Geez - Joshua - 18

18:1  ወተጋብኡ ፡ ኵሉ ፡ ተዓይኒሆሙ ፡ ለደቂቀ ፡ እስራኤል ፡ ውስተ ፡ ሴሎ ፡ ወተከልዋ ፡ ህየ ፡ ለደብተራ ፡ መርጡል ፡ ወአጽንዕዋ ፡ ለምድር ፡ እሙንቱ ።

18:2  ወተርፉ ፡ ደቂ[ቀ ፡ እስራኤል ፡] እለ ፡ ኢተወርሱ ፡ ሰብዐቱ ፡ ነገድ ።

18:3  ወይቤሎሙ ፡ ኢየሱስ ፡ ለደቂቀ ፡ እስራኤል ፡ እስከ ፡ ማኡዜኑ ፡ ታፀንሕዋ ፡ ለምድር ፡ ከመ ፡ ኢትትዋረስዋ ፡ እንተ ፡ ወሀበክሙ ፡ እግዚአብሔር ፡ አምላክነ ።

18:4  አውፅኡ ፡ እምውስቴትክሙ ፡ ሠለስተ ፡ ዕደወ ፡ እምነ ፡ ነገድ ፡ ወይትነሥኡ ፡ ይዑድዋ ፡ ለምድር ፡ ወይጽሐፍዋ ፡ በቅድሜየ ፡ ዘከመ ፡ ዖድዋ ።

18:5  ወርእይዋ ፡ ወመጽኡ ፡ ኀቤሁ ፡ ወከፈሎሙ ፡ ሰብዐተ ፡ ክፍለ ፡ ወአቀመ ፡ ሎቱ ፡ ይሁዳ ፡ ደወሎ ፡ መንገለ ፡ አዜብ ፡ ወደቂቀ ፡ ዮሴፍ ፡ አቀሙ ፡ ሎሙ ፡ መንገለ ፡ መስዕ ።

18:6  ወአንትሙሰ ፡ ክፍልዋ ፡ ለምድር ፡ ሰብዐተ ፡ ክፍለ ፡ ወአምጽኡ ፡ ኀቤየ ፡ ዝየ ፡ ወኣበውእ ፡ ለክሙ ፡ ርስተ ፡ ቅድመ ፡ እግዚአብሔር ፡ አምላክክሙ ።

18:7  እስመ ፡ አልቦሙ ፡ ክፍለ ፡ ደቂቀ ፡ ሌዊ ፡ ምስሌክሙ ፡ እስመ ፡ ክህነቱ ፡ ለእግዚአብሔር ፡ ክፍሎሙ ፤

18:8  ወጋድሰ ፡ ወሮቤል ፡ ወመንፈቀ ፡ ነገደ ፡ መናሴ ፡ ነሥኡ ፡ ርስቶሙ ፡ በማዕዶተ ፡ ዮርዳንስ ፡ ጽባሓዊ ፡ ዘወሀቦሙ ፡ ሙሴ ፡ ቍልዔሁ ፡ ለእግዚአብሔር ።

18:9  ወተንሥኡ ፡ እሙንቱ ፡ ዕደው ፡ ወሖሩ ፡ ወአዘዞሙ ፡ ኢየሱስ ፡ ለእለ ፡ የሐውሩ ፡ ይዑድዋ ፡ ለምድር ፡ ወይቤሎሙ ፡ ሑሩ ፡ ዑድዋ ፡ ለምድር ፡ ወግብኡ ፡ ኀቤየ ፡ ዝየ ፡ ከመ ፡ አብእ ፡ ለክሙ ፡ ቅድመ ፡ እግዚአብሔር ፡ መክፈልተክሙ ፡ በሴሎ ።

18:10  ወሖሩ ፡ ወዖድዋ ፡ ለምድር ፡ ወርእይዋ ፡ ወጸሐፍዋ ፡ ውስተ ፡ መጽሐፍ ፡ በበ ፡ አህጉሪሃ ፡ ወአምጽኡ ፡ ኀበ ፡ ኢየሱስ ።

18:11  ወአብአ ፡ ኢየሱስ ፡ መክፈልቶሙ ፡ ቅድመ ፡ እግዚአብሔር ፡ በሴሎ ።

18:12  ወበጽሖ ፡ ክፍሉ ፡ ለብንያሚ ፡ ቅድመ ፡ በበ ፡ ሕዘቢሁ ፡ ወረከቦሙ ፡ ደወለ ፡ መክፈልቶሙ ፡ ማእከለ ፡ ይሁዳ ፡ ወማእከለ ፡ ዮሴፍ ።

18:13  ወኮነ ፡ ደወሎሙ ፡ [ዘመንገለ ፡ መስዕ ፡] እምነ ፡ ዮርዳንስ ፡ ወየዐርግ ፡ ደወሎሙ ፡ ላዕለ ፡ አዜባ ፡ ለኢየሪኮ ፡ ወይመጽእ ፡ ዲበ ፡ መስዕ ፡ ወየዐርግ ፡ ላዕለ ፡ ደብር ፡ ዘኀበ ፡ ባሕር ፡ ወይከውን ፡ ሞጻእቱ ፡ መድብራይጥስ ፡ ዘቤቶን ።

