Geez - Deuteronomy - 33

33:1  ወከመዝ ፡ ይእቲ ፡ በረከት ፡ እንተ ፡ ባረኮሙ ፡ ሙሴ ፡ ለደቂቀ ፡ እስራኤል ፡ ብእሴ ፡ እግዚአብሔር ፡ ዘእንበለ ፡ ይሙት ።

33:2  ወይቤ ፡ እግዚአብሔር ፡ እምነ ፡ ሲና ፡ መጽአ ፡ ወአስተርአየኒ ፡ በሴይር ፡ ወአዕረፈ ፡ በደብረ ፡ ፋራን ፡ ምስለ ፡ አእላፈ ፡ ቃዴስ ፡ እለ ፡ እምየማኑ ፡ መላእክቲሁ ፡ ወእለ ፡ ምስሌሁ ።

33:3  ወምሕኮ ፡ ለሕዝቡ ፡ ወለእለ ፡ ተቀደሱ ፡ በእደዊሁ ፡ ወእሉሂ ፡ እሊአከ ፡ እሙንቱ ።

33:4  ወረከቡ ፡ ሕገ ፡ በቃለ ፡ ዚአሁ ፡ ዘአዘዘነ ፡ [*ሙሴ ፡*] ወርስተ ፡ ለሕዝበ ፡ ያዕቆብ ።

33:5  ወይከውን ፡ መልአክ ፡ እምውስተ ፡ ፍቁር ፡ ተጋቢኦሙ ፡ መላእክተ ፡ አሕዛብ ፡ ምስለ ፡ ነገደ ፡ እስራኤል ።

33:6  አኀሥሦ ፡ ለሮቤል ፡ ወኢይሙተኒ ፡ ወይኩን ፡ ብዙኀ ፡ ኍለቊሁ ።

33:7  ወበዛቲኒ ፡ ለይሁዳ ፤ ስምዖ ፡ እግዚኦ ፡ ቃሎ ፡ ለይሁዳ ፡ ወይግባእ ፡ ውስተ ፡ ሕዝቡ ፡ ወእደዊሁ ፡ ይኰንናሁ ፤ ወኵኖ ፡ ረዳኤ ፡ እምነ ፡ ፀሩ ።

33:8  ወለሌዊኒ ፡ ይቤሎ ፡ አግብኡ ፡ ለሌዊ ፡ ቃሎ ፡ ወጽድቆ ፡ ለብእሲ ፡ ጻድቅ ፡ ዘአመከርዎ ፡ መከራ ፡ ወፀአልዎ ፡ በኀበ ፡ ማየ ፡ ቅሥት ።

33:9  ዘይቤሎ ፡ ለአቡሁ ፡ ወለእሙ ፡ ኢርኢኩከ ፡ ወበአኀዊሁኒ ፡ ኢያእመረ ፡ ወበደቂቁኒ ፡ ኢለበወ ፡ ወዐቀበ ፡ ቃለከ ፡ ወተማኅፀነ ፡ ኪዳነከ ፤

33:10  ከመ ፡ ይንግሩ ፡ ኵነኔከ ፡ ለያዕቆብ ፡ ወሕገከ ፡ ለእስራኤል ፡ ወከመ ፡ ይደዩ ፡ ዕጣነ ፡ ለመዐትከ ፡ ወበኵሉ ፡ ጊዜ ፡ ውስተ ፡ ምሥዋዒከ ።

33:11  ወባርክ ፡ እግዚኦ ፡ ኀይሎ ፡ ወተወከፍ ፡ ግብረ ፡ እደዊሁ ፡ ወአውርድ ፡ ክበደ ፡ ላዕለ ፡ እለ ፡ ይትቃወምዎ ፡ ፀሩ ፤ ኢ [ታ]ንሥኦሙ ፡ ለእለ ፡ ይፀልእዎ ።

33:12  ወለብንያምኒ ፡ ይቤሎ ፡ ፍቁረ ፡ እግዚአብሔር ፡ የኀድር ፡ ተአሚኖ ፡ ወእግዚአብሔር ፡ ይጼልሎ ፡ በኵሉ ፡ መዋዕሊሁ ፡ ወያዐርፍ ፡ ማእከለ ፡ መታክፊሁ ።

33:13  ወልዮሴፍኒ ፡ ይቤሎ ፡ እምነ ፡ በረከተ ፡ እግዚአብሔር ፡ ምድሩ ፡ ወእምነ ፡ ዝናመ ፡ ሰማይ ፡ ወጠል ፡ ወእምነ ፡ ነቅዐ ፡ ቀላይ ፡ ዘእምታሕቱ ፤

33:14  ወለለ ፡ ሰዐቱ ፡ እክሉ ፡ ወእምነ ፡ ሥርቀተ ፡ ፀሐይ ፡ ወእምነ ፡ ኍለቊሆሙ ፡ ለአውራኅ ።

33:15  ወይቀድም ፡ እምውስተ ፡ አርእስተ ፡ አድባር ፡ ወእምውስተ ፡ አርእስተ ፡ አውግር ፡ ዘአኤናዎን ።

33:16  ምድር ፡ እንተ ፡ ዘልፈ ፡ ጽግብት ፡ ወሠናይት ፡ ለዘ ፡ አስተርአየ ፡ በውስተ ፡ ዕፀ ፡ ባጦስ ፤ ለይምጻእ ፡ ዲበ ፡ ርእሱ ፡ ለዮሴፍ ፡ ወበርእሱ ፡ ይክበር ፡ ውስተ ፡ አኀዊሁ ።

