NorthernAzeri - Psalms - 77

77:1  Allahı səsləyirəm, fəryad edirəm, Allahı səsləyirəm, O məni dinlər.

77:2  Dar günümdə Xudavəndi axtarıram, Bütün gecə durmadan, Könlüm ovunmadan Ona əl açmışam.

77:3  Allahı yada salarkən təlaşa düşürəm, Dərindən fikirləşəndə ruhdan düşürəm. Sela

77:4  Qoymursan gözlərimi yumum, Üzgünlükdən danışa bilmirəm.

77:5  Düşünürəm keçən günləri, Ötən dövranı, illəri.

77:6  Oxuduğum ilahi gecələr yadıma düşür, Ürəyimdə düşünəndə könlüm məndən soruşur:

77:7  «Xudavənd məni əbədilikmi tərk edib? Bir daha məndən razı qalmayacaqmı?

77:8  Məhəbbəti həmişəlik qurtardımı? Vədi nəsildən-nəslə qədər sona çatdımı?

77:9  Allah rəhm etməyi unudubmu, Mərhəmətinin yerini qəzəb tutdumu?» Sela

77:10  Dedim: «Bu mənim üçün bəladır, Haqq-Taala daha gücünü göstərmir».

77:11  Ya Rəbb, Sənin əməllərini yada salıram, Bəli, xatırlayıram, ta qədimdən xariqələr göstərmisən.

77:12  Sənin bütün işlərini dərindən düşünürəm, Əməllərin barədə xəyala dalıram.

77:13  Allahın yolu müqəddəsdir. Allah kimi böyük hansı allah var?

77:14  Xariqələr yaradan Allah Sənsən, Xalqlar arasında qüdrətini göstərmisən.

77:15  Əl uzadıb xalqını, Yaqub, Yusif övladlarını azad etmisən. Sela

77:16  Ey Allah, sular Səni gördü, Səni görən sular qorxdu, Hətta ümmanlar lərzəyə gəldi.

77:17  Buludlar yağışa döndü, Göylərdən gurultular eşidildi, Hər tərəfə oxların töküldü.

77:18  Qasırğanın içindən ildırım çaxdı, Şimşəklər yer üzünə işıq saçdı, Yer lərzəyə gəlib sarsıldı.

77:19  Sən dənizdə, ümman sularda yol açdın, Amma ayaq izlərin məlum olmadı.

77:20  Sən Musa və Harunun əli ilə Xalqını bir sürü kimi aparmışdın.