SP - Genesis - 29

29:1  וישא יעקב רגליו וילך ארץ בני קדם

29:2  וירא והנה באר בשדה והנה שם שלשה עדרי צאן רבצים עליה כי מן הבאר ההיא ישקו העדרים ואבן גדלה על פי הבאר

29:3  ונאספו שם כל הרעים וגללו את האבן מעל פי הבאר והשקו את הצאן והשיבו את האבן על פי הבאר למקומה

29:4  ויאמר להם יעקב אחי מאין אתם ויאמרו מחרן אנחנו

29:5  ויאמר להם הידעתם את לבן בן נחור ויאמרו ידענו

29:6  ויאמר להם השלום לו ויאמרו שלום והנה רחל בתו באה עם הצאן

29:7  ויאמר להם הן עוד היום גדול לא עת האסף המקנה השקו הצאן ולכו רעו

29:8  ויאמרו לא נוכל עד אשר יאספו כל הרעים וגללו את האבן מעל פי הבאר והשקינו הצאן

29:9  עודנו מדבר עמם ורחל באה עם הצאן אשר לאביה כי רעה היא

29:10  ויהי כאשר ראה יעקב את רחל בת לבן אחי אמו ואת צאן לבן אחי אמו ויגש יעקב ויגל את האבן מעל פי הבאר וישק את צאן לבן אחי אמו

29:11  וישק יעקב לרחל וישא את קולו ויבך

29:12  ויגד יעקב לרחל כי אחי אביה הוא וכי בן רבקה הוא ותרץ ותגד לאביה

29:13  ויהי כשמע לבן את שמע יעקב בן אחתו וירץ לקראתו ויחבק לו וינשק לו ויבאהו אל ביתו ויספר ללבן את כל הדברים האלה

29:14  ויאמר לו לבן אך עצמי ובשרי אתה וישב עמו חדש ימים

29:15  ויאמר לבן ליעקב הכי אחי אתה ועבדתני חנם הגידה לי מה משכרתך

29:16  וללבן שתי בנות שם הגדלה לאה ושם הקטנה רחל

29:17  ועיני לאה רכות ורחל היתה יפת תאר ויפת מראה

29:18  ויאהב יעקב את רחל ויאמר אעבדך שבע שנים ברחל בתך הקטנה

29:19  ויאמר לבן טוב תתי אתה לך מתתי אתה לאיש אחר שב עמדי

29:20  ויעבד יעקב ברחל שבע שנים ויהיו בעיניו כימים אחדים באהבתו אתה

29:21  ויאמר יעקב אל לבן הבה את אשתי כי מלאו ימי ואבא אליה

29:22  ויאסף לבן את כל אנשי המקום ויעש משתה

29:23  ויהי בערב ויקח את לאה בתו ויבא אתה אליו ויבא אליה יעקב

29:24  ויתן לבן . את זלפה שפחתו ללאה בתו לשפחה

29:25  ויהי בבקר והנה היא לאה ויאמר אל לבן מה זאת עשית לי הלוא ברחל עבדתי עמך ולמה רמיתני

29:26  ויאמר לבן לא יעשה כן במקומנו לתת הצעירה לפני הבכירה

29:27  מלא שבע זאת ואתן לך גם את זאת בעבדה אשר תעבד עמדי עוד שבע שנים אחרות

29:28  ויעש יעקב כן וימלא שבע זאת ויתן לו את רחל בתו לו לאשה

29:29  ויתן לבן לרחל בתו את בלהה שפחתו לה לשפחה

29:30  ויבא גם אל רחל ויאהב גם את רחל מלאה ויעבד עמו עוד שבע שנים אחרות

29:31  וירא יהוה כי שנואה לאה ויפתח את רחמה ורחל עקרה

29:32  ותהר לאה ותלד בן ותקרא את שמו ראובן כי אמרה כי ראה יהוה בעניי כי עתה יאהבני אישי

29:33  ותהר עוד ותלד בן ותאמר כי שמע יהוה כי שנואה אנכי ויתן לי גם את זה ותקרא את שמו שמעון

29:34  ותהר עוד ותלד בן ותאמר עתה הפעם ילוה אישי אלי כי ילדתי לו שלשה בנים על כן קראה שמו לוי

29:35  ותהר עוד ותלד בן ותאמר הפעם אודה את יהוה על כן קראה שמו יהודה ותעמד מלדת