Kekchi - Job - 3

3:1  Quicuulac xkˈehil nak laj Job quia̱tinac ut quixmajecua li cutan nak quiyoˈla.

3:2  Ut quixye:

3:3  —Tzˈekta̱nanbil taxak li kˈojyi̱n nak quiqˈueheˈ inyuˈam. Tzˈekta̱nanbil taxak li cutan nak quinyoˈla.

3:4  Us raj quicana ta chi kˈojyi̱n li ho̱nal nak quinyoˈla. Ut incˈaˈ raj chic quisake̱u. Us raj incˈaˈ ta quinjulticoˈ re li Dios.

3:5  Us raj nak xsukˈi ta chokˈ kˈojyi̱n li cutan nak quinyoˈla. Us raj nak ta̱cha̱lk li kˈeki chok re nak incˈaˈ chic ta̱cˈutu̱nk. Chiyibokˈ ru li cutan aˈan.

3:6  Chisachk ta chi junaj cua retalil li kˈojyi̱n nak quiqˈueheˈ inyuˈam. Chisachma̱nk ta chi junaj cua li retalil li cutan nak quinyoˈla ut li chihab aˈan. Ut incˈaˈ ta chic chijulticama̱nk.

3:7  Us raj nak junes rahil chˈo̱lej quicuan saˈ li kˈojyi̱n nak quinyoˈla. Ut ma̱ ani raj quibichan xban xsahil xchˈo̱l.

3:8  Us raj nak teˈxmajecua li cutan aˈan li nequeˈmajecuan, li cuanqueb xcuanquil saˈ xbe̱n li nimla xul Leviatán.

3:9  Us raj nak saˈ li cutan aˈan incˈaˈ chic ta̱lemtzˈu̱nk li cak chahim. Us raj nak incˈaˈ ta quicˈutun li cutan aˈan li yo̱queb chiroybeninquil ut incˈaˈ ta chic quisake̱u.

3:10  Tzˈekta̱nanbil ta chi junaj cua li kˈojyi̱n aˈan nak li Dios quinixqˈue chi yoˈla̱c ut incˈaˈ xinixcol chiru li raylal aˈin li yo̱quin chixcˈulbal anakcuan.

3:11  ¿Cˈaˈut nak incˈaˈ quincam nak toj ma̱jiˈ ninyoˈla? Us raj nak quincam ta nak yo̱quin chi yoˈla̱c.

3:12  ¿Cˈaˈut nak quineˈril nak quinyoˈla? Ut, ¿cˈaˈut nak queˈxqˈue intuˈ?

3:13  Cui ta quincam, us raj. Ma̱ anihin raj saˈ ruchichˈochˈ. Yo̱quin raj chi hila̱nc chi sa saˈ inchˈo̱l.

3:14  Cuochbeneb raj li rey li queˈcuan saˈ ruchichˈochˈ ut eb li nequeˈqˈuehoc naˈleb, li queˈxyi̱b xni̱nkal ru cab nak toj yoˈyo̱queb.

3:15  Malaj ut cuochbeneb raj li queˈcuan saˈ xcuanquil li queˈxchˈutub li oro ut li plata saˈ li rochocheb.

3:16  ¿Cˈaˈut nak incˈaˈ quincam chi toj ma̱jiˈ nacuulac xkˈehil inyoˈlajic, joˈ nequeˈxcˈul li cˈulaˈal li incˈaˈ nequeˈiloc cutan?

3:17  Eb li yibeb ru xnaˈleb nequeˈxcanab xba̱nunquil li incˈaˈ us nak nequeˈcam. Ut eb li lublu̱queb chi cˈanjelac nequeˈhilan nak nequeˈcam.

3:18  Joˈcan ajcuiˈ eb li pre̱x. Nak nequeˈcam, nequeˈhilan xban nak incˈaˈ chic nequeˈrabi lix ya̱b xcux laj ilol tzˈalam.

3:19  Nak ac camenakeb chic, juntakˈe̱teb li cuanqueb xcuanquil riqˈuineb li ma̱cˈaˈeb xcuanquil. Ut eb li lokˈbil mo̱s incˈaˈ chic cuanqueb rubel xcuanquil lix patrón.

3:20  ¿Cˈaˈut nak li Dios naxqˈue xyuˈam li junju̱nk yal re nak tixcˈul raylal saˈ ruchichˈochˈ? ¿Cˈaˈut nak naxqˈue xyuˈam li junelic ra saˈ xchˈo̱l?

3:21  Eb aˈan yo̱queb chiroybeninquil li ca̱mc ut incˈaˈ ajcuiˈ nequeˈcam, usta nequeˈxsicˈ joˈ nak nasiqˈueˈ li cˈaˈru terto xtzˈak.

3:22  Nak nacuulac xkˈehil nak nequeˈcam, cˈajoˈ nak nasahoˈ saˈ xchˈo̱leb.

3:23  ¿Cˈaˈru aj e nak li Dios naxqˈue xyuˈam li junju̱nk cui incˈaˈ naxcˈut chiru cˈaˈru tixcˈul mokon? ¿Cˈaˈut nak naxqˈue xyuˈam li ani incˈaˈ chic naxtau chanru tixcol rib chiru li raylal?

3:24  Incˈaˈ chic nincuaˈac xban nak junes ya̱bac chic ninba̱nu. Incˈaˈ chic nin-ucˈac xban nak nin-ayaynac xban li raylal nincˈul.

3:25  Li raylal li yo̱quin chiroybeninquil, aˈan ajcuiˈ li xincˈul. Xban nak ninxucuac chixcˈulbal li raylal, joˈcan nak nabal li raylal xchal saˈ inbe̱n.

3:26  Incˈaˈ sa cuanquin. Incˈaˈ ninhilan chi moco nincˈojob inchˈo̱l. Incˈaˈ chic naru nincuan saˈ tuktu̱quil usilal xban nak nabal li raylal yo̱ chi tˈanecˈ saˈ inbe̱n, chan laj Job.