Pohnpeian - Proverbs - 4

4:1  Samwa ko, kumwail rong dahme samamwail kan kin padahkihong kumwail. Kumwail rong kanahieng, kumwail ahpw pahn dehdehkihla.

4:2  Dahme I padapadahkihong kumwail me mwahu, eri, kumwail tamataman padahk pwukat koaros.

4:3  Ngehi iehros emen rehn pahpa oh nohno, eri, ni ei kekeirda,

4:4  semeio kin padahkihong ie soahng kan. E kin nda, “Tamataman dahme I ndawei oh dehr manokehla. Kapwaiada me I ndaiong uhk, ke ahpw pahn mourkihla.

4:5  Nantihong alehda kupwurokong oh erpit! Dehr manokehla de pohnsehse ei padahk kan.

4:6  Ke dehr kesehla kupwurokong, pwe ih me pahn sinsileiuk; poakohng pwe e pahn kamouruhkala.

4:7  Kupwurokong me keieu kesempwal ke en alehda. Mehkoaros likin met, pil nantihong alehda erpit.

4:8  Poakohng kupwurokong, e ahpw pahn kahrehiong uhk omw pahn lapalapala. Pwoalehdi teng, e ahpw pahn kawauwihiukala.

4:9  E pahn wiahla elin kapwat lingan ehu pohn moangomw.”

4:10  Rong ie, samwa. Rong oh ale ei padahk kan ni mehlel, ke ahpw pahn mour werei.

4:11  I padahkihonguhkehr duwen kupwurokong oh ahl pwung en mour.

4:12  Sohte mehkot pahn uh nan elomw ma ke pahn weweidwei ni loalokong, oh ke sohte pahn dipekelekel ni omw pahn tang.

4:13  Tamataman ahnsou koaros dahme ke padahngkier. Padahk kan me ke aleier iei omw mour-sinsile mwahu.

4:14  Ke dehr kohla wasa aramas suwed kan kin kohla ie. Dehr idawehn karasepen aramas suwed kan.

4:15  Dehr wia! Sohpeisang me suwed! Soikala oh wenewohng nan elomw.

4:16  Aramas suwed sohte kin kak meirla lao re wiahda me suwed. Re kin pepehd ma re sohte wiahiong emen me suwed.

4:17  Tiahk suwed oh tiahk eikek rasehng kisin mwenge oh pihl rehrail.

4:18  Ahl me aramas pwung kan kin weid loale rasehng dakadahn ketipin me kin maramarainla lao rahn pwarada.

4:19  Ahl en me suwed kan me rotorot rasehng pwohng. Re kin pwupwudi, ahpw re sohte kin kilang dahme re dipekelekelki.

4:20  Samwa, rong kanahieng dahme I nda. Rong ei koasoi kan.

4:21  Dehr mweidohng en dohsang uhk. Tamataman oh kolokol nan kapehdomw.

4:22  Padahk pwukat pahn kahrehda mour oh kakehlahda mehmen me wehwehki.

4:23  Kanahieng omw madamadau, pwe omw madamadau kan kin kahrehda mwomwen omw mour.

4:24  Dehr koasoia mehkot me sohte mehlel. Dehr kedirepwki lokaia likamw oh lokaia me kin kasalongehla aramas.

4:25  Sarada kilengwei ni likilik; dehr itiekidi ni namenek.

4:26  Koasoanehdi ni keneinei dahme ke pahn wia, oh mehkan me ke pahn wia ahpw pahn pweida mwahu.

4:27  Sohpeisang me suwed oh wenewei mwohmw. Dehr wia ehu kahk sang ni ahl pwung.