SP - Genesis - 45

45:1  ולא יכל יוסף להתאפק לכל הנצבים עליו ויקרא והוציאו כל איש מעליו ולא עמד איש אתו בהתודע יוסף אל אחיו

45:2  ויתן את קולו בבכי וישמעו מצרים וישמעו בית פרעה

45:3  ויאמר יוסף אל אחיו אני יוסף העוד אבי חי ולא יכלו אחיו לענות אתו כי נבהלו מפניו

45:4  ויאמר יוסף אל אחיו גשו נא אלי ויגשו ויאמר אני יוסף אחיכם אשר מכרתם אתי מצרימה

45:5  ועתה אל תעצבו ואל יחר בעיניכם כי מכרתם אתי הנה כי למחיה שלחני אלהים לפניכם

45:6  כי זה שנתים רעב בקרב הארץ ועוד חמש שנים אשר אין חריש וקציר

45:7  וישלחני אלהים לפניכם לשים לכם שארות בארץ ולהחיות לכם פלטה גדלה

45:8  ועתה לא אתם שלחתם אתי הנה כי האלהים וישמני לאב לפרעה ולאדון לכל ביתו ומשל בכל ארץ מצרים

45:9  מהרו ועלו אל אבי ואמרתם אליו כה אמר בנך יוסף שמני אלהים לאדון לכל מצרים רדה אלי אל תעמד

45:10  וישבת בארץ גשן והיית קרוב אלי אתה ובניך ובני בניך צאנך ובקרך וכל אשר לך

45:11  וכלכלתי אתך שם כי עוד חמש שנים רעב פן תורש אתה וביתך וכל אשר לך

45:12  והנה עיניכם ראות ועיני אחי בנימים כי פיי המדבר אליכם

45:13  והגדתם לאבי את כל כבודי במצרים ואת כל אשר ראיתם ומהרתם והורדתם את אבי הנה

45:14  ויפל על צואר . בנימים אחיו ויבך . ובנימים בכה על צוארו

45:15  וינשק לכל אחיו ויבך עליהם ואחרי כן דברו אחיו אתו

45:16  והקול נשמע בית פרעה לאמר באו אחי יוסף וייטב בעיני פרעה ובעיני עבדיו

45:17  ויאמר פרעה אל יוסף אמר אל אחיך זאת עשו טענו את בעירכם ולכו ובאו ארצה כנען

45:18  וקחו את אביכם ואת בתיכם ובאו אלי ואתן לכם את טוב ארץ מצרים ואכלו את חלב הארץ

45:19  ואתה צויתי זאת עשו קחו לכם מארץ מצרים עגלות לטפכם ולנשיכם ונשאתם את אביכם ובאתם

45:20  ועיניכם אל תחוס על כליכם כי טוב כל ארץ מצרים לכם הוא

45:21  ויעשו כן בני ישראל ויתן להם יוסף עגלות על פי פרעה ויתן להם צדה לדרך

45:22  לכלם נתן לאיש חליפת שמלות ולבנימים נתן שלש מאות כסף וחמש חליפת שמלות

45:23  ולאביו שלח כזאת עשרה חמרים נשאים מטוב ארץ מצרים ועשר אתנות נשאות בר ולחם ומזון לאביו לדרך

45:24  וישלח את אחיו וילכו ויאמר אלהים אל תתרגזו בדרך

45:25  ויעלו ממצרים ויבאו ארצה כנען אל יעקב אביהם

45:26  ויגדו לו לאמר עוד יוסף חי וכי הוא משל בכל ארץ מצרים ויפג לבו כי לא האמן להם

45:27  וידברו אליו את כל דברי יוסף אשר דבר אליהם וירא את העגלות אשר שלח יוסף לשאת אתו ותחי רוח יעקב אביהם

45:28  ויאמר ישראל רב עוד יוסף בני חי אלכה ואראנו בטרם אמות