33:17  ከመ ፡ በኵረ ፡ ላህም ፡ ሥኖ ፡ ወአቅርንት ፡ ዘአሐዱ ፡ ቀርኑ ፡ አቅርንቲሁ ፡ ወይወግኦሙ ፡ ለአሕዛብ ፡ ቦሙ ፡ ኅቡረ ፡ እስከ ፡ አጽናፈ ፡ ምድር ፤ ዝንቱ ፡ አእላፍ ፡ ዘኤፍሬም ፡ ውዝንቱ ፡ አእላፍ ፡ ዘምናሴ ።

33:18  ወለዛቡሎንሂ ፡ ይቤሎ ፡ ተፈሣሕ ፡ ዛቡሎን ፡ በፀአትከ ፡ ወይስካር ፡ ቦመኃድሪከ ፤

33:19  አለ ፡ ያጠፍእዎሙ ፡ ለአሕዛብ ፡ ወጸውዑ ፡ በህየ ፡ ወሡዑ ፡ መሥዋዕተ ፡ ጽድቅ ፡ እስመ ፡ ብዕለ ፡ ባሕር ፡ የሐፅነከ ፡ ወንዋዮሙ ፡ ለእለ ፡ ይነብሩ ፡ ውስተ ፡ ጰራልያ ።

33:20  ወለጋድሂ ፡ ይቤሎ ፡ ረሓቢ ፡ በረከቱ ፡ ለጋድ ፡ ከመ ፡ አንበሳ ፡ ቀጥቂጦ ፡ መዝራዕተ ፡ መላእክት ።

33:21  ወርእየ ፡ ቀዳሚሁ ፡ ከመ ፡ በህየ ፡ ተካፈልዋ ፡ ለምድረ ፡ መላእክት ፡ እንዛ ፡ ጉቡኣን ፡ መሳፍንት ፡ ኅቡረ ፡ ምስለ ፡ መልአከ ፡ ሕዘብ ፡ ወምስለ ፡ ሕዝበ ፡ እስራኤል ፡ እግዚአብሔር ፡ ገብረ ፡ ኵነኔሁ ፡ ወጽድ[ቆ] ፡ ምስለ ፡ እስራኤል ።

33:22  ወለዳንሂ ፡ ይቤሎ ፡ ዳን ፡ እጓለ ፡ አንበሳ ፡ ወይሠርር ፡ እምነ ፡ ባሳን ።

33:23  ወለንፍታሌምኒ ፡ ይቤሎ ፡ ንፍታሌም ፡ ጽጉብ ፡ እምነ ፡ ሠናይት ፡ ወይጸግብ ፡ እምነ ፡ በረከተ ፡ እግዚአብሔር ፡ ወለይትዋረስ ፡ ባሕረ ፡ ወሊባ ።

33:24  ወለአሴርሂ ፡ ይቤሎ ፡ ቡሩክ ፡ ውእቱ ፡ እምነ ፡ ውሉድ ፡ አሴር ፡ ወይከውን ፡ ኅሩየ ፡ ለአኀዊሁ ፡ ወየኀፅብ ፡ በቅብእ ፡ እገሪሁ ።

33:25  ወዘኀፂን ፡ ወዘብርት ፡ አሥእኒሁ ፡ ወይኩን ፡ በከመ ፡ መዋዕሊከ ፡ ኀይልከ ።

33:26  አልቦ ፡ ከመ ፡ አምላኩ ፡ ለፍቁር ፤ ዘይነብር ፡ ዲበ ፡ ሰማይ ፡ ውእቱ ፡ ረዳኢከ ፡ ወዕበየ ፡ ሥኑ ፡ ለሰማይ ።

33:27  ወይክድንከ ፡ እግዚአብሔር ፡ ፍጽመ ፡ በኀይለ ፡ መዝራዕተ ፡ አኤናዎን ፡ ወይወፅእ ፡ እምቅድመ ፡ ገጽከ ፡ ፀር ፡ በከመ ፡ ይቤ ፡ ከመ ፡ ያጥፍኦሙ ።

33:28  ወታነብሮ ፡ ለእስራኤል ፡ ተአሚኖ ፡ ባሕቲቶ ፡ ውስተ ፡ ምድረ ፡ ያዕቆብ ፡ ውስተ ፡ ምድረ ፡ ስርናይ ፡ ወወይን ፡ ወሰማይኒ ፡ ለከ ፡ ምስለ ፡ ደመና ፡ ወጠል ።

33:29  ወብፁዕ ፡ አንተ ፡ እስራኤል ፡ መኑ ፡ ከማከ ፡ ሕዝብ ፡ ዘእግዚአብሔር ፡ ያድኅኖ ፡ ወያጸንዐከ ፡ ረዳኢከ ፡ ወበመጥባሕትከ ፡ ዕልገትከ ፤ ሐሰው ፡ ፀርከ ፡ አንተ ፡ ትፄዐን ፡ ላዕለ ፡ ክሳዳቲሆሙ ።