CopSahBible2 - Proverbs - 30

30:1  ⲡⲁϣⲏⲣⲉ ⲁⲣⲓϩⲟⲧⲉ ϩⲏⲧⲟⲩ ⲛⲛⲁϣⲁϫⲉ ⲉⲁⲕϣⲟⲡⲟⲩ ⲇⲉ ⲉⲣⲟⲕ ⲙⲉⲧⲁⲛⲟⲓ ⲛⲁⲓ ⲛⲉϣⲁⲣⲉⲡⲣⲱⲙⲉ ϫⲟⲟⲩ ⲛⲛⲉⲧⲡⲓⲥⲧⲉⲩⲉ ⲉⲡⲛⲟⲩⲧⲉ ϫⲉ ϯⲛⲁⲗⲟ

30:2  ⲁⲛⲅ ⲟⲩⲥⲁⲃⲉ ⲅⲁⲣ ⲉϩⲟⲩⲉ ⲣⲏⲙⲉ ⲛⲓⲙ ⲁⲩⲱ ⲛⲟⲩⲙⲛⲧⲥⲁⲃⲉ ⲛⲣⲱⲙⲉ ⲁⲛ ⲧⲉⲧⲛϩⲏⲧ

30:3  ⲡⲛⲟⲩⲧⲉ ⲡⲉⲛⲧⲁϥⲧⲥⲁⲃⲟⲓ ⲉⲧⲥⲟⲫⲓⲁ ⲁⲩⲱ ⲁⲛⲟⲕ ⲁⲓⲥⲟⲩⲛⲡⲥⲟⲟⲩⲛ ⲛⲛⲉⲧⲟⲩⲁⲁⲃ

30:4  ⲛⲓⲙ ⲡⲉⲛⲧⲁϥⲃⲱⲕ ⲉϩⲣⲁⲓ ⲉⲧⲡⲉ ⲁϥⲉⲓ ⲉⲡⲉⲥⲏⲧ ⲛⲓⲙ ⲡⲉⲛⲧⲁϥⲥⲉⲩϩⲛⲧⲏⲩ ⲉϩⲟⲩⲛ ϩⲛⲕⲟⲩⲛϥ ⲛⲓⲙ ⲡⲉⲛⲧⲁϥⲥⲉⲩϩⲡⲙⲟⲟⲩ ⲉϩⲟⲩⲛ ϩⲛⲧⲉϥϣⲧⲏⲛ ⲛⲓⲙ ⲡⲉⲛⲧⲁϥⲁⲙⲁϩⲧⲉ ⲛⲁⲣⲏϫϥ ⲙⲡⲕⲁϩ ⲛⲓⲙ ⲡⲉ ⲡⲉϥⲣⲁⲛ ⲏ ⲡⲣⲁⲛ ⲛⲛⲉϥϣⲏⲣⲉ

30:5  ⲛϣⲁϫⲉ ⲧⲏⲣⲟⲩ ⲙⲡⲛⲟⲩⲧⲉ ⲥⲟⲧⲡ ⲁⲩⲱ ⲥⲉⲡⲟⲥⲉ ⲡⲉⲓⲙⲉ ⲇⲉ ⲉⲡⲛⲟⲙⲟⲥ ⲡⲁⲟⲩⲙⲉⲉⲩⲉ ⲡⲉ ⲉⲛⲁⲛⲟⲩϥ ⲁϣϥⲣⲛⲁϣⲧⲉ ⲇⲉ ⲛⲧⲟϥ ⲉⲛⲉⲧⲣϩⲟⲧⲉ ϩⲏⲧϥ

30:6  ⲙⲡⲣⲟⲩⲱϩ ⲉⲛⲉϥϣⲁϫⲉ ϫⲉ ⲛⲛⲉϥϫⲡⲓⲟⲕ ⲛⲅⲣⲣⲉϥϫⲓϭⲟⲗ

30:7  ϩⲱⲃ ⲥⲛⲁⲩ ⲛⲉⲧⲓⲁⲓϯ ⲙⲙⲟⲟⲩ ⲛⲧⲟⲟⲧⲕ ⲙⲡⲣϥⲓ ⲛⲧⲉⲭⲁⲣⲓⲥ ⲉⲃⲟⲗ ⲛϩⲏⲧ ⲉⲙⲡⲁϯⲙⲟⲩ

30:8  ⲙⲁⲣⲉⲟⲩϣⲁϫⲉ ⲉϥϣⲟⲩⲉⲓⲧ ⲁⲩⲱ ⲛϭⲟⲗ ⲟⲩⲉ ⲙⲙⲟⲓ ⲙⲡⲣϯ ⲇⲉ ⲛⲁⲓ ⲛⲟⲩⲙⲛⲧⲣⲙⲙⲁⲟ ⲙⲛⲟⲩⲙⲛⲧϩⲏⲕⲉ ⲧⲱϣ ⲛⲁⲓ ⲛⲛⲉϯⲁϩⲉ ⲛⲁⲩ ⲙⲛⲡⲁⲣⲱϣⲉ

