SP - Genesis - 37

37:1  וישב יעקב בארץ מגרי אביו בארץ כנען

37:2  אלה תולדת יעקב יוסף בן שבע עשרה שנה היה רעה את אחיו בצאן והוא נער את בני בלהה ואת בני זלפה נשי אביו ויבא יוסף את דבתם רעה אל אביהם

37:3  וישראל אהב את יוסף מכל בניו כי בן זקנים הוא לו ויעש לו כיתנת פסים

37:4  ויראו אחיו כי אתו אהב אביהם מכל בניו וישנאו אתו ולא יכלו דברו לשלום

37:5  ויחלם יוסף חלום ויגד לאחיו ויוספו עוד שנא אתו

37:6  ויאמר אליהם שמעו נא החלום הזה אשר חלמתי

37:7  והנה אנחנו מאלמים אלמים בתוך השדה והנה קמה אלמתי וגם נצבה והנה תסבנה אלמתיכם ותשתחוינה לאלמתי

37:8  ויאמרו לו אחיו המלך תמלך עלינו אם משל תמשל בנו ויוספו עוד שנא אתו על חלמיו ועל דבריו

37:9  ויחלם עוד חלום אחר ויספר אתו לאחיו ויאמר הנה חלמתי חלום עוד והנה השמש והירח ואחד עשר כוכבים משתחוים לי

37:10  ויספר לאביו . ולאחיו . ויגער בו אביו ויאמר לו מה החלום הזה אשר חלמת הבא נבוא אני ואמך ואחיך להשתחות לך ארצה

37:11  ויקנאו בו אחיו ואביו שמר את הדבר

37:12  וילכו אחיו לרעות את צאן אביהם בשכם

37:13  ויאמר ישראל אל יוסף הלוא אחיך רעים בשכם לך ואשלחך אליהם ויאמר לו הנני

37:14  ויאמר לו לך נא וראה את שלום אחיך ואת שלום הצאן והשבני דבר וישלחהו מעמק חברון ויבא שכמה

37:15  וימצאהו האיש והנה תעה בשדה וישאלהו האיש לאמר מה תבקש

37:16  ויאמר את אחי אנכי מבקש הגידה נא לי איפה הם רעים

37:17  ויאמר האיש נסעו מזה כי שמעתם אמרים נלכה דתינה וילך יוסף אחרי אחיו וימצאם בדתין

37:18  ויראו אתו מרחק בטרם יקרב אליהם ויתנכלו אתו להמיתו

37:19  ויאמרו איש אל אחיו הנה בעל החלמות הלז בא

37:20  ועתה לכו ונהרגהו ונשלכהו באחד הברות ואמרנו חיה רעה אכלתו ונראה מה יהיה חלמתיו

37:21  וישמע ראובן ויצלו מידם ויאמר לא נכנו נפש

37:22  ויאמר אליהם ראובן אל תשפכו דם השליכו אתו אל הבור הזה אשר במדבר ויד אל תשלחו בו למען הציל אתו מידם להשיבו אל אביו

37:23  ויהי כאשר בא יוסף אל אחיו ויפשטו את יוסף את כיתנתו את כיתנת הפסים אשר עליו

37:24  ויקחו וישלכו אתו הבור והבור רק אין בו מים

37:25  וישבו לאכל לחם וישאו עיניהם ויראו והנה ארחת ישמעאלים באה מגלעד וגמליהם נשאים נכאת וצרי ולוט הלכים להוריד מצרימה

37:26  ויאמר יהודה אל אחיו מה בצע כי נהרג את אחינו וכסינו את דמו

37:27  לכו ונמכרנו לישמעאלים וידנו אל תהיה בו כי אחינו ובשרנו הוא וישמעו אחיו

37:28  ויעברו אנשים מדינים סחרים וימשכו ויעלו את יוסף מן הבור וימכרו את יוסף לישמעאלים בעשרים כסף ויביאו את יוסף מצרימה

37:29  וישב ראובן אל הבור והנה אין יוסף בבור ויקרע את בגדיו

37:30  וישב אל אחיו ויאמר הילד איננו ואני אנה אני בא

37:31  ויקחו את כיתנת יוסף וישחטו שעיר עזים ויטבלו את הכיתנת בדם

37:32  וישלחו את כיתנת הפסים ויביאוה אל אביהם ויאמרו זאת מצאנו הכר נא הכיתנת בנך היא אם לא

37:33  ויכרה ויאמר כיתנת בני היא חיה רעה אכלתו טרף טרף יוסף

37:34  ויקרע יעקב שמלתיו וישם שק במתניו ויתאבל על בנו ימים רבים

37:35  ויקמו כל בניו וכל בנתיו לנחמו וימאן להתנחם ויאמר כי ארד על בני אבל שאלה ויבך אתו אביו

37:36  והמדינים מכרו את יוסף מצרימה לפוטיפר סריס פרעה שר הטבחים