LinVB - I Chronicles - 22

22:1  Na nsima Davidi alobi : « Ndako ya Yawe Nzambe eza­li awa ; ekozala mpe altare ya miboma mya bato ba Israel. »

22:2  Davidi atindi ’te basangisa bampaya baye bafandi o mokili mwa Israel ; akamati bango o mosala mwa kokata mabanga manene mpo ya kotonga Ndako ya Nzambe.

22:3  Asombi mpe bibende ebele mpo ya kosala nsete ya kokanga bizibeli bya ndako, mpe mpo ya kosala bikangeli ; aluki mpe mbengi ebele, bakoki komeka bozito bwa yango te.

22:4  Aluki mpe mabaya ma sédere mingi mpenza, zambi bato ba Sidoni mpe ba Tiro bapesaki Davidi mabaya ma sédere ebele.

22:5  Na nsima Davidi alobi : « Mwana wa ngai Salomo azali se mwana, akomi naino makasi te. Ebongi Ndako eye basengeli kotongela Yawe, ezala enene mpe kitoko mpo ezwa lokumu o miso ma bato ba bikolo binso. Ngai nakolengelela ye misala minso. » Mpe bongo Davidi, liboso ’te akufa ale-ngeli biloko biike.

22:6  Abengi mwana wa ye Salomo, mpe atindi ye ’te ato­nga Ndako mpo ya kokumisa Yawe Nzambe wa Israel.

22:7  Davidi alobi na Salomo : « Mwana wa ngai, ngai moko nalingaki kotongela Nkombo ya Yawe Nzambe wa ngai Ndako.

22:8  Kasi Yawe alobaki na ngai : ‘Obomaki bato baike mpe obundaki bitumba binene. Yo moto okotongela Nkombo ya ngai Ndako te, mpo osopaki makila mingi o miso ma ngai.

22:9  Tala, oboti mwana mobali, akozala moto wa boboto ; nakofandisa ye na boboto o kati ya banguna bafandi penepene ; ba­kopesa ye nkombo Salomo ; mikolo minso ye akozala mokonzi nakopesa Israel boboto mpe bopemi.

22:10  Ye moto akotongela Nkombo ya ngai Ndako. Ye akozala mwana wa ngai, mpe ngai nakozala tata wa ye. Nakolendisa bokonzi bwa ye o Israel seko’.

22:11  Sikawa, mwana wa ngai, Yawe azala na yo mpo ’te osilisa malamu mosala mwa kotonga ndako ya Yawe Nzambe wa yo, se lokola alobaki mpo ya yo.

22:12  Yawe akabela yo mayele na bwanya o mokolo akolubola yo mokonzi wa Israel mpo ’te okoka komemya Mobeko mwa Yawe Nzambe wa yo.

22:13  Soko otosi mpe okokisi mibeko mpe bitinda binso biye Yawe atindaki Moze mpo ya ba-Israel, makambo ma yo manso makotambola malamu. Zala makasi mpe na molende ! Obanga te, olenge mpe te.

22:14  Ngai moto mobola, nabombi mpo ya ndako ya Yawe talenta ya wolo nkoto monkama, na talenta ya palata efuku yoko. Bibende na mbe­ngi bileki mingi, bakoki komeka bozito bwa yango te. Naluki mabaya na mabanga, mpe yo okoluka naino masusu.

22:15  Okozala na basali baike, bato bayebi kokata mabanga na baye bayebi kopasola mabaya : basali ebele bayebi kosala misala ndenge na nde­nge.

22:16  Motango mwa wolo, palata, mbe­ngi na bibende, mokoki kotangema te. Sikawa teleme, banda mosala mwa yo, mpe Yawe azala na yo ! »

22:17  Davidi atindi bankumu banso ba Israel ’te basalisa mwana wa ye Salomo, alobi :

22:18  « Yawe, Nzambe wa bino azala na bino. Akomisi ekolo ya bino nye bipai binso. Akabi bato ba mokili o maboko ma ngai, bakosalelaka Yawe na mpe ekolo ya ye.

22:19  Sikawa boluka Yawe Nzambe wa bino na mo­tema moko mpe na mayele ma­nso. Bokende kotonga esika esantu ya Yawe Nzambe mpo ’te tokoka kokotisa Sanduku ya Bondeko bwa Yawe mpe mbeki isantu o ndako eye tokotongela nkombo ya Yawe. »