CopSahBible2 - I Samuel - 10

10:1  ⲁⲩⲱ ⲥⲁⲙⲟⲩⲏⲗ ⲁϥϫⲓ ⲙⲡⲉⲫⲁⲅⲟⲥ ⲏ ⲡⲉϩⲛⲁⲁⲩ ⲛⲛⲉϩ ⲁϥⲡⲁϩⲧϥ ⲉϫⲛ ⲧⲁⲡⲉ ⲛⲥⲁⲟⲩⲗ ⲁⲩⲱ ⲁϥϯⲡⲓ ⲉⲣⲱϥ ⲡⲉϫⲁϥ ⲛⲁϥ ϫⲉ ⲡϫⲟⲉⲓⲥ ⲁϥⲧⲁϩⲥⲕ ⲉⲧⲣⲉⲕⲉⲣⲁⲣⲭⲱⲛ ⲉϫⲙ ⲡⲉϥⲗⲁⲟⲥ ⲡ ⲁⲩⲱ ⲛⲧⲟⲕ ⲡⲉⲧⲛⲁⲣⲛⲟϭ ⲉϫⲙ ⲡⲗⲁⲟⲥ ⲙⲡ ⲛⲅⲛⲁϩⲙⲉϥ ⲉⲧⲟⲟⲧⲟⲩ ⲛⲛⲉϥϫⲁϫⲉ ⲉⲧⲕⲱⲧⲉ ⲉⲣⲟϥ ⲁⲩⲱ ⲡⲁⲓ ⲡⲉ ⲡⲙⲁⲉⲓⲛ ⲉⲧⲛⲁϣⲱⲡⲉ ⲛⲁⲕ ϫⲉ ⲁⲡϫⲟⲉⲓⲥ ⲧⲁϩⲥⲕ ⲉⲧⲣⲉⲕⲣⲁⲣⲭⲱⲛ ⲉϫⲛ ⲧⲉϥⲕⲗⲏⲣⲟⲛⲟⲙⲓⲁ

10:2  ⲉⲕϣⲁⲛⲙⲟⲟϣⲉ ⲉⲃⲟⲗ ϩⲓⲧⲟⲟⲧ ⲙⲡⲟⲟⲩ ⲕⲛⲁϭⲓⲛⲉ ⲛⲣⲱⲙⲉ ⲥⲛⲁⲩ ϩⲁⲧⲛ ⲛⲧⲁⲫⲟⲥ ⲛϩⲣⲁⲭⲏⲗ ϩⲙ ⲡⲧⲟⲟⲩ ⲛⲃⲉⲛⲓⲁⲙⲓⲛ ⲉⲩⲉⲓⲣⲉ ⲛϩⲉⲛⲛⲟϭ ⲛⲃⲟϭⲥ ϩⲁ ⲡⲣⲁϣⲉ ⲁⲩⲱ ⲛⲧⲟⲟⲩ ⲥⲉⲛⲁϫⲟⲟⲥ ⲛⲁⲕ ϫⲉ ⲁⲩϩⲉ ⲉⲛⲉⲟⲟⲩ ⲛⲁⲓ ⲛⲧⲁⲧⲉⲧⲛⲃⲱⲕ ⲉϣⲓⲛⲉ ⲛⲥⲱⲟⲩ ⲡⲉⲕⲉⲓⲱⲧ ⲁϥⲛⲉϩ ⲡⲣⲟⲟⲩϣ ⲉⲃⲟⲗ ⲛⲛⲉⲧⲃⲛⲟⲟⲩⲉ ⲁⲩⲱ ϥϥⲓⲣⲟⲟⲩϣ ⲉⲙⲁⲧⲉ ⲉⲧⲃⲉⲧⲏⲩⲧⲛ ⲉϥϫⲱ ⲙⲙⲟⲥ ϫⲉ ⲟⲩ ⲡⲉϯⲛⲁⲁⲁϥ ⲉⲧⲃⲉ ⲡⲁϣⲏⲣⲉ

