CSlElizabeth - Acts - 19

19:1  Бысть же внегда быти Аполлосу в Коринфе, Павел, прошед вышния страны, прииде во Ефес, и обрет некия ученики,

19:2  рече к ним: аще убо Дух Свят прияли есте веровавше? Они же реша к нему: но ниже аще Дух Святый есть, слышахом.

19:3  Рече же к ним: во что убо крестистеся? Они же рекоша: во Иоанново крещение.

19:4  Рече же Павел: Иоанн убо крести крещением покаяния, людем глаголя, да во Грядущаго по нем веруют, сиречь во Христа Иисуса.

19:5  Слышавше же крестишася во имя Господа Иисуса,

19:6  и возложшу Павлу на ня руце, прииде Дух Святый на ня, глаголаху же языки и пророчествоваху.

19:7  Бяше же всех мужей яко дванадесять.

19:8  Вшед же в сонмище, дерзаше, не обинуяся три месяцы беседуя и уверяя, яже о Царствии Божии.

19:9  И егда нецыи ожесточахуся и пряхуся, злословяще путь Господень пред народом, отступль от них отлучи ученики, по вся дни стязаяся во училищи мучителя некоего.

19:10  Сие же бысть два лета, яко всем живущым во Асии слышати слово Господа Иисуса, Жидом же и Еллином.

19:11  Силы же не просты творяше Бог рукама Павловыма,

19:12  яко и на недужныя наносити от (пота) тела его главотяжы и убрусцы, и исцелитися им от недуг, и духом лукавым исходити от них.

19:13  Начаша же нецыи от скитающихся Иудей заклинателей именовати над имущими духи лукавыя имя Господа Иисуса, глаголюще: заклинаем вы Иисусом, Егоже Павел проповедует.

19:14  Бяху же нецыи сынове Скевы Иудеанина архиереа седмь, иже сие творяху.

19:15  Отвещав же дух лукавый рече: Иисуса знаю и Павла свем, вы же кто есте?

19:16  И скачя на них человек, в немже бе дух лукавый, и одолев им, укрепися на них, якоже нагим и ураненым избежати от храма онаго.

19:17  Сие же бысть разумно всем живущым во Ефесе Иудеем же и Еллином, и нападе страх на всех их, и величашеся имя Господа Иисуса:

19:18  мнози же от веровавших прихождаху, исповедающе и сказующе дела своя:

19:19  доволни же от сотворших чародеяния, собравше книги своя, сожигаху пред всеми: и сложиша цены их и обретоша сребра пять тем.

19:20  Сице крепко слово Господне растяше и крепляшеся.

19:21  И якоже скончашася сия, положи Павел в дусе, прошед Македонию и Ахаию, ити во Иерусалим, рек, яко бывшу ми тамо, подобает ми и Рим видети.

19:22  Послав же в Македонию два от служащих ему, Тимофеа и Ераста, сам же пребысть время во Асии.

19:23  Бысть же во время оно молва не мала о пути Господни:

19:24  Димитрий бо некто именем, среброковачь, творяй храмы сребряны Артемиде, подаяше хитрецем делание не мало,

19:25  ихже собрав и ины сицевых вещей делатели, рече: мужие, весте, яко от сего делания доволство житию нашему есть:

19:26  и видите и слышите, яко не токмо Ефес, но мало не всю Асию Павел сей препрев, обрати мног народ, глаголя, яко не суть бози, иже руками человеческими бывают:

19:27  не токмо же сия беду приемлет наша часть, еже бы во обличение не приити, но дабы и великия богини Артемиды храм ни во чтоже не вменился, имать же разоритися и величество ея, юже вся Асиа и вселенная почитает.

19:28  Слышавше же и бывше исполнени ярости, вопияху глаголюще: велика Артемида Ефесская.

19:29  И исполнися град весь мятежа: устремишася же единодушно на позорище, восхищше Гаиа и Аристарха Македоняны, други Павловы.

19:30  Павлу же хотящу внити в народ, не оставляху его ученицы:

19:31  нецыи же от Асийских началник, суще ему друзи, пославше к нему, моляху не вдати себе в позор.

19:32  Друзии же убо ино нечто вопияху: бе бо собрание смущено, и множайшии от них не ведяху, чесо ради собрашася.

19:33  От народа же избраша Александра, изведшым его Иудеем. Александр же, помаав рукою, хотяше отвещати народу.

19:34  Разумевше же, яко Иудеанин есть, глас бысть един от всех, яко на два часа вопиющих: велика Артемида Ефесская.

19:35  Утишив же книжник народ, рече: мужие Ефесстии, кто бо есть человек, иже не весть, яко Ефесский град служитель есть великия богини Артемиды и Диопета?

19:36  Без всякаго убо прекословия сим сице сущым, потребно есть вам безмолвным быти и ничтоже безчинно творити:

19:37  приведосте бо мужей сих, ни храм (Артемидин) окрадших, ниже богиню вашу хулящих:

19:38  аще убо Димитрий и иже с ним художницы имут к кому слово, суды суть и анфипати суть: да поемлют друг на друга:

19:39  аще ли же что о иных ищете, в законнем собрании разрешится:

19:40  ибо бедствуем порицаеми быти о крамоле днешней, ни единей вине сущей, о нейже возможем воздати слово стремления сего. И сия рек распусти собравшийся народ.