Kapingamarangi - I Kings - 13

13:1  Dimaadua gu-haganoho-aga dahi soukohp mai Judah gii-hana gi Bethel, gei mee guu-dau i-golo i-di madagoaa o Jeroboam nogo duu i-di gowaa dudu tigidaumaha e-hai dana tigidaumaha.

13:2  Soukohp deelaa ga-haga-halauwa di gowaa dudu tigidaumaha, e-daudali taganoho mai baahi Dimaadua, ga-helekai, “Di gowaa dudu tigidaumaha, di gowaa dudu tigidaumaha. Deenei telekai Dimaadua ne-hai: Di tama e-hagaingoo bolo Josiah ga-haanau mai i-di madahaanau o David. Mee ga-daaligi gii-mmade i oo nua digau hai-mee-dabu ala e-hai-hegau i-nia gowaa dudu tigidaumaha o digau bouli ala e-hai nadau tigidaumaha i oo nua, gei mee gaa-dudu ana iwi daangada i oo nua.”

13:3  Soukohp ga-duudagi ana helekai, “Di gowaa dudu tigidaumaha deenei la-ga-mooho gi-daha, gei nia lehu ga-meheu gi-hongo tenua. Gei goodou ga-iloo-laa bolo Dimaadua ne-helekai-adu i dogu baahi.”

13:4  King Jeroboam ga-longono-hua di mee deenei, gei mee gaa-hihi dono lima gi mee mo-di helekai, “Kumu-ina taane deelaa.” Di madagoaa hua deelaa, gei di lima di king guu-made, gei mee gu-deemee di-hagabiga-mai dono lima.

13:5  Di gowaa dudu tigidaumaha gu-meheu gi-daha, gei nia lehu gu-meheu gi-hongo tenua, be-di hai di soukohp ne-helekai-ai i-di ingoo Dimaadua.

13:6  King Jeroboam ga-helekai gi-di soukohp, “Goe dumaalia dalodalo i-di-au gi Dimaadua doo God, dangi gi Mee gi-hagahili-ina dogu lima!” Soukohp guu-dangi ang-gi Dimaadua gei di lima di king guu-hili.

13:7  Gei di king ga-helekai gi-di soukohp, “Hanimoi i ogu muli gi dogu hale e-miami. Au gaa-hui goe gi dau mee dela ne-hai.”

13:8  Soukohp ga-helekai, “Ma e-aha maa goe ga-gaamai di baahi do maluagina, gei au hagalee hana i oo muli, be miami, be inu hunu mee i do baahi.

13:9  Dimaadua gu-helekai-mai bolo gi-hudee miami be inu dahi mee, gei gi-hudee hana labelaa gi-muli i-di ala ne-hanimoi-iei au.”

13:10  Malaa, gei mee digi hana i-di ala dela ne-hanimoi-iei mee, gei ne-hana i tuai ala.

13:11  I-di madagoaa deelaa, dahi soukohp madua e-noho i Bethel. Ana dama-daane ne-hagi-anga gi mee nia mee di soukohp mai Judah ala ne-hai i Bethel i-di laangi deelaa mo ana helekai ne-hai gi-di King Jeroboam.

13:12  Soukohp madua ga-heeu gi digaula, “Mee ne-hagatanga gaa-hana di ala dehee?” Gei digaula ga-hagi-anga gi mee di ala dela ne-hana-iei mee.

13:13  Gei mee ga-helekai gi digaula gi-hagatogomaalia-ina dana ‘donkey’. Digaula gu-hagatogomaalia di donkey a-maa, gei mee gu-hagatanga guu-hana,

13:14  laa-hongo dana ala i-muli di soukohp mai Judah, gaa-gida a-mee e-noho i-lala di laagau-‘oak’. Mee ga-heeu, “Goe go-di soukohp mai Judah?” Taane ga-helekai, “Ko-au.”

13:15  Mee ga-helekai, “Hanimoi gi dogu hale e-miami madalia au.”

13:16  Gei soukohp mai Judah ga-helekai, “Au e-deemee di-hana i oo muli gi doo hale e-hagagila-aga do dumaalia. Gei au hagalee miami dalia goe be inu dahi mee i do baahi i-kinei,

13:17  idimaa Dimaadua gu-helekai-mai bolo au gi-hudee miami be inu dahi mee, gei gi-hudee hana labelaa gi-muli i dogu ala ne-hanimoi-ai.”

