⲩⲛⲟϭ ⲙⲙⲛⲧⲣⲙⲙⲁⲟ

13:8  ⲡⲥⲱⲧⲉ ⲛⲧⲉⲯⲩⲭⲏ ⲙⲡⲣⲱⲙⲉ ⲧⲉ ⲧⲉϥⲙⲛⲧⲣⲙⲙⲁⲟ ⲙⲉⲣⲉⲡϩⲏⲕⲉ ⲇⲉ ϥⲓ ϩⲁⲟⲩⲁⲡⲓⲗⲏ

13:9  ⲡⲟⲩⲟⲉⲓⲛ ϣⲟⲟⲡ ⲛⲛⲇⲓⲕⲁⲓⲟⲥ ⲛⲟⲩⲟⲉⲓϣ ⲛⲓⲙ ⲡⲟⲩⲟⲉⲓⲛ ⲇⲉ ⲛⲛⲁⲥⲉⲃⲏⲥ ⲛⲁϫⲉⲛⲁ ⲛⲉⲯⲩⲭⲏ ⲛⲕⲣⲟϥ ⲡⲗⲁⲛⲁ ϩⲛϩⲉⲛⲛⲟⲃⲉ ϣⲁⲣⲉⲛⲇⲓⲕⲁⲓⲟⲥ ⲇⲉ ϣⲛϩⲧⲏⲩ ⲛⲥⲉⲛⲁ

13:10  ϣⲁⲣⲉⲡⲡⲉⲑⲟⲟⲩ ⲣϩⲉⲛⲡⲉⲑⲟⲟⲩ ϩⲛⲟⲩⲥⲱϣ ϩⲉⲛⲥⲟⲫⲟⲥ ⲇⲉ ⲛⲉ ⲛⲉⲧⲥⲟⲟⲩⲛ ⲛⲧⲇⲓⲕⲁⲓⲟⲥⲩⲛⲏ

13:11  ⲧⲙⲛⲧⲣⲙⲙⲁⲟ ⲉⲧⲟⲩϭⲉⲡⲏ ⲉϫⲡⲟⲥ ϩⲛⲟⲩⲁⲛⲟⲙⲓⲁ ⲛⲁⲣϭⲣⲱϩ ⲧⲉⲧⲟⲩⲥⲟⲩⲱϩ ⲇⲉ ⲙⲙⲟⲥ ⲉϩⲟⲩⲛ ϩⲛⲟⲩⲙⲛⲧⲙⲁⲓⲛⲟⲩⲧⲉ ⲛⲁⲁϣⲁⲓ

13:12  ϥⲥⲟⲧⲡ ⲛϭⲓⲡⲉⲧⲣϣⲟⲣⲡ ⲉⲃⲟⲏⲑⲓ ϩⲙⲡϩⲏⲧ ⲉϩⲟⲩⲉⲡⲉⲧⲉⲣⲏⲧ ⲁⲩⲱ ⲉϥⲣϩⲧⲏϥ ϣⲁⲣⲉⲟⲩϣⲏⲛ ⲅⲁⲣ ⲛⲱⲛϩ ϣⲱⲡⲉ ϩⲛⲟⲩⲟⲩⲱϣ ⲉⲛⲁⲛⲟⲩϥ

13:13  ⲡⲉⲧⲕⲁⲧⲁⲫⲣⲟⲛⲓ ⲛⲟⲩϩⲱⲃ ⲥⲉⲛⲁⲕⲁⲧⲁⲫⲣⲟⲛⲓ ⲙⲙⲟϥ ⲡⲉⲧⲣϩⲟⲧⲉ ⲇⲉ ϩⲏⲧⲥ ⲛⲧⲉⲛⲧⲟⲗⲏ ⲡⲁⲓ ⲡⲉ ⲉⲧⲟⲩⲟϫ ⲙⲛⲗⲁⲁⲩ ⲛⲁⲅⲁⲑⲟⲛ ⲛⲁϣⲱⲡⲉ ⲛⲟⲩϣⲏⲣⲉ ⲛⲕⲣⲟϥ ⲟⲩⲛϩⲉⲛϩⲃⲏⲩⲉ ⲇⲉ ⲉⲩⲥⲟⲩⲧⲱⲛ ⲛⲁϣⲱⲡⲉ ⲛⲟⲩϩⲙϩⲁⲗ ⲛⲥⲟⲫⲟⲥ

