SP - Genesis - 31

31:1  וישמע את דברי בני לבן לאמר לקח יעקב את כל אשר לאבינו ומאשר לאבינו עשה את כל הכבוד הזה

31:2  וירא יעקב את פני לבן והנה אינם עמו כתמול שלשום

31:3  ויאמר יהוה אל יעקב שוב אל ארץ אבתיך ואל מולדתך ואהיה עמך

31:4  וישלח יעקב ויקרא לרחל וללאה השדה אל צאנו

31:5  ויאמר להן ראה אנכי את פני אביכן כי אינם אלי כתמול שלשום ואלהי אבי היה עמדי

31:6  ואתן ידעתן כי בכל כחי עבדתי את אביכן

31:7  ואביכן התל בי ויחלף את משכרתי עשרת מנים ולא נתנו יהוה להריע עמדי

31:8  אם כה יאמר נקדים יהיה שכרך וילדו כל הצאן נקדים ואם כה יאמר עקדים יהיה שכרך וילדו כל הצאן עקדים

31:9  ויצל יהוה את מקנה אביכן ויתן לי

31:10  ויהי בעת יחם הצאן ואשא עיני ואראה בחלום והנה העתודים העלים על הצאן עקדים נקדים וברדים

31:11  ויאמר אלי מלאך האלהים בחלום יעקב ואמר הנני

31:12  ויאמר שא נא עיניך וראה את כל העתודים העלים על הצאן עקדים נקדים וברדים כי ראיתי את כל אשר לבן עשה לך

31:13  אנכי האל בית אל אשר משחת שם מצבה ואשר נדרת לי שם נדר ועתה קום צא מן הארץ הזאת ושוב אל ארץ מולדתך

31:14  ותען רחל ולאה ותאמרנה לו העוד לנו חלק ונחלה בבית אבינו

31:15  הלוא כנכריות נחשבנו לו כי מכרנו ויאכל גם אכל את כספנו

31:16  כי כל העשר אשר הציל יהוה מאבינו לנו הוא ולבנינו ועתה כל אשר אמר אליך אלהים עשה

31:17  ויקם יעקב וישא את נשיו ואת בניו על הגמלים

31:18  וינהג את כל מקנהו ואת כל רכשו אשר רכש מקנה קנינו אשר רכש בפדן ארם לבוא אל יצחק אביו ארצה כנען

31:19  ולבן הלך לגז את צאנו ותגנב רחל את התרפים אשר לאביה

31:20  ויגנב יעקב את לב לבן הארמי עד בלתי הגיד לו כי ברח הוא

31:21  ויברח הוא וכל אשר לו ויקם ויעבר את הנהר וישם את פניו הר הגלעד

31:22  ויגד ללבן ביום השלישי כי ברח יעקב

31:23  ויקח את אחיו עמו וירדף אחריו דרך שבעת ימים וידבק אתו בהר הגלעד

31:24  ויבא אלהים אל לבן הארמי בחלום הלילה ויאמר לו השמר לך פן תדבר עם יעקב מטוב עד רע

31:25  וישג לבן את יעקב ויעקב תקע את אהלו בהר ולבן תקע את אחיו בהר הגלעד

31:26  ויאמר לבן ליעקב מה עשית ותגנב את לבבי ותנהג את בנותי כשביות חרב

31:27  למה נחבת לברח ותגנב אתי ולא הגדת לי ואשלחך בשמחה ובשרים בתף ובכנר

31:28  ולא נטשתני לנשק לבני ולבנותי עתה הסכלת עשות

31:29  יש לאל ידי לעשות עמך רע ואלהי אביך אמש אמר אלי לאמר השמר לך מדבר עם יעקב מטוב עד רע

31:30  ועתה הלך הלכת כי נכסף נכספת לבית אביך למה גנבת את אלהי

31:31  ויען יעקב ויאמר ללבן כי יראתי כי אמרתי פן תגזל את בנתיך מעמי

31:32  עם אשר תמצא את אלהיך לא יחיה נגד אחינו הכר לך מה עמדי וקח לך ולא ידע יעקב כי רחל גנבתם

31:33  ויבא לבן ויחפש באהל יעקב ובאהל לאה ובאהל שתי השפחות ולא מצא ויצא מאהל לאה ויבא באהל רחל

31:34  ורחל לקחה את התרפים ותשמם בכר הגמל ותשב עליהם וימשש לבן את כל האהל ולא מצא

31:35  ותאמר אל אביה אל יחר בעיני אדני כי לוא אוכל לקום מפניך כי דרך הנשים לי ויחפש ולא מצא את התרפים

31:36  ויחר ליעקב וירב בלבן ויען יעקב ויאמר ללבן מה פשעי ומה חטאתי כי דלקת אחרי

31:37  וכי מששת את כל כלי מה מצאת מכל כלי ביתך שים כה נגד אחי ואחיך ויוכיחו בין שנינו

31:38  זה עשרים שנה אנכי עמך רחליך ועזיך לא שכלו אילי צאנך לא אכלתי

31:39  טרפה לא הבאתי אליך אנכי אחטנה מידי . גנובת יום וגנובת לילה

31:40  הייתי ביום אכלני חרב וקרח בלילה ותדד שנתי מעיני

31:41  זה לי עשרים שנה בביתך עבדתיך ארבע עשרה שנה בשתי בנתיך ושש שנים בצאנך ותחלף את משכרתי עשרת מנים

31:42  לו לא אלהי אבי אלהי אברהם ופחד יצחק היה לי כי עתה ריקם שלחתני את עניי ואת יגע כפי ראה אלהים ויוכיח אמש

31:43  ויען לבן ויאמר אל יעקב הבנות בנותי והבנים בני והצאן צאני וכל אשר אתה ראה לי הוא ולבנותי מה אעשה לאלה היום או לבניהם אשר ילדו

31:44  ועתה לכה נכרתה ברית אני ואתה והיה לעד ביני ובינך

31:45  ויקח יעקב אבן וירמה מצבה

31:46  ויאמר יעקב לאחיו לקטו אבנים ויקחו אבנים ויעשו גל ויאכלו שם על הגל

31:47  ויקרא לו לבן יגר שהדותה ויעקב קרא לו גלעד

31:48  ויאמר לבן הגל הזה עד ביני ובינך היום על כן קרא שמו גלעד

31:49  והמצבה אשר אמר יצף יהוה ביני ובינך כי נסתר איש מרעהו

31:50  אם תענה את בנותי ואם תקח נשים על בנותי אין איש עמנו ראה אלהים עד ביני ובינך

31:51  ויאמר לבן ליעקב הנה הגל הזה והנה המצבה אשר ירית ביני ובינך

31:52  עד הגל הזה ועדה המצבה אם אני לא אעבר אליך את הגל הזה ואם אתה לא תעבר אלי את הגל הזה ואת המצבה הזאת לרעה

31:53  אלהי אברהם ואלהי נחור ישפט ביננו אלהי אברהם וישבע יעקב בפחד אביו יצחק

31:54  ויזבח יעקב זבח בהר ויקרא לאחיו לאכל לחם ויאכלו לחם וילינו בהר