10:3  ⲕⲛⲁⲙⲟⲟϣⲉ ⲇⲉ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲛⲅⲉⲓ ⲉϩⲣⲁⲓ ⲉⲡϣⲏⲛ ⲛⲑⲁⲃⲱⲣ ⲁⲩⲱ ⲕⲛⲁϩⲉ ⲉϣⲟⲙⲛⲧ ⲛⲣⲱⲙⲉ ⲙⲡⲙⲁ ⲉⲧⲙⲙⲁⲩ ⲉⲩⲛⲁⲉⲣⲁⲧϥ ⲙⲡⲛⲟⲩⲧⲉ ⲉⲃⲁⲓⲑⲏⲗ ⲉⲣⲉϣⲟⲙⲛⲧ ⲙⲙⲁⲥ ⲛⲃⲁⲁⲙⲡⲉ ϩⲓϫⲱϥ ⲛⲟⲩⲁ ⲁⲩⲱ ⲕⲉⲟⲩⲁ ⲉⲣⲉ ϣⲟⲙⲛⲧ ⲛϩⲛⲁⲁⲩ ⲛⲟⲉⲓⲕ ϩⲓϫⲱϥ ⲁⲩⲱ ⲡⲕⲉⲟⲩⲁ ⲉⲣⲉ ⲟⲩϩⲱⲧ ⲛⲏⲣⲡ ϩⲓϫⲱϥ

10:4  ⲥⲉⲛⲁϣⲁϫⲉ ⲛⲙⲙⲁⲕ ⲉⲧⲃⲉ ϯⲣⲏⲛⲏ ⲁⲩⲱ ⲥⲉⲛⲁϯ ⲛⲁⲕ ⲛⲁⲣⲭⲏ ⲥⲛⲧⲉ ⲛⲟⲉⲓⲕ ⲉⲕⲉϫⲓⲧⲟⲩ ⲛⲧⲟⲟⲧⲟⲩ

10:5  ⲙⲛⲛⲥⲁ ⲛⲁⲓ ⲉⲕⲉⲃⲱⲕ ⲉϩⲟⲩⲛ ⲉⲡⲃⲟⲩⲛⲟⲥ ⲙⲡⲛⲟⲩⲧⲉ ⲡⲙⲁ ⲉⲧⲉⲣⲉⲡⲉⲣⲏⲧ ⲛⲛⲁⲗⲗⲟⲫⲩⲗⲟⲥ ⲛϩⲏⲧϥ ⲉⲣⲉⲛⲁⲥⲓⲃ ⲡⲁⲗⲗⲟⲫⲩⲗⲟⲥ ⲙⲡⲙⲁ ⲉⲧⲙⲙⲁⲩ ⲁⲩⲱ ⲉⲧⲉⲧⲛϣⲁⲛⲃⲱⲕ ⲉϩⲟⲩⲛ ⲉⲧⲡⲟⲗⲓⲥ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲕⲛⲁⲧⲱⲙⲛⲧ ⲉⲩⲭⲟⲣⲟⲥ ⲙⲡⲣⲟⲫⲏⲧⲏⲥ ⲉⲩⲛⲏⲩ ⲉⲃⲟⲗ ϩⲛ ⲃⲁⲙⲁ ⲉⲣⲉϩⲉⲛⲕⲓⲑⲁⲣⲁ ϩⲓϩⲏ ⲙⲙⲟⲟⲩ ⲙⲛ ϩⲉⲛⲕⲟⲩⲕⲙ ⲙⲛ ϩⲉⲛⲥⲏϥⲉ ⲛϫⲱ ⲙⲛ ⲟⲩⲯⲁⲗⲧⲏⲣⲓⲟⲛ ⲁⲩⲱ ⲛⲧⲟⲟⲩ ⲉⲩⲡⲣⲟⲫⲏⲧⲉⲩⲉ

10:6  ⲛⲧⲉⲡⲉ ⲙⲡϫⲟⲉⲓⲥ ⲉⲓ ⲉϩⲣⲁⲓ ⲉϫⲱⲕ ⲛⲅⲡⲣⲟⲫⲏⲧⲉⲩⲉ ⲛⲙⲙⲁⲩ ⲛⲅⲡⲱⲱⲛⲉ ⲛⲅⲣⲕⲉⲣⲱⲙⲉ

10:7  ⲁⲩⲱ ⲛⲉⲓⲙⲁⲉⲓⲛ ⲉⲩϣⲁⲛⲧⲁϩⲟⲕ ⲁⲣⲓϩⲱⲃ ⲛⲓⲙ ⲉⲧⲛⲁⲛⲟⲩⲟⲩ ⲉⲧⲉⲣⲉⲧⲟⲟⲧⲕ ⲛⲁⲧⲁϩⲟⲟⲩ ⲉⲁⲁⲩ ϫⲉ ⲡⲛⲟⲩⲧⲉ ⲛⲁϣⲱⲡⲉ ⲛⲙⲙⲁⲕ

