Geez - Deuteronomy - 5

5:1  ወጸውዖሙ ፡ ሙሴ ፡ ለኵሉ ፡ እስራኤል ፡ ወይቤሎሙ ፡ ስማዕ ፡ እስራኤል ፡ ኵሎ ፡ ኵነኔ ፡ ወፍትሐ ፡ ዘአነ ፡ እነግረ [ክሙ] ፡ ዮም ፡ ውስተ ፡ እዘኒክሙ ፡ በዛቲ ፡ ዕለት ፡ ወተመሀሩ ፡ ገቢሮቶ ፡ ወዐቂቦቶ ።

5:2  እግዚአብሔር ፡ አምላክክሙ ፡ አቀመ ፡ ኪዳኖ ፡ ምስሌክሙ ፡ በኮሬብ ።

5:3  አኮ ፡ ለአበዊክሙ ፡ ዘአቀመ ፡ ዘንተ ፡ ኪዳነ ፡ አላ ፡ ለክሙ ፡ እስመ ፡ አንትሙ ፡ ሀለውክሙ ፡ ዝየ ፡ ዮም ፡ ኵልክሙ ፡ ሕያዋን ።

5:4  ገጸ ፡ በገጽ ፡ ተናገረክሙ ፡ እግዚአብሔር ፡ በደብር ፡ በማእከለ ፡ እሳት ።

5:5  ወአንሰ ፡ [እቀውም ፡ ማእከለ ፡ እግዚአብሔር ፡ ወ]ማእከሌክሙ ፡ በይእቲ ፡ ዕለት ፡ ከመ ፡ እንግርክሙ ፡ ቃሎ ፡ ለእግዚአብሔር ፡ እስመ ፡ ፈራህክሙ ፡ እምቅድመ ፡ ገጸ ፡ እሳት ፡ ወኢዐረግሙ ፡ ውስተ ፡ ደብር ።

5:6  ወይቤ ፡ አነ ፡ ውእቱ ፡ እግዚአብሔር ፡ አምላክከ ፡ ዘአውፃእኩከ ፡ አምነ ፡ ምድረ ፡ ግብጽ ፡ እምነ ፡ ቤተ ፡ ቅኔት ።

5:7  ወኢይኩንከ ፡ ባዕድ ፡ አማልክት ፡ እንበሌየ ።

5:8  ወኢትግበር ፡ ለከ ፡ አምላከ ፡ ዘግልፎ ፡ ወኢበኵሉ ፡ አምሳለ ፡ ዘውስተ ፡ ሰማይ ፡ በላዕሉ ፡ ወኢበኵሉ ፡ ዘ[ውስተ] ፡ ምድር ፡ በታሕቱ ፡ ወኢበኵሉ ፡ ዘውስተ ፡ ማይ ፡ መትሕተ ፡ ምድር ።

5:9  ወኢትስግድ ፡ ሎሙ ፡ ወኢታምልኮሙ ፡ እስመ ፡ አነ ፡ እግዚአብሔር ፡ አምላክከ ፡ አምላክ ፡ ቀናኢ ፡ ዘያትፈደይ ፡ ኀጣይአ ፡ ወላዲ ፡ ላዕለ ፡ ውሉድ ፡ እስከ ፡ ሣልስት ፡ ወራብዕት ፡ ትውልድ ፡ ለእለ ፡ ይጸልኡኒ ፤

5:10  ወእገብር ፡ ምሕረተ ፡ እስከ ፡ እልፍ ፡ ትውልድ ፡ ለእለ ፡ ያፈቅሩኒ ፡ ወለእለ ፡ የዐቅቡ ፡ ትእዛዝየ ።

5:11  ኢትምሐል ፡ በስመ ፡ እግዚአብሔር ፡ አምላክከ ፡ በሐሰት ፡ እስመ ፡ ኢያነጽሖ ፡ እግዚአብሔር ፡ ለዛ ፡ ይምሕል ፡ በስሙ ፡ በሐሰት ።

