LinVB - Galatians - 4

4:1  Nakopésa ndakisa esúsu : Ntángo moto óyo akozwa bilóko bya tatá azalí naíno mwána, akeséní na moómbo té, atâ asílí akómí nkóló wa bilóko bínso.

4:2  Asengélí kotósa naíno babókoli mpé baké­ngeli ba yě kín’o mokolo moye tatá wa yě alakákí mokokoka.

4:3  Bísó sé bôngó : Ntángo tozalákí bána, tozalákí baómbo ba makambo ma nsé eye.

4:4  Kasi áwa mikolo Nzámbe alakákí mikokí, atíndí Mwána wa yě : abótámí na mwásí mpé asengélákí kotósa Mobéko,

4:5  mpô ’te ásikola baye basengélí kotósa Mobéko, mpé ákómisa bangó bána ba Nzámbe.

4:6  Ya sôló, bozalí bána ba yě, zambí atíndí o mitéma mya bínó Elímo wa Mwána wa yě, óyo azalí kobélela : Aba, lokóla ’te : Tatá !

4:7  Yangó wâná ozalí lisúsu moómbo té, kasi mwána. Bôngó sókó ozalí mwána, okosangola mpé bilóko bya tatá.

4:8  Libosó boyébákí Nzámbe té, bozalákí kokúmisa banzámbe baye bazalí banzámbe ba sôló té.

4:9  Kasi sikáwa boyébí Nzámbe, malámu kútu náloba : Nzámbe ayébí bínó ; bôngó bóníbóní bozalí kozóngela bikelámo biye bizángí ngúyá mpé ntína ? Bolingí ndé kokóma lisúsu baómbo ba byangó ?

4:10  Bokómí kotósa lisúsu mibéko mya biyenga, mya mikolo, mya sánzá, mya bilanga mpé mya mbúla.

4:11  Bozalí kobá­ngisa ngáí. Mosálá mónso nasálákí epái ya bínó mokeí ndé mpámba ?

4:12  Bandeko, namíkómísí lokóla bínó ; nabóndélí bínó, bókóma lokóla ngáí. Naíno bosálákí ngáí mabé mǒkó té.

4:13  Boyébí yangó : nakokákí kosangela bínó Nsango Elámu mbala ya yambo mpô nazalákí kobéle.

4:14  Atâ mpási ya ngáí ezalákí komemisa bínó mókúmbá, bokínólákí ngáí té, mpé boyókákí ngáí mpi té. Boyambákí ngáí lokóla ntóma wa Nzámbe, lokóla Krístu Yézuméí.

4:15  Bozalákí koyóka esengo enéne o mikolo mîná. Bóní sikáwa ? Nalobí ya sôló : Sókó ekokákí kosálema, bolingákí kopésa ngáí atâ míso ma bínó.

4:16  Sikáwa nakómí ndé mongúná wa bínó mpô nalakísí bínó matéya ma sôló ?

4:17  Na mayéle mabé bato basúsu bazalí koluka kobénda bínó mpô ’te bísó na bínó tókabwana, bôngó bólanda bangó.

4:18  Kokangana na bato basúsu ezalí malámu, kasi bobélé na bato balámu, mpé ntángo ínso ; bósála bobélé bôngó té ntángo nazalí epái ya bínó.

4:19  Bána ba ngáí ba bolingo, lokóla mwásí alingí ábóta, nazalí koyóka lisúsu mpási mpô ya bínó téé ntángo bokokóma bakóló o boyambi Krístu.

4:20  Sókó nakokákí kozala epái ya bínó sikáwa, mbele nayébákí níni nasengélí koloba na bínó, mpô nayébí té níni násála na bínó.

4:21  Bóyébisa ngáí, bínó bato boli­ngí kotósa Mobéko : maye makomámí o Mobéko, boyébí mangó té ?

4:22  Ya sôló, ekomámí ’te Abaráma azalákí na bána babáli bábalé : mǒkó abótámí na mwásí moómbo, mosúsu na mwásí nsómí.

4:23  Mwána wa mwásí moómbo abótámí sé na makási ma nzóto, kasi óyo wa mwásí nsómí abótámí mpô ya elakó Nzámbe alakélákí.

4:24  Lisoló liye lizalí na ntína : básí baye bábalé bazalí kolakisa Bondeko bwa Kala mpé Bondeko bwa Sika. O ngómbá Sinai Nzámbe akátákí Bondeko bwa Kala ; o ntángo êná Agar abótákí bána baómbo.

4:25  Ngómbá Sinai eye ezalí o Arábia, ezalí lokóla Yerúzalem ya leló : ezalí sé moómbo, ná mpé bána ba yangó.

4:26  Kasi Yerúzalem ya likoló ezalí lokóla mwásí nsómí, yangó ndé mamá wa bísó.

4:27  Mpô ekomámí o Minkandá : Sepélá, yǒ ekomba, yǒ mwásí okobótaka té ! Gángá migángo mya esengo, yǒ mwásí oyébí mpási ya kobóta té ! Mpô mwásí óyo abóyámí na mobáli, akozala na bána ebelé, leká mwásí óyo azalí na mobáli.

4:28  Bandeko, bínó bozalí bána babótámí mpô ya elakó, sé lokóla Izáka.

4:29  Kasi lokóla ezaláká kala, ezalí sé bôngó téé sikáwa : mwána abótámí na makási ma nzóto anyókólí mwána abótámí na Elímo wa Nzámbe.

4:30  Kasi bakomí níni o Minkandá Misántu ? Bengáná mwásí moómbo na mwána wa yě, zambí mwána wa moómbo akokí kozwa bomengo bwa tatá elongó na mwána wa mwásí nsómí té.

4:31  Bôngó, bandeko, tozalí bána ba mwásí moómbo té, kasi bána ba mwásí nsómí.