18:14  ወየኀልፍ ፡ እምህየ ፡ ላዕለ ፡ አድባረ ፡ ሉዛ ፡ እንተ ፡ መንገለ ፡ ዘባነ ፡ ሉዛ ፡ ዲበ ፡ አዜባ ፡ እንተ ፡ ይእቲ ፡ ቤቴል ፡ ወይወርድ ፡ ላዕለ ፡ ደወለ ፡ አጣሮት ፡ ዘሆሬኅ ፡ እንተ ፡ ላዕለ ፡ አድባር ፡ ዘመንገለ ፡ አዜባ ፡ ለቤቶሮን ፡ ታሕ[ታይ] ።

18:15  ወየኀልፍ ፡ ደወሎሙ ፡ ላዕለ ፡ አሐዱ ፡ ኅብር ፡ ዘይኔጽር ፡ ላዕለ ፡ ባሕር ፡ እንተ ፡ መንገለ ፡ አዜቡ ፡ ለደብር ፡ ዘቅድመ ፡ ቤቶሮን ፡ ዘዲበ ፡ አዜብ ፡ ወይከውን ፡ ሞጻእቱ ፡ ላዕለ ፡ ቀርየተ ፡ በዓል ፡ እንተ ፡ ይእቲ ፡ ቀርያትያርም ፡ ሀገረ ፡ ደቂቀ ፡ ይሁዳ ፡ ወዝንቱ ፡ ውእቱ ፡ ደወሎሙ ፡ ዘመንገለ ፡ ባሕር ።

18:16  ወደወሎሙኒ ፡ ዘመንገለ ፡ አዜብ ፡ እምነ ፡ ቀርያተ ፡ በዓል ፡ ወየኀልፍ ፡ ደወሎሙ ፡ ላዕለ ፡ ጋይን ፡ ዲበ ፡ ነቅዐ ፡ ማይ ፡ ዘነፍቶ ።

18:17  ወይወርድ ፡ ደወሎሙ ፡ ላዕለ ፡ አሐዱ ፡ ኅብር ፡ ዘቅድመ ፡ ናጴሳነም ፡ ዘመንገለ ፡ ገቦሃ ፡ [ለ]ኤመቀርፋይን ፡ ዘኀበ ፡ መስዕ ፡ ወይወርድ ፡ እምነ ፡ ናጲን ፡ ዲበ ፡ ዘባነ ፡ ኢየቡሴ ፡ ዘኀበ ፡ አዜብ ፡ ወይወርድ ፡ ዲበ ፡ ነቅዐ ፡ ሮጌል ።

18:18  ወየኀልፍ ፡ ዲበ ፡ ነቅዐ ፡ ቤታሳሚስ ፡ ወይበውእ ፡ ዲበ ፡ ከልዮት ፡ እንተ ፡ ቅድመ ፡ ዐቀበ ፡ ኤታሚን ፡ ወይወርድ ፡ ዲበ ፡ እብነ ፡ ቤዎን ፡ ዘደቂቀ ፡ ሮቤል ።

18:19  ወየኀልፍ ፡ ዲበ ፡ ዘባነ ፡ ቤተራብ ፡ ዘኀበ ፡ መስዕ ፡ ወይወርድ ፡ ደወሎሙ ፡ ዲበ ፡ ዘባነ ፡ ባሕር ፡ ዘኀበ ፡ መስዕ ።

18:20  ወይከውን ፡ ሞጻእቱ ፡ ለደወሎሙ ፡ ለዕለ ፡ ፍኖተ ፡ ባሕር ፡ ዘአሎን ፡ ዘዲበ ፡ መስዕ ፡ ወገቦሁ ፡ ለዮርዳንስ ፡ ዘኀበ ፡ አዜብ ፡ [ዝንቱ ፡ ደወለ ፡ አዜብ ፡] ፡ ወዮርዳንስ ፡ ወሰኖሙ ፡ እምገቦ ፡ ጽባሓዊ ፡ ወዝንቱ ፡ ውእቱ ፡ ደወሎሙ ፡ ዘዐውዶሙ ፡ ለደቂቀ ፡ ብንያሚ ፡ በበ ፡ ሕዘቢሆሙ ፡ ዘተወርሱ ።

18:21  ወኮነ ፡ አህጉሪሆሙ ፡ ለደቂቀ ፡ ብንያሚ ፡ በበ ፡ ሕዘቢሆሙ ፡ ኢየሪኮ ፡ ወቤተ ፡ ጌዎ ፡ ወአመቃስስ ።

18:22  ወቤተ ፡ ባራ ፡ ወሰ[ራ ፡ ወ]ቤሰና ።

18:23  ወኤኢን ፡ ወፋራ ፡ ወኤፍራታ ።

18:24  ወቀራፋ ፡ ወቄፍራ ፡ ወሞኒ ፡ ወጎባሕ ፡ ዐሥሩ ፡ ወክልኤ ፡ ኣህጉር ፡ ወአዕጻዳቲሆን ።

18:25  ገባኦን ፡ ወራማ ።

18:26  ወመሴማ ፡ ወቢሮን ፡ ወሞቄ ።

18:27  ወቤራ ፡ ወቃፈን ፡ ወቃና ፡ ወሴሌቀን ፡ ወተር[ኤ]ላ ።

18:28  ወኢየቡሴዎን ፡ እንተ ፡ ይእቲ ፡ ኢየሩሳሌም ፡ ሀገር ፡ ወገባኦት ፡ ወሀገረ ፡ ያሪም ፡ ዐሥሩ ፡ ወሠላስ ፡ አህጉር ፡ ወአዕጻዳቲሆን ፡ ወዝንቱ ፡ ውእቱ ፡ ርስቶሙ ፡ ለደቂቀ ፡ ብንያሚ ፡ በበ ፡ ሕዘቢሆሙ ።