LinVB - I Chronicles - 18

18:1  Na nsima Davidi akei kobunda na ba-Filisti mpe alongi bango. Abotoli Gat na mboka ya penepene o maboko ma ba-Filisti.

18:2  Alongi mpe Moab ; ba-Moab bakomi mpe kofuta ye mpako seko.

18:3  Davidi alongi Adadezer, mokonzi wa Soba, epai ya Amat, ntango alingi kozwa bokonzi epai ya ebale Efrate.

18:4  Davidi abotoli bango makalo nkoto yoko, akangi basoda ba farasa nkoto nsambo mpe basoda ba makolo nkoto ntuku ibale. Davidi akati mikulu mya makalo manso, atikali se na makalo monkama.

18:5  Ba-Aram ba Damasko bayei kosalisa Adadezer, mokonzi wa Soba, kasi Davidi abomi basoda ba Aram nkoto ntuku ibale na ibale.

18:6  Na nsima Davidi aluboli bayangeli o Damasko, mokili mwa Aram. Bongo ba-Aram bakomi kofuta ye mpako. Yawe apesi Davidi lilonga bipai binso azalaki kokende.

18:7  Davidi akamati nguba ya wolo ya basoda ba Adadezer mpe amemi ya­ngo o Yeruzalem.

18:8  O Tibkat mpe o Kun, mboka ya Adadezer, Davidi abotoli mpe mbengi ebele ; Salomo asali na yango Ebombelo ya mai, makonzi ma ndako mpe bisaleli bisusu bya mbengi.

18:9  Towu, mokonzi wa Amat, ayoki ’te Davidi alongi basoda banso ba Adadezer, mokonzi wa Soba.

18:10  Ati­ndi mwana wa ye Adoram epai ya mokonzi Davidi, apesa ye losako, apesa ye mpe longonya zambi abu­ndaki na Adadezer mpe alongaki ye, mpo Adadezer na Towu bazalaki ba­nguna ; ayeli ye mpe biloko ndenge na ndenge bya wolo, palata na mbe­ngi.

18:11  Mokonzi Davidi abonzeli Yawe biloko bina binso, abakisi mpe biloko bya palata mpe bya wolo, biye abotoloki o mokili mwa Edom, Moab, Amon mpe epai ya ba-Filisti na ba-Amalek.

18:12  Abisai, mwana wa Seruya, alongi ba-Edom mpe abomi basoda nkoto zomi na mwambe o lobwaku la Mo­ngwa.

18:13  Davidi atii bayangeli o Edom, mpe ba-Edom banso bakomi kofuta ye mpako. Yawe apesi Davidi lilonga bipai binso azalaki kokende.

18:14  Davidi akomi mokonzi wa Israel mobimba. Azalaki kosambisa bato banso se na bosembo.

18:15  Yoab, mwana wa Seruya, azalaki komanda wa basoda ; Yozafat, mwana wa Akilud, azalaki molaki wa mokonzi ;

18:16  Sadok, mwana wa Akitub, na Akimelek, mwana wa Ebiatar, bazalaki banganga Nzambe ; Savsa azalaki mokomi minkanda ;

18:17  Benaya, mwana wa Yoyada, azalaki komanda wa basoda ba Keret mpe ba Pelet. Bana ba Davidi bazalaki basaleli ba ya­mbo ba mokonzi.