CopSahBible2 - Numbers - 28

28:1  ⲁⲩⲱ ⲁⲡϫⲟⲉⲓⲥ ϣⲁϫⲉ ⲛⲁϩⲣⲙ ⲙⲱⲩⲥⲏⲥ ⲉϥϫⲱ ⲙⲙⲟⲥ

28:2  ϫⲉ ϩⲱⲛ ⲉⲧⲟⲟⲧⲟⲩ ⲛⲛϣⲏⲣⲉ ⲙⲡ ⲛⲅϫⲟⲟⲥ ⲛⲁⲩ ⲉⲕϫⲱ ⲙⲙⲟⲥ ϫⲉ ⲛⲁⲇⲱⲣⲟⲛ ⲛⲁⲧⲁⲉⲓⲟ ⲛⲁⲕⲁⲣⲡⲟⲥ ⲉⲩⲥⲧⲟⲓ ⲛⲥϯⲛⲟⲩⲃⲉ ⲉⲧⲉⲧⲛⲉⲧⲁⲗⲟⲟⲩ ⲛⲁⲓ ⲉϩⲣⲁⲓ ϩⲛ ⲛⲁϣⲁ

28:3  ⲁⲩⲱ ⲉⲕⲉϫⲟⲟⲥ ⲛⲁⲩ ϫⲉ ⲛⲁⲓ ⲛⲉ ⲛⲕⲁⲣⲡⲟⲥ ⲉⲧⲉⲧⲛⲉⲛⲧⲟⲩ ⲙⲡϫⲟⲉⲓⲥ ϩⲓⲉⲓⲃ ⲥⲛⲁⲩ ⲉⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ ⲉⲡⲉϩⲟⲟⲩ ⲉⲩϭⲗⲓⲗ ϩⲛ ⲟⲩⲙⲟⲩⲛ ⲉⲃⲟⲗ

28:4  ⲉⲕⲉⲧⲁⲙⲓⲉⲡⲟⲩⲁ ϩⲓⲉⲓⲃ ⲉϩⲧⲟⲟⲩⲉ ⲁⲩⲱ ⲉⲕⲉⲧⲁⲙⲓⲟ ⲡⲙⲉϩⲥⲛⲁⲩ ⲛϩⲓⲉⲓⲃ ⲙⲡⲛⲁⲩ ⲛⲣⲟⲩϩⲉ

28:5  ⲁⲩⲱ ⲉⲕⲉⲧⲁⲙⲓⲉⲡⲣⲉⲙⲏⲧ ⲙⲡϣⲓ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲛ ⲟⲩⲣⲁϥⲧⲱⲟⲩ ⲛϣⲓ ⲛⲛⲉϩ ⲉⲡⲉϭⲗⲓⲗ ⲙⲡⲙⲟⲩⲛ ⲉⲃⲟⲗ ⲉⲩⲑⲩⲥⲓⲁ

28:6  ⲧⲁⲓ ⲉⲧⲛⲁϣⲱⲡⲉ ϩⲣⲁⲓ ϩⲙ ⲡⲧⲟⲟⲩ ⲛⲥⲓⲛⲁ ⲉⲩⲥⲧⲟⲓ ⲛⲥϯⲛⲟⲩⲃⲉ ⲙⲡϫⲟⲉⲓⲥ

28:7  ⲁⲩⲱ ⲧⲉϥⲥⲡⲟⲛⲇⲏ ⲡⲣⲁϥⲧⲟⲟⲩ ⲙⲡϣⲓ ⲉⲡⲟⲩⲁ ϩⲓⲉⲓⲃ ϩⲣⲁⲓ ϩⲙ ⲡⲉⲧⲟⲩⲁⲁⲃ ⲉⲕⲉⲟⲩⲱⲧⲛ ⲉⲃⲟⲗ ⲛⲟⲩⲥⲡⲟⲛⲇⲏ ⲛⲥⲓⲕⲉⲣⲟⲛ ⲙⲡϫⲟⲉⲓⲥ

