SP - Genesis - 9

9:1  ויברך אלהים את נח ואת בניו ויאמר להם פרו ורבו ומלאו את הארץ

9:2  ומראכם וחתתכם יהיה על כל חית הארץ ועל כל עוף השמים בכל אשר תרמש האדמה ובכל דגי הים בידכם נתתיו

9:3  כל רמש אשר הוא חי לכם יהיה לאכלה כירק עשב נתתי לכם את הכל

9:4  אך בשר בנפשו דמו לא תאכלו

9:5  ואך את דמכם לנפשתיכם אדרש מיד כל חי אדרשנו מיד האדם מיד איש ואחיו אדרש את נפש האדם

9:6  שפך דם האדם באדם דמו ישפך כי בצלם אלהים עשה את האדם

9:7  ואתם פרו ורבו ושרצו בארץ ורבו בה

9:8  ויאמר אלהים אל נח ואל בניו אתו לאמר

9:9  ואני הנני מקים את בריתי אתכם ואת זרעכם אחריכם

9:10  ואת כל נפש החיה אשר אתכם בעוף ובבהמה ובכל חית הארץ אתכם מכל יצאי התבה לכל חית הארץ

9:11  והקמתי את בריתי אתכם ולא יכרת עוד כל בשר . ממי המבול ולא יהיה עוד המבול להשחית הארץ

9:12  ויאמר אלהים זאת אות הברית אשר אני נתן ביני ובינכם ובין כל נפש החיה אשר אתכם לדרת עולם

9:13  את קשתי נתתי בענן והיתה לאות ברית ביני ובין הארץ

9:14  והיה בענני ענן על הארץ ונראתה הקשת בענן

9:15  וזכרתי את בריתי אשר ביני ובינכם ובין כל נפש החיה אשר אתכם בכל בשר ולא יהיה עוד המים למבול להשחית כל בשר

9:16  והיתה הקשת בענן וראיתה לאזכרה ברית עולם בין אלהים ובין כל נפש החיה בכל בשר אשר על הארץ

9:17  ויאמר אלהים אל נח זאת אות הברית אשר הקמתי ביני ובין כל בשר אשר על הארץ

9:18  ויהיו בני נח היצאים מן התבה שם חם ויפת וחם הוא אבי כנען

9:19  שלשה אלה בני נח מאלה נפצה כל הארץ

9:20  ויחל נח איש האדמה ויטע כרם

9:21  וישת מן היין וישכר ויתגל בתוך אהלו

9:22  וירא חם אבי כנען את ערות אביו ויגד לשני אחיו בחוץ

9:23  ויקח שם ויפת את השמלה וישמו על שכם שניהם וילכו אחרנית ויכסו את ערות אביהם ופניהם אחרנית וערות אביהם לא ראו

9:24  ויקץ נח מיינו וידע את אשר עשה לו בנו הקטן

9:25  ויאמר ארור כנען עבד עבדים יהיה לאחיו

9:26  ויאמר ברוך יהוה אלהי שם ויהי כנען עבד למו

9:27  יפת אלהים ליפת וישכן באהלי שם ויהי כנען עבד למו

9:28  ויחי נח אחרי המבול שלש מאות שנה וחמשים שנה

9:29  ויהיו כל ימי נח תשע מאות שנה וחמשים שנה וימת