5:12  ወዕቀብ ፡ ዕለተ ፡ ሰንበት ፡ ከመ ፡ ትቀድሳ ፡ በከመ ፡ አዘዘከ ፡ እግዚአብሔር ፡ አምላክከ ።

5:13  ሰዱሰ ፡ መዋዕለ ፡ ትገብር ፡ ግብረ ፡ ኵሎ ፡ ግብረከ ።

5:14  ወበሳብዕት ፡ ዕለት ፡ ሰንበቱ ፡ ለእግዚአብሔር ፡ አምላክከ ፡ ወኢትግበር ፡ ባቲ ፡ ኵሎ ፡ ግብረከ ፡ ወኢወልድከ ፡ ወኢወለትከ ፡ ወኢገብርከ ፡ ወኢአመትከ ፡ ወኢላህምከ ፡ ወኢአድግከ ፡ ወኢኵሉ ፡ እንስሳከ ፡ ወኢግዩር ፡ ዘውስተ ፡ ዴዴከ ፡ ከመ ፡ ያዕርፍ ፡ ገብርከ ፡ ወአመትከ ፡ ከማከ ።

5:15  ወተዘከር ፡ ከመ ፡ ገብር ፡ አንተ ፡ በምድረ ፡ ግብጽ ፡ ወአውፅአከ ፡ እግዚአብሔር ፡ አምለክከ ፡ እምህየ ፡ በእድ ፡ ጽንዕት ፡ ወበመዝራዕት ፡ ልዑል ፡ ወበበይነ ፡ ዝንቱ ፡ አዘዘከ ፡ እግዚአብሔር ፡ አምላክከ ፡ ከመ ፡ ትዕቀባ ፡ ለዕለተ ፡ ሰንበት ፡ ወትቀድሳ ።

5:16  አክብር ፡ አባከ ፡ ወእመከ ፡ በከመ ፡ አዘዘከ ፡ እግዚአብሔር ፡ አምላክከ ፡ ከመ ፡ ሠናይት ፡ ትኩን ፡ ላዕሌከ ፡ ወይኑኅ ፡ መዋዕሊከ ፡ ዲበ ፡ ምድር ፡ እንተ ፡ ወሀበከ ፡ እግዚአብሔር ፡ አምላክከ ።

5:17  ኢትሑር ፡ ኀበ ፡ ብእሲተ ፡ ብእሲ ፤ ወኢትቅትል ፡ ነፍሰ ፤ ወኢትስርቅ ፤ ወኢትኩን ፡ ስምዐ ፡ በሐሰት ፡ ላዕለ ፡ ቢጽከ ፡ ኢተሐሱ ፡ ስምዐ ።

5:18  ወኢትፍቶ ፡ ብእሲተ ፡ ካልእከ ፡ ወኢትፍቶ ፡ ቤቶ ፡ ለካልእከ ፡ ወኢገራህቶ ፡ ወኢገብሮ ፡ ወኢአመቶ ፡ ወኢላህሞ ፡ ወኢአድጎ ፡ ወኢእምኵሉ ፡ እንስሳሁ ፡ ወኢእምኵሉ ፡ ዘቦቱ ፡ ካልእከ ።

5:19  ዝንቱ ፡ ነገር ፡ ዘነገረ ፡ እግዚአብሔር ፡ ለኵሉ ፡ ተዓይኒክሙ ፡ በውስተ ፡ ደብር ፡ በማእከለ ፡ እሳት ፡ ወጽልመት ፡ ወዐውሎ ፡ ወጣቃ ፡ ወቃል ፡ ዐቢይ ፡ ወኢደገመ ፡ እንከ ፡ ወጸሐፎ ፡ ውስተ ፡ ክልኤ ፡ ጽላት ፡ ዘእብን ፡ ወወሀበኒ ፡ እግዚአብሔር ።

5:20  ወኮነ ፡ ሶበ ፡ ሰማዕ[ክሙ] ፡ ውእተ ፡ ቃለ ፡ እምነ ፡ ማእከለ ፡ እሳት ፡ ወደብሩሂ ፡ ይነድድ ፡ በእሳት ፡ ወመጻእክሙ ፡ ኀቤየ ፡ ኵልክሙ ፡ መላእክተ ፡ ነገድክሙ ፡ ወአእሩጊክሙ ።