28:8  ⲁⲩⲱ ⲉⲕⲉⲧⲁⲙⲓⲉⲡⲙⲉϩⲥⲛⲁⲩ ⲛϩⲓⲉⲓⲃ ⲙⲡⲛⲁⲩ ⲛⲣⲟⲩϩⲉ ⲕⲁⲧⲁ ⲧⲉϥⲑⲩⲥⲓⲁ ⲁⲩⲱ ⲕⲁⲧⲁ ⲧⲉϥⲥⲡⲟⲛⲇⲏ ⲉⲧⲉⲧⲛⲉⲧⲁⲙⲓⲟϥ ⲛⲥⲧⲟⲓ ⲛⲥϯⲛⲟⲩⲃⲉ ⲙⲡϫⲟⲉⲓⲥ

28:9  ⲁⲩⲱ ϩⲣⲁⲓ ϩⲙ ⲡⲉϩⲟⲟⲩ ⲛⲛⲥⲁⲃⲃⲁⲧⲟⲛ ⲉⲧⲉⲧⲛⲉⲛϩⲓⲉⲓⲃ ⲥⲛⲁⲩ ⲉⲩϩⲛⲟⲩⲣⲟⲙⲡⲉ ⲛⲁⲧϫⲃⲓⲛ ⲁⲩⲱ ⲣⲉⲙⲏⲧ ⲥⲛⲁⲩ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲩⲑⲩⲥⲓⲁ ⲁⲩⲱ ⲧⲉⲥⲡⲟⲛⲇⲏ

28:10  ⲙⲛ ⲡϩⲟⲗⲟⲕⲁⲩⲧⲱⲙⲁ ⲛⲛⲥⲁⲃⲃⲁⲧⲟⲛ ϩⲣⲁⲓ ϩⲛ ⲛⲥⲁⲃⲃⲁⲧⲟⲛ ϩⲓϫⲙ ⲡⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲙⲛ ⲧⲉϥⲥⲡⲟⲛⲇⲏ

28:11  ⲁⲩⲱ ϩⲣⲁⲓ ϩⲛ ⲛⲥⲟⲩⲁ ⲉⲧⲉⲧⲛⲉⲛⲟⲩϭⲗⲓⲗ ⲙⲡϫⲟⲉⲓⲥ ⲙⲁⲥⲉ ⲥⲛⲁⲩ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲓⲗⲉ ⲥⲁϣϥ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

28:12  ϣⲟⲙⲛⲧ ⲛⲣⲉⲙⲏⲧ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲡⲟⲩⲁ ⲙⲁⲥⲉ ⲁⲩⲱ ⲥⲛⲁⲩ ⲛⲣⲉⲙⲏⲧ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲡⲟⲩⲁ ⲟⲓⲗⲉ

28:13  ⲁⲩⲱ ⲟⲩⲣⲉⲙⲏⲧ ⲛⲥⲁⲙⲓⲧ ⲉϥⲧⲁⲙⲓⲏⲩ ϩⲓ ⲛⲉϩ ⲉⲡⲟⲩⲁ ϩⲓⲉⲓⲃ ⲟⲩⲑⲩⲥⲓⲁ ⲛⲥⲧⲟⲓ ⲛⲥϯⲛⲟⲩⲃⲉ ⲉⲩⲕⲁⲣⲡⲟⲥ ⲙⲡϫⲟⲉⲓⲥ

28:14  ⲁⲩⲱ ⲧⲉⲩⲥⲡⲟⲛⲇⲏ ⲧⲡⲁϣⲉ ⲙⲡϣⲓ ⲛⲁϣⲱⲡⲉ ⲉⲡⲟⲩⲁ ⲙⲁⲥⲉ ⲁⲩⲱ ⲡⲣⲉϣⲟⲙⲛⲧ ⲙⲡϣⲓ ⲛⲁϣⲱⲡⲉ ⲉⲡⲟⲩⲁ ⲟⲓⲗⲉ ⲁⲩⲱ ⲡⲣⲉϥⲧⲟⲟⲩ ⲙⲡϣⲓ ⲛⲁϣⲱⲡⲉ ⲉⲡⲟⲩⲁ ϩⲓⲉⲓⲃ ⲡⲁⲓ ⲡⲉ ⲡϩⲟⲗⲟⲕⲁⲩⲧⲱⲙⲁ ⲟⲩⲉⲃⲟⲧ ⲉⲃⲟⲗ ϩⲛ ⲟⲩⲉⲃⲟⲧ ⲉⲛⲉⲃⲁⲧⲉ ⲛⲧⲉⲣⲟⲙⲡⲉ