13:18  Gei soukohp madua mai Bethel ga-helekai gi mee, “Au labelaa di soukohp e-hai be goe, gei Dimaadua gu-hagau-mai dana dangada di-langi gi-helekai-mai bolo au gi-lahia goe i ogu muli gi dogu hale gi-gowadu nia meegai.” Gei soukohp madua guu-hai dana kai dilikai.

13:19  Malaa, Soukohp mai Judah guu-hana i-muli soukohp madua gu-miami dalia a-mee.

13:20  I-di nau noho-hua i teebele, nnelekai Dimaadua ga-dau-mai gi-di soukohp madua,

13:21  ga-helekai gi-nua gi-di soukohp mai Judah, “Dimaadua guu-hai bolo goe gu-de hagalongo ang-gi de-Ia, gei digi hai gii-hai be ana helekai.

13:22  Goe guu-huli gu-hanimoi gi-muli gu-miami i-di gowaa a-Mee ne-hai bolo goe gi-hudee miami-ai. Idimaa di mee deenei, goe ga-daaligi gii-made, gei do huaidina hagalee danu i-baahi nia daalunga oo gau.”

13:23  I-muli di-nau miami, gei soukohp madua ga-haganoho di lohongo gi-hongo di ‘donkey’ gaa-wanga gi-di soukohp mai Judah,

13:24  gei mee gaa-hana i-hongo di ala, gei di laion ga-hanimoi gi mee ga-daaligi a-mee gii-made. Tuaidina o-maa gaa-moe i-hongo di ala i-golo, gei di ‘donkey’ mo-di laion e-tuu i-baahi o mee.

13:25  Nia daane ne-loomoi-laalaa ga-gidee tuaidina i-hongo di ala, mo-di laion e-duu i-baahi di-maa. Digaula gaa-hula gi Bethel ga-hagi-anga nadau mee ne-gidee-ginaadou.

13:26  Soukohp madua ga-hagalongo gi-nia mee aanei, gei mee ga-helekai, “Mee di soukohp ne-de-hagalongo gi nnelekai Dimaadua! Gei Dimaadua gu-hagau-mai dana laion ga-daaligi a-mee gii-made, gii-hai be nnelekai Dimaadua ne-hai.”

13:27  Mee ga-helekai gi ana dama-daane, “Hagatogomaalia-ina dagu ‘donkey’.” Gei digaula guu-hai be nnelekai a-maa.

13:28  Mee gaa-hana i-hongo dana ‘donkey’ ga-gidee tuaidina soukohp e-moe i-hongo di ala, di ‘donkey’ mo-di laion e-tuu i-golo. Di laion digi gai tuaidina o-maa be hagahuaidu di ‘donkey’.

13:29  Soukohp madua ga-dahi-aga tuaidina ga-hagauda gi-hongo di ‘donkey’, ga-gaamai gi-muli gi Bethel e-hai tangihangi, gaa-lawa gaa-danu.

13:30  Mee ne-danu a-mee i-di waa-daalunga o dono madahaanau, gei mee mo ana dama-daane gaa-hai tangihangi ga-helekai, “Dogu duaahina daane, dogu duaahina daane!”

13:31  I-muli di danu, gei soukohp ga-helekai gi ana dama-daane, “Maa au gaa-made, gei goodou gaa-danu au i-lodo taalunga deenei, gaa-dugu dogu huaidina i-baahi o mee.

13:32  Nia helekai ala gu-helekai-iei mee bolo gii-hai be di hai a Dimaadua ne-haganoho e-hai-baahi gi-di gowaa dudu tigidaumaha i Bethel mo-di hai-baahi gi-nia gowaa hai-daumaha huogodoo i-nia waahale o Samaria gaa-donu gaa-gila.”

13:33  King Jeroboam o Israel digi dugua ana hai-hala huaidu, e-hai hua dana hai e-hilihili ana gau hai-mee-dabu mai nia madahaanau ala hagalee tau-anga e-hai-hegau i ana gowaa dudu tigidaumaha ne-hai. Mee e-haga-dabu digau hai-mee-dabu e-de-hilihili be goai-hua dela ma-ga-hiihai gi-di moomee deelaa.

13:34  Di hala deenei i-baahi di king ga-gila-mai di mooho mo-di doo dono lohongo-king.