30:9  ϫⲉ ⲛⲛⲁⲥⲉⲓ ⲛⲧⲁⲣⲣⲉϥϫⲓϭⲟⲗ ⲛⲧⲁϫⲟⲟⲥ ϫⲉ ⲛⲓⲙ ⲡⲉⲧⲛⲁⲩ ⲉⲣⲟⲓ ⲏ ⲧⲁⲣϩⲏⲕⲉ ⲛⲧⲁϫⲓⲟⲩⲉ ⲛⲧⲁⲱⲣⲕ ⲙⲡⲣⲁⲛ ⲙⲡⲁⲛⲟⲩⲧⲉ

30:10  ⲙⲡⲣϯ ⲛⲟⲩϩⲙϩⲁⲗ ⲉⲧⲟⲟⲧϥ ⲙⲡⲉϥϫⲟⲉⲓⲥ ⲙⲏⲡⲟⲧⲉ ⲛϥⲥϩⲟⲩⲱⲣⲕ ⲛⲅⲧⲁⲕⲟ

30:11  ϣⲁⲣⲉⲟⲩϣⲏⲣⲉ ⲉϥϩⲟⲟⲩ ⲥⲁϩⲟⲩ ⲙⲡⲉϥⲉⲓⲱⲧ ⲁⲩⲱ ⲙⲉϥⲥⲙⲟⲩ ⲉⲧⲉϥⲙⲁⲁⲩ

30:12  ϣⲁⲣⲉ ⲡϣⲣ ⲃⲱⲱⲛ ⲕⲣⲓⲛⲉ ⲙⲙⲟϥ ϩⲱⲥ ⲇⲓⲕⲁⲓⲟⲥ ⲧⲉϥϩⲓⲏ ⲇⲉ ⲙⲡϥⲧⲃⲃⲟⲥ

30:13  ⲟⲩϫⲁⲥⲓⲃⲁⲗ ⲡⲉ ⲟⲩϣⲏⲣⲉ ⲉϥϩⲟⲟⲩ ⲛⲉϥⲉⲛⲧⲟⲗⲏ ⲇⲉ ⲙⲙⲓⲛ ⲙⲙⲟϥ ⲛⲁⲛⲟⲩⲟⲩ ⲛⲁϩⲣⲁϥ ⲁⲩⲱ ϣⲁϥϫⲓⲥⲉ ⲙⲙⲟϥ ϩⲛⲛⲉϥⲟⲩϩⲉ

30:14  ϩⲉⲛⲥⲏϥⲉ ⲛⲉⲛⲟⲃϩⲉ ⲙⲡϣⲏⲣⲉ ⲉⲑⲟⲟⲩ ⲁⲩⲱ ϩⲉⲛⲣⲉϥϣⲱⲱⲧ ⲛⲉ ⲛⲉϥⲛⲁϫϩⲉ ϩⲱⲥⲧⲉ ⲉⲧⲁⲕⲟ ⲛⲛⲉⲧⲑⲃⲃⲓⲏⲩ ⲙⲡⲕⲁϩ ⲁⲩⲱ ⲛⲉⲩϩⲏⲕⲉ ⲉⲃⲟⲗ ϩⲛⲛⲣⲱⲙⲉ

30:15  ⲟⲩⲛⲧⲉ ⲧⲉⲃⲇⲉⲗⲗⲏ ϣⲙⲧ ϣⲉⲉⲣⲉ ⲉⲥⲙⲉ ⲙⲙⲟⲟⲩ ϩⲛⲟⲩⲙⲉ ⲁⲩⲱ ⲧⲉⲓϣⲟⲙⲧⲉ ⲙⲡⲟⲩⲧⲥⲓⲟⲥ

30:16  ⲁⲙⲛⲧⲉ ⲙⲛⲡⲙⲉ ⲛⲥϩⲓⲙⲉ ⲙⲛⲡⲧⲁⲣⲧⲁⲣⲟⲥ ⲙⲛⲡⲕⲁϩ ⲉⲙⲉϥⲥⲓ ⲙⲙⲟⲟⲩ ⲙⲛⲡⲙⲟⲟⲩ ⲙⲛⲡⲕⲱϩⲧ ⲉⲛⲛⲉⲩϫⲟⲟⲥ ϫⲉ ϩⲱ ⲁⲩⲱ ⲧⲙⲉϩϥⲧⲟⲉ ⲙⲡⲟⲩϩⲉ ⲉⲣⲟⲥ ⲉⲥϫⲟⲟⲥ ϫⲉ ϥⲣⲱϣⲉ