28:15  ⲁⲩⲱ ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ ϩⲣⲁⲓ ϩⲓϫⲙ ⲡⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲉⲩⲉⲧⲁⲙⲓⲟϥ ⲙⲛ ⲧⲉϥⲥⲡⲟⲛⲇⲏ ⲙⲡϫⲟⲉⲓⲥ

28:16  ⲁⲩⲱ ϩⲣⲁⲓ ϩⲙ ⲡϣⲟⲣⲡ ⲛⲉⲃⲟⲧ ⲛⲥⲟⲩⲙⲛⲧⲁϥⲧⲉ ⲙⲡⲉⲃⲟⲧ ⲡⲡⲁⲥⲭⲁ ⲡⲉ ⲙⲡϫⲟⲉⲓⲥ

28:17  ⲁⲩⲱ ⲥⲟⲩⲙⲛⲧⲏ ⲙⲡⲉⲃⲟⲧ ⲡⲉ ⲡϣⲁ ⲛⲧⲉⲧⲛⲉⲟⲩⲉⲙⲁⲑⲁⲃ ⲛⲥⲁϣϥ ⲛϩⲟⲟⲩ

28:18  ⲁⲩⲱ ⲡϣⲟⲣⲡ ⲛϩⲟⲟⲩ ⲛⲁϣⲱⲡⲉ ⲛⲟⲩⲧⲱϩⲙ ⲉϥⲟⲩⲁⲁⲃ ⲛⲏⲧⲛ ⲛⲛⲉⲧⲛⲣⲗⲁⲁⲩ ⲛϩⲱⲃ ⲛϣⲙϣⲉ

28:19  ⲉⲧⲉⲧⲛⲉⲉⲛϩⲉⲛϩⲟⲗⲟⲕⲁⲩⲧⲱⲙⲁ ⲙⲛ ϩⲉⲛⲕⲁⲣⲡⲟⲥ ⲙⲡϫⲟⲉⲓⲥ ⲙⲁⲥⲉ ⲥⲛⲁⲩ ⲉⲃⲟⲗ ϩⲛ ⲛⲉϩⲟⲟⲩ ⲁⲩⲱ ⲟⲩⲟⲓⲗⲉ ⲙⲛ ⲥⲁϣϥ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ ⲉⲩⲉϣⲱⲡⲉ ⲛⲏⲧⲛ

28:20  ⲁⲩⲱ ⲧⲉⲩⲑⲩⲥⲓⲁ ⲟⲩⲥⲁⲙⲓⲧ ⲉϥⲟⲩⲟϣⲙ ϩⲓ ⲛⲉϩ ϣⲟⲙⲛⲧ ⲛⲣⲉⲙⲏⲧ ⲉⲡⲟⲩⲁ ⲙⲙⲁⲥⲉ ⲁⲩⲱ ⲣⲉⲙⲏⲧ ⲥⲛⲁⲩ ⲉⲡⲟⲩⲁ ⲛⲟⲉⲓⲗⲉ

28:21  ⲟⲩⲣⲉⲙⲏⲧ ⲉⲕⲉⲧⲁⲙⲓⲟϥ ⲉⲡⲟⲩⲁ ⲛϩⲓⲉⲓⲃ ⲉⲡⲥⲁϣϥ ⲛϩⲓⲉⲓⲃ

28:22  ⲁⲩⲱ ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ ⲉⲧⲱⲃϩ ϩⲁⲣⲱⲧⲛ

28:23  ⲛⲃⲗ ⲡⲉϭⲗⲓⲗ ⲙⲡⲛⲁⲩ ⲛϣⲱⲣⲡ ⲛⲟⲩⲟⲉⲓϣ ⲛⲓⲙ ⲉⲧⲉⲡⲁⲓ ⲡⲉ ⲡϩⲟⲗⲟⲕⲁⲩⲧⲱⲙⲁ ⲛⲧⲉ ⲡⲙⲟⲩⲛ ⲉⲃⲟⲗ

28:24  ⲛⲁⲓ ⲉⲧⲉⲧⲛⲉⲧⲁⲙⲓⲟⲟⲩ ⲙⲡⲉϩⲟⲟⲩ ⲙⲡⲙⲉϩⲥⲁϣϥ ⲛϩⲟⲟⲩ ⲟⲩⲇⲱⲣⲟⲛ ⲙⲛ ⲟⲩⲧⲁⲗⲟ ⲛⲥϯⲛⲟⲩⲃⲉ ⲙⲡϫⲟⲉⲓⲥ ⲁⲩⲱ ⲡⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲉⲕⲉⲧⲁⲙⲓⲟ ϩⲓϫⲱϥ ⲛⲧⲉϥⲥⲡⲟⲛⲇⲏ

