Azeri - II Corinthians - 11

11:1  کاشکي بئر آز عاغيلسيزليقدا منه دؤزسَيدئنئز: لاکئن دوغرودان دا منه دؤزورسونوز!

11:2  چونکي سئزئن حاقّينيزدا تارينين قيرتي ائله قيرتلئيم. چونکي سئزي تک بئر اَره، مسئحه آداخلي اتدئم کي، سئزي مسئح اوچون پاک بئر باکئره قيز کئمي تقدئم ادئم.

11:3  لاکئن قورخورام کي، نجه ائلان حوّاني اؤز حؤقّه​بازليغي ائله آلداتدي، سئزئن ده فئکئرلرئنئز مسئحده اولان صافليق و پاکليقدان اوزاق دوشسون.

11:4  چونکي اگر بئري گلئب، بئزئم وعظ اتمه‌دئيئمئز بئر عئساني وعظ ادئر و يا آلديغينيز روحدان باشقا بئر روحو آليرسينيز، و يا قبول اتدئيئنئز ائنجئلدن آيري بئر ائنجئلي قبول ادئرسئنئز، بونا ممنونئيّتله دؤزورسونوز.

11:5  آمّا هچ شيده اؤزومو فايئق حوارئلردن اَسکئک سايميرام.

11:6  حتّا اگر نئطقده مهارتسئز اولسام دا، معرئفتده اِله ديئلم. آمّا هر حالدا بئز بونو هر شيده سئزه آشکار اتدئک.

11:7  و يا مگر گوناه اتدئم کي، سئزي اوجالتماق اوچون اؤزومو آلچالتديم؟ چونکي تارينين ائنجئلئني سئزه موفته وعظ اتدئم؟

11:8  سئزه خئدمت اتمک اوچون اؤزگه کئلئسالاري سويوب، اونلاردان ماعاش آلديم.

11:9  و يانينيزدا اولان زامان احتئياجدا اولاندا دا هچ کسه يوک اولماديم. چونکي قارداشلار مقدونئيه​دن گلدئکده احتئياجيمي تامامن رفع اتدئلر. و هر شيده اؤزومو ساخلاديم کي، مبادا سئزه بئر يوک اولوم و بله اتمه‌يه ده داوام وره​جه‌يم.

11:10  مسئحئن منده اولان حقئقتي حاقّي اوچون، اَخايئه بؤلگه​لرئنده کئمسه مني بو ائفتئخاريمدان محروم اتميه​جک.

11:11  نه اوچون؟ سئزي سِومه‌دئيئمه گؤره؟ تاري بئلئر!

11:12  لاکئن اتدئيئمه داوام وره​جه‌يم کي، فخر اتدئکلري خوصوصدا بئزئمله برابر ساييلماق اوچون فورصت آختارانلارا فورصت ورمه‌يئم.

11:13  چونکي بله آداملار يالانچي حوارئلر، حؤقّه​باز ائشچئلردئرلر کي، اؤزلرئني مسئحئن حوارئلرئنه اوخشاديرلار.

11:14  بو دا تعجّوبلو ديئل؛ چونکي شيطان دا اؤزونو بئر نور مله‌يئنه اوخشادير.

11:15  اونون اوچون ده تعجّوبلو ديئل کي، اونا خئدمت ادنلر اؤزلرئني صالحلئک خئدمتکارلارينا اوخشاتسينلار کي، اونلارين آخيري عمل​لرئنه گؤره اولاجاق.

11:16  گئنه ديئرم؛ قوي هچ کس دوشونمه‌سئن کي، من عاغيلسيزام. لاکئن اگر بله​دئرسه ده، مني آغيلسيز کئمي قبول ادئن کي، من ده بئر آز فخر ادئم.

11:17  بو فخره گؤره ددئکلرئمي ربّئن دئيه​جه‌يي کئمي يوخ، آغيلسيز بئري کئمي ديئرم.

11:18  ائندي کي، بئر چوخلاري جئسمه گؤره فخر ادئر، من ده فخر اده​جه‌يم.

11:19  چونکي سئز عاغيلّي اولدوغونوز حالدا، عاغيلسيزلارا شادليقلا دؤزورسونوز.

11:20  چونکي اگر کئمسه سئزي قول اتسه، مالينيزي يِسه، اؤز منفعتي اوچون سئزدن ائستئفاده اتسه، اؤزونو بؤيوکلندئرسه، اوزونوزه وورسا، اونو دؤزورسونوز.

11:21  بونو خجالتله دمه‌لئيم کي، بئز ضعئف عمل اتمئشئک. آمّا کئمسه نه ائله جسور اولسا-(عاغيلسيز کئمي دانيشيرام)-من اؤزوم ده او قدر جسورام.

11:22  آيا اونلار عئبراني‌دئرلر؟ من ده عئبراني‌يَم. ائسرايئللي‌دئرلر؟ من ائسرايئللي‌يَم. ائبراهئم نسلئندندئرلر؟ من ده.

11:23  مسئحئن خئدمتچئلري‌دئرلر؟ (دلي بئر آدام کئمي دانيشيرام)، من اونلاردان داها چوخ؛ داها چوخ زحمت چکمئشم، داها چوخ زئندانلاردا اولموشام، ساييسيز-حسابسيز دؤيولموشم، چوخ واخت دا اؤلوم خطرئنه دوشموشم.

11:24  بش دفه يهودئلردن قيرخدان بئر اَسکئک شالّاق يمئشم.

11:25  اوچ دفه دَيَنَکله وورولموشام، بئر دفه داشا باسيلميشام، اوچ دفه گمئم سينيب؛ بئر گجه-بئر گوندوز درئن دهنزده کچئرتمئشم.

11:26  چوخ دفه سفرلرده چايلارين خطرلرئنده، اوغرولارين خطرلرئنده، هموطنلرئمئن خطرلرئنده، قيري‌يهودئلرئن خطرلرئنده، شهرئن خطرلرئنده، چؤلون خطرلرئنده، دهنزئن خطرلرئنده، يالانچي قارداشلارين خطرلرئنده،

11:27  زحمت و مشقّتده، چوخ دفه ده يوخوسوز، آجليق و سوسوزلوقدا، چوخ دفه ده يمکسئز سويوقلوق و لوتلوکده اولموشام.

11:28  اشئگدن اولان بو شيلردن باشقا، هر گون مني ازن، او فئکئردئر کي، بوتون کئلئسالار اوچون چکئرم.

11:29  کئم ضعئف اولور و من ضعئف اولمورام؟ کئم گوناها دوشور و من ائچئمده يانميرام؟!

11:30  اگر فخر اتمک لازيم گلسه، ضعئفلئيئمي گؤرسه‌دن شيلر​له فخر اده​جه‌يم.

11:31  رب عئسانين آتاسي، او ابدي موتبارک تاري بئلئر کي، يالان دمئرم.

11:32  دَمَشقده آرتاس پادشاهين والئسي، دَمَشقلي​لرئن شهرئني گودوردو کي، مني ياخالاسين.

11:33  من ده بئر سبد ائچئنده شهرئن دوآرينداکي بئر پنجره​دن اِندئرئلئب، اونون الئندن قاچديم.