5:21  ወትቤሉኒ ፡ ናሁ ፡ አርአየነ ፡ እግዚአብሔር ፡ አምላክነ ፡ ስብሐቲሁ ፡ ወቃሎሂ ፡ ሰማዕነ ፡ እምነ ፡ ማእከለ ፡ እሳት ፡ ወዮም ፡ አእመርነ ፡ በዛቲ ፡ ዕለት ፡ ከመ ፡ ይትናገር ፡ እግዚአብሔር ፡ ምስለ ፡ ሰብእ ፡ ወየሐዩ ።

5:22  ወይእዜኒ ፡ ኢንሙት ፡ ወኢታጥፍአነ ፡ ዛቲ ፡ እሳት ፡ ዐባይ ፡ ለእመ ፡ ደገምነ ፡ ንሕነ ፡ ሰሚዖተ ፡ ቃሎ ፡ ለእግዚአብሔር ፡ አምላክነ ፡ ዓዲ ፡ ንመውት ፡ እንከ ።

5:23  ወመኑ ፡ ውእቱ ፡ ዘሥጋ ፡ ዘይሰምዕ ፡ ቃሎ ፡ ለእግዚአብሔር ፡ ዘሕያው ፡ እንዘ ፡ ይትናገር ፡ እምነ ፡ ማእከለ ፡ እሳት ፡ ካማነ ፡ ወየሐዩ ።

5:24  ሑር ፡ አንተ ፡ ወስማዕ ፡ ኵሎ ፡ ዛይብል ፡ እግዚአብሔር ፡ አምላክነ ፡ ወንግረነ ፡ አንተ ፡ ኵሎ ፡ ዘይቤለከ ፡ እግዚአብሔር ፡ አምላክነ ፡ [ወንሰምዕ ፡ ወንገብር ።]

5:25  ወሰምዐ ፡ እግዚአብሔር ፡ ቃለ ፡ ነገርክሙ ፡ ዘነበብክሙ ፡ ዘትቤሉኒ ፡ ወይቤለኒ ፡ እግዚአብሔር ፡ ሰማዕኩ ፡ ቃሎሙ ፡ ዘይቤሉ ፡ ዝንቱ ፡ ሕዝብ ፡ ኵሎ ፡ ዘይቤሉከ ፡ ወርቱዕ ፡ ኵሉ ፡ ዘይቤሉ ።

5:26  መኑ ፡ እምወሀቦሙ ፡ ከመዝ ፡ ይኩን ፡ ላዕሌሆሙ ፡ ከመ ፡ ይፍርሁኒ ፡ ወይዕቀቡ ፡ ትእዛዝየ ፡ በኵሉ ፡ መዋዕሊሆሙ ፡ ከመ ፡ ሠናይት ፡ ትኩኖሙ ፡ ወለውሉዶሙ ፡ እስከ ፡ ለዓለም ።

5:27  ሑር ፡ ወበሎሙ ፡ እትውአ ፡ ውስተ ፡ አብያቲክሙአ ።

5:28  ወአንተሰ ፡ ቁም ፡ ኀቤየ ፡ እንግርከ ፡ ትእዛዝየ ፡ ወኵነኔየ ፡ ወፍትሕየ ፡ ኵሎ ፡ ዘትሜህሮሙ ፡ ወይግበሩ ፡ ከማሁ ፡ ውስተ ፡ ምድር ፡ እንተ ፡ አነ ፡ እሁቦሙ ፡ ርስቶሙ ።

5:29  ወዕቀቡ ፡ ከመ ፡ ትግበሩ ፡ በከመ ፡ አዘዘኒ ፡ እግዚአብሔር ፡ አምላክከ ፡ ወኢትትገሐሥ ፡ ኢለየማን ፡ ወኢለፀጋም ፤

5:30  እምነ ፡ ኵሉ ፡ ፍኖት ፡ እንተ ፡ አዘዘከ ፡ እግዚአብሔር ፡ አምላክከ ፡ ከመ ፡ ትሑር ፡ ባቲ ፡ ወከመ ፡ ሠናይት ፡ ትኩንክሙ ፡ ወከመ ፡ ታዕርፉ ፡ ወይኑኅ ፡ መዋዕሊክሙ ፡ ውስቴ ፡ ምድር ፡ እንተ ፡ ትትዋረሱ ።