Pohnpeian - Numbers - 23

23:1  Palaam eri patohwanohng Palak, “Komw ketin kauwada wasaht pei sarawi isuh oh ketikidohng ie kouwol isimen oh sihpw wol isimen.”

23:2  Palak eri ketin kapwaiada pekipek en Palaam. Ira ahpw meirongkihla kouwol men oh sihpw wol men pohn ehuehu pei sarawi ko.

23:3  Palaam eri patohwanohng Palak, “Komw ketin sepit mahs limwahn sapwellimomwi meirong isihs pwukat, pwe I pahn patolahng patohwan mahs ma KAUN-O ele pahn ketin tuhwong ie. Mehkoaros me e pahn mahsanihong ie, I pahn patohwanohng komwi.” Palaam eri patopatolahng pohn nahna ehu,

23:4  oh Koht ahpw ketin tuhwong Palaam wasao. Palaam ahpw patohwanohng, “I patohwan kauwada pei sarawi isuh oh meirongkihla kouwol men oh sihpw wol men pohn ehuehu pei sarawi ko.”

23:5  KAUN-O ahpw mahsanih, “Pwurowei rehn Palak oh patohwanda mahsen kan me I pahn mahsanihong uhk.”

23:6  Palaam eri pwurala oh tuhwong Palak me ketikette limwahn sapwellime meirong isihso, iangahki kaun koaros en wehin Mohap.

23:7  Palaam eri patohwanda mahsen en kokohp pwukat: 1 “Palak, nanmwarkien Mohap, ketin malipeiehdo sang Siria, sang nin nahna kan en palimese. E mahsanih, ‘Kohdo wia kokohp ni mwarei; komw keriahla mehn Israel ko.”

23:8  A ia duwen ei pahn keriahla me Koht sohte ketin keriahla? Ia duwen ei pahn kailongkihla me Koht sohte ketin kalahdeki?

23:9  Sang pohn paip ile kan I kak uduhdiahl irail, sang pohn dohl akan I kak mwasamwasahn irail. Wehi ehu irail me uhtohrada, me paiamwahusang wehi teikan.

23:10  Kadaudok en Israel kan me ngeder duwehte pwelpar, ihs me kak wadekada tohtohn irail? Komwi ketin kupwure ie pwe ei mour en imwisekla duwehte emen sapwellimen Koht aramas akan, pwe imwilahn ei mour en duwehte imwilahn me pwung kan.”

23:11  Eri, Palak ahpw mahsanihong Palaam, “Dahme ke wiewiahiong ie? I ekeruhkodo pwe ke en keriahla ei imwintihti kan, a dahme ke wia, ihte ke kapakapkin irail.”

23:12  A Palaam sapeng, patohwan, “Pwe da? Kakete I en potohwanda ehu soahng tohrohrasang me KAUN-O ketikihong ie?”

23:13  Palak eri mahsanihong, “Iangiehda mahs, kita kohla ekis wasa tohrohr, wasa me ke pahn kilang ekeite mehn Israel ko. Eri, ke pahn keriairailla sang wasao.”

23:14  Ih eri ketin kahrelahng Palaam nan mohsen Sopim, me mi pohn Nahna Piska, wasa me e ketin kauwada ie pei sarawi isuh oh ketin meirongkihla kouwol men oh sihpw wol men pohn ehuehu pei sarawi ko.

23:15  Palaam eri patohwanohng Palak, “Komw sepit mahs limwahn mehn meirong isihs pwukat, pwe I pahn patolahng tuhwong Koht mahs.”

23:16  KAUN-O eri ketin tuhwong Palaam oh mahsanihong dahme e pahn patohwanda; e ahpw pil ketin kapwurelahng rehn Palak.

23:17  Palaam eri pwurala oh tuhwong Palak me ketikette limwahn mehn meirong isihs ko, iangahki kaunen Mohap ko. Palak eri keinemwe dahme KAUN-O ketin mahsanih;

23:18  a Palaam ahpw patohwanda mahsen en kokohp pwukat: “Palak, nein Sippor, komw ketido mahs; oh rong kanahieng dahme I pahn patohwan.

23:19  Koht kaidek aramas emen me kin lokaia likamw; pil kaidehk aramas emen me kin wekidala audepen kupwure. Ni eh pahn ketin inoukihda mehkot, e kin ketin kapwaiada; mehkot me e kin mahsanih kin pweida.

23:20  E ketin mahsanihong ie I en kapaiahda; eri, me Koht ketin kupwuramwahwih, I sohte kak wekidala.

23:21  I sohte kilangada mehkot suwed rehn mehn Israel, de kahpwal, ni ahnsou kohkohdo. KAUN-O, arail Koht, kin ketin ieiang irail; re patohwan wiahki ih arail nanmwarki.

23:22  Koht ketin kahluwairaildo sang wehin Isip; e ketin uhpalihkin irail nan mahwen, rasehng kou lawalo men.

23:23  Sohte katepen tiahk en wunahni rehn mehn Israel, pil sohte ketepen kosetipw rehrail. Ih ahnsowo met ahnsoun patohwan duwen mehn Israel, ‘Kilang dahme Koht ketin wiadahr!’

23:24  Iet wehin Israel me rasehng laion kehlail men: e sohte pahn wendi e lao kadallehla seike, oh nimala ntahn irail me e kemehla.”

23:25  Eri, Palak ahpw mahsanihong Palaam, “Ma ke sohte pahn keriahla mehn Israel kan, ke sohte pil pahn kapaiairailda.”

23:26  Palaam ahpw sapeng Palak, patohwan, “I soh patohwanohngkomwiher me I pahn patohwanda mehkoaros me KAUN-O ketin mahsanihong ie?”

23:27  Palak eri mahsanihong, “Kohdo mahs; I pahn kahreiukalahng ekis wasa tohrohr; mweinele Koht pahn ketin kupwurki ke en keriairailla sang wasao.”

23:28  Ih eri ketin kahrelahng Palaam pohn kumwen Nahna Peor, sallahng sapwtehno.

23:29  Palaam ahpw patohwanohng, “Komw ketin kauwada pei sarawi isuh wasaht, oh ketikidohng ie kouwol isimen oh pil sihpw wol isimen.”

23:30  Palak eri ketin kapwaiada me Palaam patohwanohng; ih eri meirongkihla kouwol men oh sihpw wol men pohn ehuehu pei sarawi ko.