10:8  ⲁⲩⲱ ⲉⲕⲉⲣϣⲟⲣⲡ ⲉⲣⲟⲓ ⲉϩⲣⲁⲓ ⲉⲅⲁⲗⲅⲁⲗⲁ ⲉⲓⲥ ϩⲏⲏⲧⲉ ϯⲛⲁⲉⲓ ⲛⲁⲕ ⲉⲙⲁⲩ ⲉⲧⲁⲗⲟ ⲉϩⲣⲁⲓ ⲛⲟⲩϭⲗⲓⲗ ⲙⲛ ϩⲉⲛⲑⲩⲥⲓⲁ ⲛⲉⲓⲣⲏⲛⲓⲕⲟⲛ ⲟⲩⲛ ⲥⲁϣϥ ⲛϩⲟⲟⲩ ⲛⲁⲟⲩⲉⲓⲛⲉ ⲉⲣⲟⲕ ϣⲁⲛϯⲉⲓ ⲛⲁⲕ ⲁⲩⲱ ϯⲛⲁⲧⲁⲙⲟⲕ ⲉⲛⲉⲧⲉⲕⲛⲁⲁⲁⲩ

10:9  ⲁⲥϣⲱⲡⲉ ⲇⲉ ⲛⲧⲉⲣⲉϥⲕⲧⲟ ⲛⲧⲉϥⲛⲁϩⲃⲉ ⲉⲙⲟⲟϣⲉ ⲉⲃⲟⲗ ϩⲓⲧⲟⲟⲧϥ ⲥⲁⲟⲩⲗ ⲁⲡⲛⲟⲩⲧⲉ ϯ ⲉⲣⲟϥ ⲛⲕⲉϩⲏⲧ ⲁⲛⲉⲓⲙⲁⲉⲓⲛ ⲧⲏⲣⲟⲩ ⲧⲁϩⲟϥ ⲙⲡⲉϩⲟⲟⲩ ⲉⲧⲙⲙⲁⲩ

10:10  ⲁϥⲉⲓ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲉϩⲣⲁⲓ ⲉⲡⲃⲟⲩⲛⲟⲥ ⲁⲩⲱ ⲉⲓⲥ ⲟⲩⲭⲟⲣⲟⲥ ⲙⲡⲣⲟⲫⲏⲧⲏⲥ ⲛⲉϥϩⲓϩⲏ ⲙⲙⲟϥ ⲁⲩⲱ ⲡⲉ ⲙⲡⲛⲟⲩⲧⲉ ⲁϥⲃⲱϭⲉ ⲉϩⲣⲁⲓ ⲉϫⲱϥ ⲁϥⲡⲣⲟⲫⲏⲧⲉⲩⲉ ϩⲛ ⲧⲉⲩⲙⲏⲧⲉ

10:11  ⲁⲩⲱ ⲟⲩⲟⲛ ⲛⲓⲙ ⲉⲧⲥⲟⲟⲩⲛ ⲙⲙⲟϥ ⲛⲥⲁϥ ⲙⲛ ϣⲙⲛⲧ ⲙⲡⲟⲟⲩ ⲁⲩⲛⲁⲩ ⲉⲣⲟϥ ⲁⲩⲱ ⲉⲓⲥ ϩⲏⲏⲧⲉ ⲛⲧⲟϥ ⲛⲉϥϩⲛⲧⲙⲏⲧⲉ ⲛⲛⲉⲡⲣⲟⲫⲏⲧⲏⲥ ⲡⲉϫⲉⲡⲗⲁⲟⲥ ⲙⲡⲟⲩⲁ ⲡⲟⲩⲁ ⲙⲡⲉⲑⲓⲧⲟⲩⲱϥ ϫⲉ ⲟⲩ ⲡⲉ ⲡⲉⲓϩⲱⲃ ⲛⲧⲁϥϣⲱⲡⲉ ⲙⲡϣⲏⲣⲉ ⲛⲕⲓⲥ ⲉⲛⲉⲥⲁⲟⲩⲗ ϩⲱⲱϥ ⲁϥⲱⲡ ϩⲛ ⲛⲉⲡⲣⲟⲫⲏⲧⲏⲥ

