TpiKJPB - Luke - 15

15:1  ¶ Nau olgeta man bilong kisim takis na ol sinman i wok long go klostu long em long harim em.

15:2  Na ol Farisi na ol man bilong rait i tok baksait, i spik, Dispela man i kisim ol sinman, na kaikai wantaim ol.

15:3  Na em i tokim ol long dispela tok piksa, i spik,

15:4  Wanem man bilong yupela, taim em i gat 100 sipsip, sapos wanpela i go lus long em, i no lusim dispela 99 long ples i no gat man, na go bihainim dispela samting i lus, inap long em i painim dispela pinis?

15:5  Na taim em i bin painim dispela pinis, em i slipim dispela long ol sol bilong han bilong em, na wokim amamas tru.

15:6  Na taim em i kam bek long haus bilong em, em i singautim ol pren bilong em na ol man i stap klostu long em long bung wantaim, i spik long ol, Wokim amamas tru wantaim mi. Long wanem, mi bin painim sipsip bilong mi pinis, dispela i lus.

15:7  Mi tokim yupela, long wankain olsem amamas tru bai stap long heven antap long wanpela sinman husat i tanim bel, moa long antap long 99 stretpela man, husat i no gat nid long tanim bel.

15:8  Na tu wanem meri taim em i gat tenpela hap silva, sapos wanpela hap mani i lus long em, i no laitim wanpela kandel, na brumim haus, na painim strong inap long taim em i painim dispela pinis?

15:9  Na taim em i bin painim dispela pinis, em i singautim ol pren bilong em na ol man i stap klostu long em long bung wantaim, i spik, Wokim amamas tru wantaim mi. Long wanem, mi bin painim pinis dispela hap mani i bin lus long mi.

15:10  Wankain olsem, mi tokim yupela, i gat amamas tru long pes bilong ol ensel bilong God antap long wanpela sinman husat i tanim bel.

15:11  ¶ Na em i tok, Wanpela man i gat tupela pikinini man.

15:12  Na pikinini i yangpela moa bilong tupela i tokim papa bilong em, Papa, givim mi hap skel bilong ol dispela kago i bai pundaun long mi. Na em i brukim long tupela ol samting bilong em.

15:13  Na i no planti de bihain long pikinini man i yangpela moa i bungim olgeta samting wantaim, na go long wokabaut bilong em long wanpela longwe kantri, na long dispela hap em i tromoi nating olgeta samting tru bilong em wantaim laip bilong wail pasin.

15:14  Na taim em i bin yusim olgeta pinis, i gat wanpela strongpela bikpela taim hangre i kirap long dispela hap graun. Na em i stat long stap sot tru long olgeta samting.

15:15  Na em i go na bungim em yet wantaim wanpela man bilong dispela kantri. Na em i salim em i go long ol hap graun bilong em long givim kaikai long ol pik.

15:16  Na em i bin gat laik long pulimapim bel bilong em wantaim ol dispela skin pipia bilong wit samting ol pik i bin kaikai. Na i no gat man i givim em.

15:17  Na taim em i kam long em yet, em i tok, Hamas wokboi papa bilong mi i baim i gat inap bret na moa i stap yet, na mi wok long dai olgeta long hangre!

15:18  Mi bai kirap na go long papa bilong mi, na mi bai tokim em, Papa, mi bin mekim sin i birua long heven, na long ai bilong yu,

15:19  Na mi no gat namba moa inap long ol i ken kolim mi pikinini man bilong yu. Mekim mi olsem wanpela bilong ol wokboi bilong yu yu baim.

15:20  Na em i kirap, na kam long papa bilong em. Tasol taim em i stap longwe tru yet, papa bilong em i lukim em, na em i gat pasin sori long em, na ran, na pundaun antap long nek bilong em, na givim kis long em.

15:21  Na pikinini man i tokim em, Papa, mi bin mekim sin i birua long heven, na long ai bilong yu, na mi no gat namba moa inap long ol i ken kolim mi pikinini man bilong yu.

15:22  Tasol papa bilong em i tokim ol wokboi bilong em, Bringim i kam dispela nambawan longpela saket, na putim long em. Na putim ring long han bilong em, na ol su long tupela fut bilong em.

15:23  Na bringim long hia dispela pikinini bulmakau ol i mekim patpela, na kilim. Na larim yumi kaikai, na stap amamas.

15:24  Long wanem, dispela pikinini man bilong mi i bin stap daiman, na em i stap laip gen. Em i bin lus, na yumi painim em pinis. Na ol i stat long stap amamas.

15:25  Nau pikinini man bilong em i bikpela i stap long bikpela gaden. Na taim em i kam na go klostu long haus, em i harim musik na ol man i danis.

15:26  Na em i singautim wanpela bilong ol wokboi, na askim long dispela samting i gat wanem mining.

15:27  Na em i tokim em, Brata bilong yu i kam pinis. Na papa bilong yu i bin kilim dispela pikinini bulmakau ol i mekim patpela, bilong wanem, em i bin kisim em gen orait na gutpela.

15:28  Na em i belhat, na em i no gat laik long go insait. Olsem na papa bilong em i kam ausait, na mekim strongpela askim long em.

15:29  Na em i bekim tok long papa bilong em, Harim, ol dispela planti yia mi bin wokim wok long yu, na tu mi no bin kalapim tok strong bilong yu wanpela taim. Na yet yu no bin givim wanpela pikinini meme long mi, inap long mi ken wokim amamas wantaim ol pren bilong mi.

15:30  Tasol long taim stret long dispela pikinini man bilong yu i kam, husat i bin kaikai olgeta samting bilong yu wantaim ol pamuk meri, yu bin kilim bilong em dispela pikinini bulmakau ol i mekim patpela.

15:31  Na em i tokim em, Pikinini man, yu stap wantaim mi oltaim, na olgeta samting mi gat em i bilong yu.

15:32  Em i fit long yumi mas wokim amamas, na stap amamas. Long wanem, dispela brata bilong yu i bin stap daiman, na em i stap laip gen. Na em i bin lus, na yumi painim em pinis.