LinVB - I Chronicles - 15

15:1  Davidi amitongeli ndako isusu o Engumba ya Davidi. Abongiseli Sanduku ya Nzambe esika : atelemisi ema mpo ya kobomba yango.

15:2  Alobi : Bobele ba-Levi bakoki komeme Sanduku ya Nzambe, za­mbi Yawe aponi bango bameme Sa­nduku ya Yawe mpe basalela ye libela.

15:3  Davidi asangisi ba-Israel banso o Yeruzalem bameme Sanduku ya Yawe o esika balengeli mpo ya yango.

15:4  Abengi mpe bana ba Arone na ba-Levi.

15:5  O kati ya bana ba Keat, abe­ngi komanda Uriel na bandeko ba ye mo­nkama na ntuku ibale ;

15:6  o kati ya bana ba Merari abengi komanda Asaya na bandeko ba ye nkama ibale na ntuku ibale ;

15:7  o kati ya bana ba Gersom abengi komanda Yoel na bandeko ba ye monkama na ntuku isato ;

15:8  o kati ya bana ba Elisafam abengi komanda Semaya na bandeko ba ye nka­ma ibale ;

15:9  o kati ya bana ba Ebron abengi komanda Eliel na ba­ndeko ba ye ntuku mwambe ;

15:10  o kati ya bana ba Uziel abengi komanda Aminadab na bandeko ba ye monkama na zomi na babale.

15:11  Davidi abe-ngi banganga Nzambe Sadok na Ebiatar na mpe ba-Levi : Uriel, Asaya, Yoel, Semaya, Eliel na Aminadab,

15:12  alobi na bango : « Bozali bakonzi ba mabota ma ba-Levi. Bino na bandeko ba bino bomipetola, bomeme Sanduku ya Yawe Nzambe wa Israel o esika nalengeli mpo ya yango.

15:13  Mpo mbala eleki, awa bino bozalaki te, Yawe Nzambe wa biso apesaki biso etumbu, zambi totunaki ye te bo ebongi. »

15:14  Banganga Nzambe na ba-Levi bamipetoli bongo mpo ya komeme Sanduku ya Yawe Nzambe wa Israel.

15:15  Bana ba libota lya Levi bamemi Sanduku ya Nzambe lokola Yawe alobaki na monoko mwa Moze ; batii mabaya ma Sanduku o mapeke ma bango.

15:16  Na nsima Davidi atindi bakonzi ba mabota ma Levi ’te bandeko ba bango bayembi bazala mpe, bameme biyembeli bya bango : nzenze, loko­mbe na migbala, babete byango makasi mpo balakisa esengo ya bango.

15:17  Ba-Levi baponi Eman, mwana wa Yoel, mpe o kati ya bandeko ba ye baponi Asaf, mwana wa Berekia, Etan mwana wa Kusaya wa etuka ya Merari.

15:18  Baye balandaki bango, ba­ndeko ba bango : Zekaria, Uziel, Semiramot, Yekiel, Uni, Eliab, Benaya, Maseya, Matitia, Elifeleu, Mikneya, Obed-Edom na Yeiel bakengeli ba bizibeli bya Tempelo.

15:19  Bayembi : Eman, Asaf na Etan bazalaki na migbala mya mbengi mpo ya kobete lomeko la miziki.

15:20  Zekaria, Uziel, Semiramot, Yekiel, Uni, Eliab, Maseya na Benaya babeti nze­nze mpo ya mingongo mya likolo.

15:21  Matitia, Elifeleu, Mikneya, Obed-Edom, Yeiel na Azazia bakambi nze­mbo mpe babeti nzenze isusu mpo ya mingongo mya nse.

15:22  Kenania, kapita wa ba-Levi baye bamemi biyembeli, azalaki kotala makambo ma komeme biloko, mpo ameseni na mosala mwa­ngo.

15:23  Berekia na Elkana bazalaki bake­ngeli ba Sanduku ya Nzambe.

15:24  Ba­nganga Nzambe Sebania, Yozafat, Netaneel, Amasai, Zekaria, Benaya na Eliezer bazalaki kobete mindule o boso bwa Sanduku ya Nzambe. Obed-Edom na Yekia bazalaki kokengele Sanduku.

15:25  Bongo Davidi, bakolo ba Israel na bakomanda ba basoda nkoto bakei na Sanduku ya Bondeko bwa Yawe na esengo mpenza, babimisi yango o ndako ya Obed-Edom.

15:26  Mpo ’te Nza­mbe asalisa ba-Levi bazalaki komeme Sanduku, babonzeli Nzambe ngombe babali nsambo na mpata babali nsambo.

15:27  Davidi alati elamba ya malekani kitoko, mpe ba-Levi banso bamemi Sanduku, na bayembi na Kenania, kapita wa baye bamemi biloko, lokola. Davidi alataki mpe ela­mba ya efod ya malekani.

15:28  Ba-Israel banso batamboli bongo na Sanduku ya Bondeko ya Yawe, bagangi na nsai, babeti maseke, mindule na migbala, balelisi nzenze mpe likembe lya ba­ngo.

15:29  O ntango Sanduku ya Yawe ekomi o Engumba ya Davidi, Mikal, mwana wa Saul agumbami o lininisa. Amoni ndenge mokonzi azalaki kobina mpe kosepela ; o kati ya motema akinoli ye.