10:12  ⲁⲩⲱ ⲟⲩⲁ ⲛϩⲏⲧⲟⲩ ⲁϥⲟⲩⲱϣⲃ ϫⲉ ⲛⲓⲙ ϩⲱⲱϥ ⲡⲉ ⲡⲉϥⲉⲓⲱⲧ ⲉⲧⲃⲉ ⲡⲁⲓ ⲁⲡϣⲁϫⲉ ϣⲱⲡⲉ ⲉⲩⲡⲁⲣⲁⲃⲟⲗⲏ ϫⲉ ⲉⲛⲉⲥⲁⲟⲩⲗ ⲁϥⲱⲡ ϩⲛ ⲛⲉⲡⲣⲟⲫⲏⲧⲏⲥ

10:13  ⲁϥⲟⲩⲱ ⲇⲉ ⲉϥⲡⲣⲟⲫⲏⲧⲉⲩⲉ ⲁϥⲉⲓ ⲉϩⲣⲁⲓ ⲉⲡⲃⲟⲩⲛⲟⲥ

10:14  ⲡⲉϫⲉⲕⲓⲥ ⲡⲉϥⲉⲓⲱⲧ ⲛⲁϥ ⲙⲛ ⲡⲕⲉⲟⲩⲁ ⲉⲧⲛⲙⲙⲁϥ ϫⲉ ⲛⲧⲁⲧⲉⲧⲛⲃⲱⲕ ⲉⲧⲱⲛ ⲡⲉϫⲁϥ ⲛⲁϥ ϫⲉ ⲛⲧⲁⲛⲃⲱⲕ ⲉⲕⲱⲧⲉ ⲛⲥⲁ ⲛⲉⲟⲟⲩ ⲁⲩⲱ ⲛⲧⲉⲣⲉⲛⲛⲁⲩ ϫⲉ ⲙⲡⲉⲛϩⲉ ⲉⲣⲟⲟⲩ ⲁⲛⲃⲱⲕ ⲉⲣⲁⲧϥ ⲛⲥⲁⲙⲟⲩⲏⲗ

10:15  ⲁⲩⲱ ⲕⲓⲥ ⲡⲉϫⲁϥ ⲛⲥⲁⲟⲩⲗ ϫⲉ ⲙⲁⲧⲁⲙⲟⲓ ϫⲉ ⲛⲧⲁⲥⲁⲙⲟⲩⲏⲗ ϫⲟⲟⲥ ⲛⲁⲕ ϫⲉ ⲟⲩ

10:16  ⲡⲉϫⲉⲥⲁⲟⲩⲗ ⲙⲡⲉϥⲉⲓⲱⲧ ϫⲉ ϩⲛ ⲟⲩⲧⲁⲙⲟ ⲁϥⲧⲁⲙⲟⲓ ϫⲉ ⲁⲩϩⲉ ⲉⲛⲉⲟⲟⲩ ⲡϣⲁϫⲉ ⲇⲉ ⲛⲧⲙⲛⲧⲣⲣⲟ ⲙⲡⲉϥⲟⲩⲟⲛϩϥ ⲉⲣⲟϥ

10:17  ⲁⲩⲱ ⲥⲁⲙⲟⲩⲏⲗ ⲁϥⲡⲁⲣⲁⲅⲅⲉⲓⲗⲉ ⲙⲡⲗⲁⲟⲥ ⲧⲏⲣϥ ⲉⲧⲣⲉⲩⲉⲓ ⲉⲣⲁⲧϥ ⲙⲡϫⲟⲉⲓⲥ ⲉϩⲣⲁⲓ ⲉⲙⲁⲥⲥⲏⲫⲁ

10:18  ⲥⲁⲙⲟⲩⲏⲗ ⲇⲉ ⲡⲉϫⲁϥ ⲛⲛϣⲏⲣⲉ ⲙⲡ ϫⲉ ⲛⲁⲓ ⲛⲉⲧⲉⲣⲉⲡϫⲟⲉⲓⲥ ⲡⲛⲟⲩⲧⲉ ⲙⲡ ϫⲱ ⲙⲙⲟⲟⲩ ϫⲉ ⲁⲛⲟⲕ ⲁⲓⲉⲓⲛⲉ ⲛⲛⲉϣⲏⲣⲉ ⲙⲡ ⲉⲃⲟⲗ ϩⲛ ⲕⲏⲙⲉ ⲁⲩⲱ ⲁⲓⲛⲉϩⲙⲧⲏⲩⲧⲛ ⲛⲧⲟⲟⲧϥ ⲙⲫⲁⲣⲁⲱ ⲡⲣⲣⲟ ⲛⲕⲏⲙⲉ ⲁⲩⲱ ⲛⲧⲟⲟⲧⲟⲩ ⲛⲛⲉⲙⲛⲧⲣⲣⲟ ⲧⲏⲣⲟⲩ ⲉⲧϩⲟϫϩⲉⲭ ⲙⲙⲱⲧⲛ