30:17  ⲡⲃⲁⲗ ⲉⲧⲥⲱⲃⲉ ⲛⲥⲁⲡⲉϥⲉⲓⲱⲧ ⲁⲩⲱ ⲉⲧⲥⲱϣ ⲛⲧⲙⲛⲧϩⲗⲗⲟ ⲛⲧⲉϥⲙⲁⲁⲩ ⲉⲣⲉⲛⲁⲃⲟⲟⲕⲉ ϣⲉⲕϣⲱⲕϥ ⲉⲃⲟⲗ ϩⲛⲛⲉⲓⲁ ⲁⲩⲱ ⲛⲧⲉ ⲙⲙⲁⲥ ⲛⲁϩⲱⲙⲉ ⲟⲩⲟⲙϥ

30:18  ϣⲟⲙⲛⲧ ⲇⲉ ⲛⲉⲧⲙⲟⲕϩ ⲛⲁⲓ ⲉⲛⲟⲓ ⲙⲙⲟⲟⲩ ⲁⲩⲱ ⲛϯⲥⲟⲟⲩⲛ ⲁⲛ ⲙⲡⲙⲉϩϥⲧⲟⲟⲩ

30:19  ⲧⲉϩⲓⲏ ⲛⲟⲩⲁϩⲱⲙⲉ ⲉϥϩⲏⲗ ⲁⲩⲱ ⲛⲉϩⲓⲟⲟⲩⲉ ⲛⲟⲩϩⲟϥ ϩⲓⲟⲩⲡⲉⲧⲣⲁ ⲙⲛⲛⲉϩⲓⲟⲟⲩⲉ ⲛⲟⲩϫⲟⲓ ⲉϥⲣϩⲱⲧ ⲁⲩⲱ ⲛⲉϩⲓⲟⲟⲩⲉ ⲛⲟⲩⲣⲱⲙⲉ ⲉϥϩⲛⲧⲉϥⲙⲛⲧⲕⲟⲩⲓ

30:20  ⲟⲩⲧⲉⲓⲙⲓⲛⲉ ⲧⲉ ⲧⲉϩⲓⲏ ⲛⲟⲩⲥϩⲓⲙⲉ ⲛⲛⲟⲉⲓⲕ ⲧⲁⲓ ⲉⲧⲥⲛⲁⲣⲡⲉⲧⲥⲛⲁⲁϥ ⲛⲥⲉⲓⲁⲁⲥ ⲛⲥϫⲟⲟⲥ ϫⲉ ⲙⲡⲓⲣⲗⲁⲁⲩ ⲛⲛⲟⲃⲉ

