SP - Genesis - 30

30:1  ותרא רחל כי לא ילדה ליעקב ותקנא רחל באחתה ותאמר אל יעקב הבה לי בנים ואם אין מתה אנכי

30:2  ויחר אף יעקב ברחל ויאמר התחת אלהים אנכי אשר מנע ממך פרי בטן

30:3  ותאמר הנה אמתי בלהה בא אליה ותלד על ברכי ואבנה גם אנכי ממנה

30:4  ותתן לו את בלהה שפחתה לאשה ויבא אליה יעקב

30:5  ותהר בלהה ותלד ליעקב בן

30:6  ותאמר רחל דנני אלהים וגם שמע בקולי ויתן לי בן על כן קראה שמו דן

30:7  ותהר עוד ותלד בלהה שפחת רחל בן שני ליעקב

30:8  ותאמר רחל נפתלי אלהים נפתלתי עם אחתי וגם יכלתי ותקרא את שמו נפתלי

30:9  ותרא לאה כי עמדה מלדת ותקח את זלפה שפחתה ותתן אתה ליעקב לאשה

30:10  ותלד זלפה שפחת לאה ליעקב בן

30:11  ותאמר לאה בגד ותקרא את שמו גד

30:12  ותלד זלפה שפחת לאה בן שני ליעקב

30:13  ותאמר לאה באשרי כי אשרוני בנות ותקרא את שמו אשר

30:14  וילך ראובן בימי קציר חטים וימצא דודאים בשדה ויבא אתם אל לאה אמו ותאמר רחל אל לאה תני נא לי מדודאי בנך

30:15  ותאמר לה המעט קחתך את אישי ולקחתי גם את דודאי בני ותאמר רחל לכן ישכב עמך הלילה תחת דודאי בנך

30:16  ויבא יעקב מן השדה בערב ותצא לאה לקראתו ותאמר אלי תבוא כי שכר שכרתך בדודאי בני וישכב עמה בלילה ההוא

30:17  וישמע אלהים אל לאה ותהר ותלד ליעקב בן חמישי

30:18  ותאמר לאה נתן אלהים שכרי אשר נתתי שפחתי לאישי ותקרא את שמו יששכר

30:19  ותהר עוד לאה ותלד בן ששי ליעקב

30:20  ותאמר לאה זבדני אלהים אתי זבד טוב הפעם יזבלני אישי כי ילדתי לו ששה בנים ותקרא את שמו זבולן

30:21  ואחר ילדה בת ותקרא את שמה דינה

30:22  ויזכר אלהים את רחל וישמע אליה אלהים ויפתח את רחמה

30:23  ותהר ותלד בן ותאמר אסף אלהים את חרפתי

30:24  ותקרא את שמו יוסף לאמר יסף יהוה לי בן אחר

30:25  ויהי כאשר ילדה רחל את יוסף ויאמר יעקב אל לבן שלחני ואלכה אל מקומי ואל ארצי

30:26  תנה את נשי ואת ילדי אשר עבדתי אתך בהן ואלכה כי אתה ידעת את עבדתי אשר עבדתיך

30:27  ויאמר אליו לבן אם נא מצאתי חן בעיניך נחשתי ויברכני יהוה בגללך

30:28  ויאמר נקבה שכרך עלי ואתנה

30:29  ויאמר אליו אתה ידעת את אשר עבדתיך ואת אשר היה מקניך אתי

30:30  כי מעט אשר היה לך לפני ויפרץ לרב ויברך יהוה אתך לרגלי ועתה מתי אעשה גם אנכי לביתי

30:31  ויאמר מה אתן לך ויאמר יעקב לא תתן לי מאומה אם תעשה לי את הדבר הזה אשובה ארעה צאנך אשמר

30:32  אעבר בכל צאנך היום הסר משם כל שה נקוד וטלוא וכל שה חום בכשבים וטלוא ונקוד בעזים והיה שכרי

30:33  וענתה בי צדקתי ביום מחר כי יבוא על שכרי לפניך כל אשר איננו נקוד וטלוא בעזים וחום בכשבים גנוב הוא אתי

30:34  ויאמר לבן והן לא יהיה כדבריך

30:35  ויסר ביום ההוא את התישים העקדים והטלאים ואת כל העזים הנקדות והטלאת כל אשר לבן בו וכל חום בכשבים ויתן ביד בניו

30:36  וישם דרך שלשת ימים בינם ובין יעקב ויעקב רעה את צאן לבן הנותרת ויאמר מלאך אלהימ אל יעקב בחלום ויאמר יעקב ויאמר הנני ויאמר שא נא עיניך וראה את כל העתודים העלים על הצאן עקדים נקדים וברדים כי ראיתי את אשר לבן עשה לך אנכי האל בית אל אשר משחת שם מצבה ואשר נדרת לי שם נדר ועתה קום צא מן הארץ הזאת ושוב אל ארץ אביך ואיטיב עמך

30:37  ויקח לו יעקב מקל לבנה לח ולוז וערמון ויפצל בהם פצלות לבנות מחשף הלבן אשר על המקלות

30:38  ויצג את המקלות אשר פצל ברהטים בהשקות המים אשר תבאנה הצאן לשתות לנכח הצאן ויחמנה בבאנה לשתות

30:39  ויחמנה הצאן על המקלות ותלדנה הצאן עקדים נקדים וטלאים

30:40  והכשבים הפריד יעקב ויתן פני הצאן איל עקוד וכל חום בצאן לבן וישת לו עדרים לבדו ולא שתם על צאן לבן

30:41  ויהי בכל יחם הצאן המקשרות ישים יעקב את המקלות לעיני הצאן ברהטים ליחמנה במקלות

30:42  ובהעטיף הצאן לא ישים והיו העטופים ללבן והקשרים ליעקב

30:43  ויפרץ האיש מאד מאד ויהי לו צאן רבות ושפחות ועבדים וגמלים וחמרים