10:19  ⲛⲧⲱⲧⲛ ⲇⲉ ⲙⲡⲟⲟⲩ ⲁⲧⲉⲧⲛⲥⲉϣϥⲡⲛⲟⲩⲧⲉ ⲛⲧⲟϥ ⲡⲉ ⲡⲉⲧⲛⲥⲱⲣ ⲉⲃⲟⲗ ϩⲛ ⲛⲉⲧⲛϩⲓⲥⲉ ⲧⲏⲣⲟⲩ ⲙⲛ ⲛⲉⲧⲛⲑⲗⲓⲯⲓⲥ ⲁⲩⲱ ⲡⲉϫⲏⲧⲛ ϫⲉ ⲛⲧⲛⲛⲁϭⲱ ⲁⲛ ϩⲓⲛⲁⲓ ⲁⲗⲗⲁ ⲕⲱ ⲛⲟⲩⲣⲣⲟ ϩⲓϫⲱⲛ ⲧⲉⲛⲟⲩ ϭⲉ ⲁϩⲉⲣⲁⲧⲧⲏⲩⲧⲛ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲕⲁⲧⲁ ⲛⲉⲧⲛⲧⲱϣ ⲕⲁⲧⲁ ⲛϣⲟ ⲛⲛⲉⲧⲛⲫⲩⲗⲏ

10:20  ⲥⲁⲙⲟⲩⲏⲗ ⲇⲉ ⲁϥⲧⲁϩⲟ ⲉⲣⲁⲧϥ ⲙⲡⲙⲏⲏϣⲉ ⲧⲏⲣϥ ⲙⲡ ⲁⲩⲱ ⲁⲡⲉⲕⲗⲏⲣⲟⲥ ⲧⲁϩⲉ ⲡⲙⲏⲏϣⲉ ⲛⲃⲉⲛⲓⲁⲙⲓⲛ

10:21  ⲁϥⲧⲁϩⲟ ⲉⲣⲁⲧϥ ⲙⲡⲙⲏⲏϣⲉ ⲛⲃⲉⲛⲓⲁⲙⲓⲛ ⲕⲁⲧⲁ ⲛⲉϥⲫⲩⲗⲏ ⲁⲡⲉⲕⲗⲏⲣⲟⲥ ⲉⲓ ⲉϫⲛ ⲧⲉⲫⲩⲗⲏ ⲙⲙⲁⲧⲧⲁⲣⲓ ⲁⲩⲱ ⲁϥⲧⲁϩⲟ ⲉⲣⲁⲧⲥ ⲛⲧⲉⲫⲩⲗⲏ ⲙⲙⲁⲧⲧⲁⲣⲓ ⲕⲁⲧⲁ ⲣⲱⲙⲉ ⲁⲡⲉⲕⲗⲏⲣⲟⲥ ⲉⲓ ⲉϫⲛ ⲥⲁⲟⲩⲗ ⲡϣⲏⲣⲉ ⲛⲕⲓⲥ ⲁⲩⲱ ⲁⲩⲕⲱⲧⲉ ⲛⲥⲱϥ ⲙⲡⲟⲩϩⲉ ⲉⲣⲟϥ

10:22  ⲥⲁⲙⲟⲩⲏⲗ ⲇⲉ ⲁϥⲕⲟⲧϥ ⲁϥϫⲛⲉⲡϫⲟⲉⲓⲥ ϫⲉ ⲉⲛⲉⲣⲉⲡⲣⲱⲙⲉ ⲛⲁⲉⲓ ⲉⲡⲉⲓⲙⲁ ⲡⲉϫⲉⲡϫⲟⲉⲓⲥ ⲛⲁϥ ϫⲉ ⲉⲓⲥ ϩⲏⲏⲧⲉ ϥⲗⲏϭ ϩⲛ ⲛⲉⲥⲕⲉⲩⲏ

