Kapingamarangi - II Chronicles - 36

36:1  Nia daangada o Judah gu-hilihili Joahaz tama-daane Josiah ga-hagatulu a-mee e-hai di king i Jerusalem.

36:2  Joahaz gu-madalua maa-dolu ono ngadau, gei mee guu-hai di king o Judah, gaa-dagi i Jerusalem i-nia malama e-dolu.

36:3  Neco di king o Egypt guu-lahi a-mee galabudi, guu-hai Judah gi-hui-anga dono dahi-aga nia pauna silber e-hidu mana ge lima-lau-(7,500), ge madahidu maa-lima-(75) pauna goolo.

36:4  Neco guu-hai a Eliakim, tuaahina daane Joahaz, di king o Judah, gaa-huli di ingoo o-maa gi Jehoiakim. Joahaz guu-lahi go Neco gi Egypt.

36:5  Jehoiakim gu-madalua maa-lima ono ngadau gei mee guu-hai di king o Judah, gaa-dagi i Jerusalem i-nia ngadau e-madangaholu maa-dahi. Mee gu-hai-hala gi Dimaadua dono God.

36:6  King Nebuchadnezzar o Babylon gu-heebagi gi Judah, guu-kumi Jehoiakim, guu-lahi a-mee gi Babylon e-lawalawa gi nia daula baalanga.

36:7  Nebuchadnezzar guu-kae nia goloo maluagina o-di Hale Daumaha, gaa-dugu nia maa gi-lodo dono hale king i Babylon.

36:8  Nia mee huogodoo Jehoiakim ne-hai, mo ana hangaahai haga-gulugulua mo-di huaidu a-mee ne-hai la-guu-hihi i-lodo Di Kai o-nia King o Israel mo Judah. Tama-daane a-maa go Jehoiachin gaa-pono di lohongo o-maa gaa-king.

36:9  Jehoiachin gu-madangaholu maa-walu ono ngadau, gei mee guu-hai di king o Judah, gaa-dagi i Jerusalem i-nia malama e-dolu ge madangaholu laangi. Mee hogi gu-hai-hala hai-baahi ang-gi Dimaadua.

36:10  Di madagoaa magalillili ne-lawa, King Nebuchadnezzar guu-lahi galabudi Jehoiachin gi Babylon, guu-kae gi-daha nia goloo maluagina o-di Hale Daumaha. Nomuli, Nebuchadnezzar guu-hai a Zedekiah, tuaahina tamana Jehoiachin, gii-hai di king o Judah mo Jerusalem.

36:11  Zedekiah gu-madalua maa-dahi ono ngadau, gei mee guu-hai di king o Judah, gaa-dagi i Jerusalem i-nia ngadau e-madangaholu maa-dahi.

36:12  Mee gu-ihala hai-baahi gi Dimaadua gei mee digi hagalongo manawa hila gi-lala gi soukohp Jeremiah, dela e-hagadele nnelekai a Dimaadua.

36:13  Zedekiah gu-hai-baahi gi King Nebuchadnezzar dela ne-hono a-mee bolo gi-dowangi i-di ingoo o God bolo ia ga-hagalaamua a-mee. Mee gu-manawa hamaaloo gu-de-hiihai di-huli dono mouli e-hanimoi labelaa gi Dimaadua, di God o Israel.

36:14  Hagapuni-anga, nia dagi o Judah, digau hai-mee-dabu mo nia daangada gu-daudali nia hangaahai huaidu o-nia henua i nadau baahi ala e-daumaha gi-nia balu god. Malaa, digaula gu-hagamilimilia di Hale Daumaha dela ne-hai go Dimaadua gi-dabuaahia.

36:15  Dimaadua di God o nadau maadua mmaadua, gu-duudagi-hua i-golo e-haga-hagau-mai ana soukohp e-hagailoo hagalliga gi ana daangada, idimaa Mee e-hiihai e-benebene digaula mo di Hale Daumaha.

36:16  Gei digaula gu-hai-hua nadau dadaagala gi digau kae hegau a God, gu-hagabalumee ana helekai mo-di gadagada gi ana soukohp, gaa-dae-loo gi tamanaiee o-di hagawelewele Dimaadua ga-deemee di-nadau llele gi-daha.

36:17  Deelaa-laa Dimaadua gu-laha-mai di king o Babylonia belee hai-tauwa gi digaula. Di king gu-daaligi gii-mmade nia dama-daane o Judah i-lodo di Hale Daumaha. Mee dono dumaalia ang-gi tei daangada ai, digau lligi be mmaadua, taane be di ahina, magi be maaloo. God guu-wanga digaula huogodoo gi mee.

36:18  Di king o Babylonia gu-gaiaa di Hale Daumaha, di gowaa dugu nia bahihadu di Hale Daumaha, mo nia maluagina di king mo ana gau aamua, guu-kae nia mee huogodoo gi Babylon.

36:19  Mee guu-dudu gi-lala di Hale Daumaha mo di waahale Jerusalem ngaadahi mo nia hale king mo ono maluagina, gu-oho gi-lala nia abaaba di waahale.

36:20  Mee guu-lahi digau ala e-mouli gi Babylonia, di gowaa dela e-hai-hege-ai ginaadou gi mee mo ono hagadili gaa-dae-loo gi-di gila-aga di king o Persia e-dagi dana waa-henua damana.

36:21  Nia helekai Dimaadua ala ne-kokohp mai soukohp Jeremiah la-gu-hagahonu i-nia mee aanei: “Tenua gaa-hai di anga-henua i-nia ngadau e-madahidu, e-hagadonu nia ngadau hagamolooloo o-di Sabad ala digi heia.”

36:22  I-lodo tahi ngadau o Cyrus nogo hai di king aamua o Persia, Dimaadua guu-hai a-mee gi-hihi dana haganoho ang-gi ana henua huogodoo ala e-dagi koia, bolo gi-haga-duulia-aga dana haganoho, gi-hagadele-ina gi-nia gowaa huogodoo o dono waa-henua:

36:23  “Deenei taganoho a Cyrus di king-aamua o Persia: Dimaadua go di God o-di langi gu-gaamai di mogobuna e-dagi nia henua huogodoo i henuailala, gei gu-hagaanga-mai labelaa bolo ma ko-au dela e-hau dono Hale Daumaha i Jerusalem i Judah. Dolomeenei, goodou huogodoo ala nia daangada ni God, hula gi-golo, gei Dimaadua di-godou God la-gi-madalia goodou.”