13:14  ⲟⲩⲛⲟⲩⲡⲏⲅⲏ ⲛⲱⲛϩ ϩⲛⲛⲉϩⲓⲟⲟⲩⲉ ⲛⲧⲥⲟⲫⲓⲁ ⲡⲁⲑⲏⲧ ⲇⲉ ⲛⲁⲙⲟⲩ ϩⲛⲟⲩⲡⲁϣ

13:15  ϣⲁⲣⲉⲟⲩⲙⲛⲧⲣⲙⲛϩⲏⲧ ⲉⲛⲁⲛⲟⲩⲥ ϯ ⲛⲟⲩϩⲙⲟⲧ ⲟⲩⲧⲁⲕⲟ ⲇⲉ ⲛⲉ ⲛⲉϩⲓⲟⲟⲩⲉ ⲛⲙⲡⲁⲣⲁⲛⲟⲙⲟⲥ

13:16  ϣⲁⲣⲉⲡⲁⲛⲟⲩⲣⲅⲟⲥ ⲛⲓⲙ ⲣϩⲱⲃ ϩⲛⲟⲩϣⲟϫⲛⲉ ϣⲁⲣⲉⲡⲁⲑⲏⲧ ⲇⲉ ⲡⲣϣⲧⲉϥⲕⲁⲕⲓⲁ ⲉⲃⲟⲗ

13:17  ⲟⲩⲛⲟⲩϥⲁⲓϣⲓⲛⲉ ⲛⲛⲁϣⲧⲙⲙⲉ ⲛⲁϩⲉ ⲉϩⲣⲁⲓ ⲉϩⲉⲛⲡⲉⲑⲟⲟⲩ ϣⲁⲣⲉⲡϥⲁⲓϣⲓⲛⲉ ⲇⲉ ⲉⲧⲛϩⲟⲧ ⲧⲁⲗϭⲟ

13:18  ϣⲁⲣⲉⲧⲉⲥⲃⲱ ϥⲓ ⲛⲟⲩⲙⲛⲧϩⲏⲕⲉ ⲙⲛⲟⲩⲥⲱϣ ⲡⲉⲧϩⲁⲣⲉϩ ⲇⲉ ⲉϩⲉⲛϫⲡⲓⲟ ⲛⲁϫⲓⲉⲟⲟⲩ

13:19  ϣⲁⲣⲉⲛⲉⲡⲓⲑⲩⲙⲓⲁ ⲛⲛⲣⲙⲛⲛⲟⲩⲧⲉ ϯⲟⲩⲛⲟϥ ⲛⲛⲉⲩⲯⲩⲭⲏ ⲛⲉⲡⲓⲑⲩⲙⲓⲁ ⲇⲉ ⲛⲛⲁⲥⲉⲃⲏⲥ ⲟⲩⲏⲩ ⲉⲃⲟⲗ ⲙⲡⲥⲟⲟⲩⲛ ⲛϫⲱϩⲙ ⲛⲛⲁⲥⲉⲃⲏⲥ ⲟⲩⲏⲩ ⲉⲃⲟⲗ ⲛⲁⲓⲥⲑⲏⲥⲓⲥ ⲛⲁⲥⲉⲃⲏⲥ ⲇⲉ ⲛⲁⲥⲁϩⲟⲩ ⲉⲃⲟⲗ ⲛⲛⲣⲙⲛⲟⲩⲧⲉ

13:20  ⲉⲕϣⲁⲛⲙⲟⲟϣⲉ ⲙⲛϩⲉⲛⲥⲟⲫⲟⲥ ⲕⲛⲁⲣⲥⲟⲫⲟⲥ ⲡⲉⲧⲙⲟⲟϣⲉ ⲇⲉ ⲙⲛϩⲉⲛⲁⲑⲏⲧ ϥⲛⲁⲟⲩⲱⲛϩ ⲉⲃⲟⲗ ⲛⲇⲓⲕⲁⲓⲟⲥ ⲛⲁϣⲱⲡⲉ ϩⲛⲟⲩⲉⲓⲣⲏⲛⲏ

13:21  ⲙⲡⲉⲑⲟⲟⲩ ⲛⲁⲡⲱⲧ ⲛⲥⲁⲛⲣⲉϥⲣⲛⲟⲃⲉ ⲛⲁⲅⲁⲑⲟⲛ ⲇⲉ ⲛⲁⲧⲁϩⲉⲛⲇⲓⲕⲁⲓⲟⲥ

13:22  ⲡⲣⲱⲙⲉ ⲛⲇⲓⲕⲁⲓⲟⲥ ⲛⲁⲡⲱϣ ⲉϫⲛⲛϣⲏⲣⲉ ⲛⲛⲉϥϣⲏⲣⲉ ⲉⲩⲥⲟⲩⲱϩ ⲉϩⲟⲩⲛ ⲛⲧⲙⲛⲧⲣⲙⲙⲁⲟ ⲛⲛⲁⲥⲉⲃⲏⲥ ⲛⲛⲇⲓⲕⲁⲓⲟⲥ

13:23  ⲛϫⲱⲱⲣⲉ ⲛⲁⲙⲧⲟⲛ ⲙⲙⲟⲟⲩ ⲛϩⲁϩ ⲛⲣⲟⲙⲡⲉ ϩⲛⲟⲩⲙⲛⲧⲣⲙⲙⲁⲟ ⲁϩⲟⲓⲛⲉ ⲇⲉ ⲧⲁⲕⲟ ⲛⲧⲉⲩⲛⲟⲩ

13:24  ⲡⲉⲧϯⲥⲟ ⲉⲡⲉϥϭⲉⲣⲱϥ ⲉϥⲙⲟⲥϩⲧⲉ ⲙⲡⲉϥϣⲏⲣⲉ ⲡⲉⲧⲙⲉ ⲇⲉ ⲙⲡⲱϥ ϥⲛⲁϯⲥⲃⲱ ⲛⲁϥ ⲉⲙⲁⲧⲉ

13:25  ⲉⲣⲉⲡⲇⲓⲕⲁⲓⲟⲥ ⲟⲩⲱⲙ ϣⲁϥⲧⲥⲓⲟ ⲛⲧⲉϥⲯⲩⲭⲏ ⲛⲉⲯⲩⲭⲏ ⲇⲉ ⲛⲛⲁⲥⲉⲃⲏⲥ ⲛⲁⲣϭⲣⲱϩ