10:23  ⲥⲁⲙⲟⲩⲏⲗ ⲇⲉ ⲁϥⲡⲱⲧ ⲁϥⲉⲛⲧϥ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲁϥⲧⲁϩⲟϥ ⲉⲣⲁⲧϥ ϩⲛ ⲧⲙⲏⲧⲉ ⲙⲡⲗⲁⲟⲥ ⲁⲩⲱ ⲁϥϫⲓⲥⲉ ⲉⲡⲗⲁⲟⲥ ⲧⲏⲣϥ ⲛⲟⲩϩⲟⲩⲉ ϣⲓⲏ ⲛⲛⲁϩⲃⲉ

10:24  ⲡⲉϫⲉⲥⲁⲙⲟⲩⲏⲗ ⲉϩⲟⲩⲛ ϩⲙ ⲡⲗⲁⲟⲥ ⲧⲏⲣϥ ϫⲉ ⲉⲛⲉⲁⲧⲉⲧⲛⲛⲁⲩ ⲉⲡⲉⲛⲧⲁⲡϫⲟⲉⲓⲥ ⲥⲟⲧⲡϥ ⲛⲁϥ ϫⲉ ⲙⲛⲡⲉⲧⲧⲛⲧⲱⲛ ⲉⲣⲟϥ ⲛϩⲏⲧⲧⲏⲩⲧⲛ ⲧⲏⲣⲧⲛ ⲁⲩⲱ ⲡⲗⲁⲟⲥ ⲧⲏⲣϥ ⲁⲩⲉⲓⲙⲉ ⲁⲩⲱ ⲁⲩⲱϣ ⲉⲃⲟⲗ ⲉⲩϫⲱ ⲙⲙⲟⲥ ϫⲉ ⲙⲁⲣⲉⲡⲣⲣⲟ ⲱⲛϩ

10:25  ⲁⲩⲱ ⲥⲁⲙⲟⲩⲏⲗ ⲁϥⲧⲁⲩⲟ ⲉⲡⲗⲁⲟⲥ ⲧⲏⲣϥ ⲙⲡⲇⲓⲕⲁⲓⲱⲙⲁ ⲛⲧⲙⲛⲧⲣⲣⲟ ⲁⲩⲱ ⲁϥⲥⲁϩϥ ⲉⲩϫⲱⲱⲙⲉ ⲁϥⲕⲁⲁϥ ⲙⲡⲙⲧⲟ ⲉⲃⲟⲗ ⲙⲡϫⲟⲉⲓⲥ ⲥⲁⲙⲟⲩⲏⲗ ⲇⲉ ⲁϥⲕⲱ ⲉⲃⲟⲗ ⲙⲡⲗⲁⲟⲥ ⲧⲏⲣϥ ⲁⲡⲟⲩⲁ ⲡⲟⲩⲁ ⲃⲱⲕ ⲉϩⲣⲁⲓ ⲉⲡⲉϥⲙⲁ

10:26  ⲥⲁⲟⲩⲗ ϩⲱⲱϥ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ ⲉⲅⲁⲃⲁⲁ ⲁⲩⲱ ϩⲉⲛⲣⲱⲙⲉ ⲛϫⲱⲱⲣⲉ ⲛⲁⲓ ⲛⲧⲁⲡⲛⲟⲩⲧⲉ ⲧⲁⲁⲥ ⲉϩⲣⲁⲓ ⲉⲡⲉⲩϩⲏⲧ ⲁⲩⲃⲱⲕ ⲁⲩⲟⲩⲁϩⲟⲩ ⲛⲥⲁ ⲥⲁⲟⲩⲗ

10:27  ϩⲉⲛⲣⲱⲙⲉ ⲇⲉ ⲛⲗⲟⲓⲙⲟⲥ ⲁⲩⲟⲩⲱⲛ ⲉⲣⲱⲟⲩ ⲉⲩϫⲱ ⲙⲙⲟⲥ ⲇⲉ ⲛⲓⲙ ⲡⲉⲧⲛⲁⲛⲁϩⲙⲉⲛ ⲡⲁⲓ ⲡⲉ ⲁⲩϯⲥⲱϣ ⲛⲁϥ ⲁⲩⲱ ⲙⲡⲟⲩⲉⲛⲇⲱⲣⲟⲛ ⲛⲁϥ