30:21  ⲉⲣⲉⲡⲕⲁϩ ⲕⲓⲙ ϩⲛϣⲙⲧ ϩⲱⲃ ⲁⲩⲱ ⲙⲛϭⲟⲙ ⲙⲙⲟϥ ⲉϥⲓ ϩⲁⲡⲙⲉϩϥⲧⲟⲟⲩ

30:22  ⲟⲩϩⲙϩⲁⲗ ⲉϥϣⲁⲛⲣⲣⲣⲟ ⲁⲩⲱ ⲛⲧⲉⲟⲩⲁⲑⲏⲧ ⲥⲉⲓ ⲛⲟⲉⲓⲕ

30:23  ⲁⲩⲱ ⲛⲧⲉⲟⲩϩⲙϩⲁⲗ ⲛⲉϫⲧⲉⲥϫⲟⲉⲓⲥ ⲉⲃⲟⲗ ⲁⲩⲱ ⲛⲧⲉⲟⲩⲥϩⲓⲙⲉ ⲙⲙⲉⲥⲧⲏ ⲙⲁⲧⲉ ⲛⲟⲩϩⲁⲓ ⲉⲛⲁⲛⲟⲩϥ

30:24  ϥⲧⲟⲟⲩ ⲇⲉ ⲛⲉⲗⲁⲭⲓⲥⲧⲟⲛ ⲛⲉⲧϩⲓϫⲙⲡⲕⲁϩ ⲛⲁⲓ ⲇⲉ ϩⲉⲛⲥⲁⲃⲉ ⲛⲉ ⲉϩⲟⲩⲉⲛⲥⲟⲫⲟⲥ

30:25  ⲛϭⲁϫⲓϥ ⲉⲧⲉⲙⲛⲧⲟⲩϭⲟⲙ ⲉⲧⲉϣⲁⲩⲥⲃⲧⲉⲛⲉⲩϩⲣⲏⲩⲉ ⲙⲡϣⲱⲙ

30:26  ⲁⲩⲱ ⲛⲥⲁⲣⲁϭⲱⲟⲩϣ ⲉⲩϩⲉⲑⲛⲟⲥ ⲡⲉ ⲛϭⲱⲃ ⲛⲁⲓ ⲛⲧⲁⲩⲧⲁⲙⲓⲉⲛⲉⲩⲏⲓ ϩⲛⲙⲡⲉⲧⲣⲁ

30:27  ⲙⲛⲣⲣⲟ ϩⲓϫⲙⲡⲉϣϫⲉ ⲁⲩⲱ ϣⲁⲩϩⲱⲗ ⲉⲃⲟⲗ ϩⲛⲟⲩⲉϩⲥⲁϩⲛⲉ ⲛⲟⲩⲱⲧ ⲉⲩⲧⲏϣ

30:28  ⲁⲩⲱ ⲡϩⲁⲕⲗϥ ⲉϥⲧⲁϫⲣⲏⲩ ⲉϫⲛⲛⲉϥϭⲓϫ ⲁⲩⲱ ⲉϥⲙⲟⲧⲛ ⲛⲧⲁⲕⲟϥ ϥⲟⲩⲏϩ ϩⲛⲛⲏⲓ ⲛⲛⲣⲣⲱⲟⲩ

30:29  ϣⲟⲙⲛⲧ ⲇⲉ ⲛⲉⲧⲙⲟⲟϣⲉ ⲕⲁⲗⲱⲥ ⲁⲩⲱ ⲡⲙⲉϩϥⲧⲟⲟⲩ ϣⲁϥⲉⲓ ⲉⲃⲟⲗ ⲉϥⲧⲏϣ

30:30  ⲟⲩⲙⲁⲥ ⲙⲙⲟⲩⲓ ⲉϥϫⲟⲟⲣ ⲉⲛⲧⲃⲛⲟⲟⲩⲉ ⲡⲁⲓ ⲉⲙⲉϥⲕⲧⲟϥ ⲟⲩⲇⲉ ⲙⲉⲣⲉⲧⲃⲛⲏ ⲛⲟϣⲡ

30:31  ⲁⲩⲱ ⲟⲩⲁⲗⲉⲕⲧⲱⲣ ⲉϥⲙⲟⲟϣⲉ ϩⲛϩⲉⲛⲥϩⲓⲙⲉ ⲉϥⲣⲟⲟⲩⲧ ⲁⲩⲱ ⲟⲩϭⲓⲉ ⲉϥⲥⲱⲕ ϩⲏⲧϥ ⲙⲡⲟϩⲉ ⲛⲃⲁⲙⲡⲉ ⲁⲩⲱ ⲟⲩⲣⲣⲟ ⲉϥϣⲁϫⲉ ϩⲛⲟⲩⲛⲟϭ ⲙⲙⲏⲏϣⲉ

30:32  ⲡⲁϣⲏⲣⲉ ⲉⲕϣⲁⲛⲕⲁⲁⲕ ⲉϩⲣⲁⲓ ⲉⲩⲟⲩⲛⲟϥ ⲁⲩⲱ ⲛⲅⲥⲟⲩⲧⲛⲧⲉⲕϫⲓϫ ⲉⲃⲟⲗ ⲉⲣⲱⲕ ϩⲛⲟⲩⲙⲓϣⲉ ⲕⲛⲁϫⲓⲥⲱϣ

30:33  ϩⲉⲛⲉⲣⲱⲧⲉ ⲧⲁⲣⲉⲕϭⲛⲥⲁⲉⲓⲣⲉ ⲉⲕϣⲁⲛⲟϥⲟⲩ ⲇⲉ ⲡⲉⲥⲛⲟϥ ⲛⲏⲩ ⲉⲃⲟⲗ ⲉⲕϣⲁⲛⲥⲱⲕ ⲇⲉ ⲛϩⲉⲛϣⲁϫⲉ ϣⲁⲣⲉϩⲉⲛϩⲁⲡ ⲙⲛϩⲉⲛⲙⲓϣⲉ ⲉⲓ ⲉⲃⲟⲗ