28:25  ⲁⲩⲱ ⲡⲙⲉϩⲥⲁϣϥ ⲛϩⲟⲟⲩ ⲉⲩⲉⲙⲟⲩⲧⲉ ⲉⲣⲟϥ ϫⲉ ⲡⲡⲉⲧⲟⲩⲁⲁⲃ ⲛⲏⲧⲛ ⲛⲛⲉⲧⲉⲛⲉⲣⲗⲁⲁⲩ ⲛϩⲱⲃ ⲛϣⲙϣⲉ ⲛϩⲏⲧϥ

28:26  ⲁⲩⲱ ⲡⲉϩⲟⲟⲩ ⲛⲃⲣⲣⲉ ⲉⲧⲉⲧⲛϣⲁⲛⲉⲓⲛⲉ ⲛϩⲏⲧϥ ⲛⲉⲑⲩⲥⲓⲁ ⲛⲃⲣⲣⲉ ⲛⲉⲛϩⲉⲃⲇⲱⲙⲁⲥ ⲙⲡϫⲟⲉⲓⲥ ⲉⲩⲉⲙⲟⲩⲧⲉ ⲉⲣⲟϥ ϫⲉ ⲛⲉⲧⲟⲩⲁⲁⲃ ⲛⲏⲧⲛ ⲛⲛⲉⲧⲉⲛⲉⲣⲗⲁⲁⲩ ⲛϩⲱⲃ ⲛϣⲙϣⲉ ⲛϩⲏⲧⲟⲩ

28:27  ⲉⲧⲉⲧⲛⲉⲉⲓⲛⲉ ⲛϩⲉⲛϭⲗⲓⲗ ⲛⲥϯⲛⲟⲩϥⲉ ⲙⲡϫⲟⲉⲓⲥ ⲙⲁⲥⲉ ⲥⲛⲁⲩ ⲉⲃⲟⲗ ϩⲛ ⲛⲉϩⲟⲟⲩ ⲟⲩⲟⲓⲗⲉ ⲥⲁϣϥ ⲛϩⲓⲉⲓⲃ ⲛⲟⲩⲣⲟⲙⲡⲉ ⲉⲙⲛϫⲃⲓⲛ ϩⲓⲱⲟⲩ

28:28  ⲁⲩⲱ ⲧⲉⲑⲩⲥⲓⲁ ⲟⲩⲥⲁⲙⲓⲧ ⲉϥⲟⲩⲟϣϥ ϩⲓ ⲛⲉϩ ϣⲟⲙⲛⲧ ⲛⲣⲉⲙⲏⲧ ⲉⲡⲟⲩⲁ ⲙⲙⲁⲥⲉ ⲁⲩⲱ ⲣⲉⲙⲏⲧ ⲥⲛⲁⲩ ⲉⲡⲟⲩⲁ ⲛⲟⲓⲗⲉ

28:29  ⲁⲩⲱ ⲟⲩⲣⲉⲙⲏⲧ ⲉⲡⲟⲩⲁ ⲛϩⲓⲉⲓⲃ

28:30  ⲁⲩⲱ ⲟⲩϭⲓⲉ ⲉⲃⲟⲗ ϩⲛ ⲛⲃⲁⲁⲙⲡⲉ ϩⲁ ⲛⲟⲃⲉ ⲉⲩⲑⲩⲥⲓⲁ ⲛⲟⲩϫⲁⲓ ϩⲁⲣⲱⲧⲛ

28:31  ⲛⲃⲗ ⲡⲉϭⲗⲓⲗ ⲛⲟⲩⲟⲉⲓϣ ⲛⲓⲙ ⲁⲩⲱ ⲧⲉⲩⲑⲩⲥⲓⲁ ⲉⲧⲉⲧⲛⲉⲧⲁⲙⲓⲟⲥ ⲛⲁⲓ ⲉⲩⲉϣⲱⲡⲉ ⲉⲩⲟⲩⲁⲁⲃ ⲛⲏⲧⲛ ⲁⲩⲱ ⲧⲉⲧⲛⲥⲡⲟⲛⲇⲏ